話說星期一係艾菲生日，每年呢個時候都係米高公司嘅peak season，佢事前唔得閒陪艾菲都係預計中嘅事，咁多年來艾菲都慢慢接受咗， 今年佢喺正日請到假返來幫手湊燒腩仔，已經比上年早出晚歸去返工，要艾菲自己一個同燒腩仔慶祝好好多㗎啦，雖然燒腩仔要返學我哋都無plan到點樣大肆慶祝，但一諗到中間有幾個鐘二人世界，就算無聊到只係瞓個晏覺都覺得特別sweet。
生日前一星期，燒腩仔繼續每日跳幾次製，好不容易撐到星期六同佢返學校上埋興趣班，艾菲一心諗住終於都捱過呢個星期，米高又預告夜晚趕得切返來同我哋出去食飯，艾菲同燒腩仔放學後就好開心咁拍拖去咗元氣食壽司慶祝（兩個唔食得生嘢嘅母子去食壽司，成件事實在有D搞笑>.<），夜晚就同米高一家三口去九龍城食艾菲一直都頗like嘅小店，仲食到好好味嘅New York Cheese Cake添（艾菲最鐘意佢有情調得來唔會好拘謹，帶埋燒腩仔一齊食都唔怕騷擾到其他人，而且甜品係睇得又食得）﹗
來到星期日，米高一早又出咗門口返工，講明夜晚無十一點都唔見人，艾菲就一心想帶燒腩仔出去玩吓透吓氣，點知一覺瞓醒燒腩仔先係失常咁整咗單大嘢畀艾菲歎，艾菲收拾完爛攤子已經係正午時份，拿拿聲同佢食飯想話出門口，點知一摸佢手仔，整咩咁暖嘅？一探熱已經37.6度，唯有打消出街念頭乖乖留返喺屋企，捉佢上床瞓覺休息再沖涼幫佢降溫，但都已經做定最壞打算，果然到夜晚就燒到38度...
有病當然要佢食藥休息，偏偏呢個小朋友唔知係食咗藥太hyper嘅關係，定真係咁掛住爸爸，夜晚十點捉佢入房瞓，搞到十一點幾米高返來先肯瞓，以為世界總算平靜落來可以抖吓，凌晨五點幾艾菲去洗手間（自從陀咗BB豆豬之後艾菲係keep住不停醒要去夜尿），忽然有個小朋友又無聲無息咁走出來話去洗手間（個場面其實都幾驚嚇，嚇到艾菲個心都離一離），難得佢肯主動話去洗手間，艾菲當然樂意serve佢，但佢居然去完洗手間就直衝入大人房大叫爸爸，攰到只係得返個軀殻嘅米高無奈起身應咗佢幾句，艾菲就捉佢返房瞓，點知大人們啱啱瞓得返，佢又現身喺我哋房門口大叫爸爸，嘩...咩事呀...艾菲望吓鐘...先六點咋﹗
見到艾菲燥燥地，米高都已經好識做，主動拉燒腩仔返房瞓，然後第二朝又幫手招呼燒腩仔，等艾菲可以喺生日當天瞓到十點幾，但一覺瞓醒佢D燒係無退到，即係一定要請病假返唔到學，二人世界sweet sweet變成一家三口齊齊呆坐家中，咁艾菲都明小朋友病係無人想，但失望同唔開心係難免嘅，米高意圖話落樓買蛋糕順便請艾菲食返D好嘢來氹艾菲開心，點知艾菲明明order咗小籠包，返到來居然變咗上海粗炒，呢吓艾菲真係忍唔住黑面，即平時艾菲應該唔會出聲，不過呢日真係唔想忍，點會識咗咁多年都唔知老婆鐘意食小籠包定上海粗炒，最邪係仲要食食吓畀隻木筷子摻刺整到手指，真係痛到呢...
諸事不順嘅大半日，捱到傍晚時份燒腩仔瞓醒晏覺，燒終於都退咗落來，為求補鑊米高好主動咁幫燒腩仔餵藥沖涼，然後拉埋燒腩仔一齊唱生日歌畀艾菲聽，再氹艾菲換衫出去食飯，尚算好彩嘅係佢呢個無心肝嘅人，仲記得艾菲話想食日本嘢。
因為燒腩仔先啱啱退燒，所以我哋食飽都唔敢四圍去，即刻返屋企抖陣又食生日蛋糕，一切本來都好開心㗎，不過...有個小朋友就邊食邊嘈話要多D士多啤梨，解釋極要一齊share都唔肯罷休，最終米高將食剩嘅蛋糕收起，佢居然發難拍枱想鬧人咁樣，然後就唔小心將食緊件蛋糕掃咗落地，跟住當然係爆喊收場啦，呢D位...為求息事寧人係可以畀過件蛋糕佢㗎，始終係艾菲生日無謂嘈嘛，但為佢好等佢學識控制情緒，艾菲同米高堅持由佢喊，好彩佢都開始知自己唔啱，喊咗十分鐘後都肯收聲聽我哋講道理，不過真心覺得幾掃慶囉...唉...
講完道理已經十點，我哋就要燒腩仔上床瞓覺，點知呢隻仔又再一次唔肯瞓，今次仲要玩到十二點幾添，好彩艾菲呢晚堅持唔陪佢瞓，否則艾菲肯定陪到著晒火，然後又係凌晨五點幾醒咗，去完洗手間唔肯瞓兼入房叫醒晒我哋，仲要一度體溫又燒到38.2度，如是者呢個情況持續到今日星期三，總算退燒可以畀佢返學，但願返到學校消耗吓D精力，今晚會好D等大家都有覺好瞓休息吓啦...
沒有留言:
張貼留言