雖然今年係燒腩仔第二年返學，但上年讀間N只係放紅日，所以好多時大時大節要自己同佢請假先有得去玩，今年間學校返埋22日就放11日聖誕新年假，wow...終於有得過正常嘅校園生活啦﹗而為咗慶祝我哋捱咗幾個月後卒之有假放，第一日假期艾菲係決定拍拖落樓下食個lunch慶祝，嘻...食返上次生日食唔到嘅小籠包先，仲專登whatsapp張相畀米高示威﹗
食飽見呢日係星期三博物館免費入場，就帶燒腩仔去咗科學館玩，咁講得免費入場又撞正學校假期，多人係預期之中嘅事，事前已經同燒腩仔講明要排隊等候，但實情係...個個小朋友都玩到忙晒形，有得玩嘅玩到唔捨得放手畀下個，等嘅等到無耐性衝前出手去搶，燒腩仔亦唔例外失晒控，玩到艾菲一頭煙呢﹗
眼見三樓兒童天地嘅小朋友越來越多，燒腩仔又越來越失控，於是帶佢落二樓繼續玩，見到呢部DNA跳舞機好過癮，忍唔住拉佢排隊玩，燒腩仔當然唔識玩亦唔會明DNA係咩來啦，但喺後面姐姐嘅幫忙下都玩得好開心喎，kakaka...
跟住帶咗佢入間房睇D電器嘅內膽，呢part有得打開平日無機會打開嘅電器，燒腩仔當然爆like，單係個洗碗機都唔知開開合合咗有無五次。
呢個係考反應踩break嘅遊戲，燒腩仔唔夠腳長兼唔係好明玩咩，但車迷有得揸住個軚盤，就當自己揸咗車㗎啦﹗:P
後來見人哋喺到轉呢個盤又走埋去湊熱鬧一齊轉，好彩其他小朋友都好welcome畀佢一齊玩。
之後落返地下諗住玩呢架吊臂車，點知...閂咗無開無得玩，唯有影張相留念當玩咗啦﹗
然後玩緊地下D小遊戲時，忽然工作人員話個波波鐘夠鐘做示範請我哋暫時離開，我哋就落咗地庫玩鏡子世界，好好玩但得艾菲一個，抱得起燒腩仔來又無手影相，唯有下次叫埋米高一齊再玩啦﹗
出來見到有個位介紹BB點來，有齊唔同周數嘅肧胎模型，艾菲當然拉燒腩仔去認識下，剩機又同佢講吓BB豆豬洗吓腦，哈哈...
再呃佢伸個頭入個魚頭到，實情佢係唔夠高乜都睇唔到㗎，嘻...
艾菲原先計劃同燒腩仔喺到玩到黃昏時份㗎，點知喺到玩咗兩個鐘左右，發現真係無咩啱燒腩仔呢個年紀玩（一係唔夠高玩，一係就唔明點玩），而自己都可能係感冒關係，忽然覺得好攰好眼瞓，所以就決定提早撤退打道回府休息啦﹗
離開科學館後，同燒腩仔拍拖逛吓尖東睇消防車睇噴水池，再搵張凳坐低食吓雞蛋仔，簡簡單單燒腩仔已經開心到不得了，唔...唔跳掣嘅小朋友真係特別可愛㗎﹗
就來行到車站時，仲畀我哋見到個公園，燒腩仔即刻衝前話要玩，艾菲心諗幫佢放埋D電都好吖，可惜遇著一班唔多守規矩嘅哥哥跑上跑落，癲到幾乎踩到燒腩仔手仔都唔知，安全起見唯有出盡法寶氹燒腩仔走人啦﹗
沒有留言:
張貼留言