重聚（8W）

屋企兩位男氏被病菌打低，連帶艾菲都有少許中招跡象，好彩14W之後D早孕期不適已經消退得八八九九，唔係就真係苦上加苦，暫時單靠意志力同休息都仲勉強照顧到自己同燒腩仔，最好唔使搞到睇醫生食藥啦，雖然都知醫生實會開啱艾菲食嘅藥，但可免真係則免，不過就搞到寫blog進度又拖慢咗...哇...艾菲仲有成堆嘢未blog㗎﹗

5/10/2015

繼續Day back返BB豆豬嘅嘢先，呢日我哋約好咗Dr Wong覆診，最主要係睇BB豆豬喺呢兩星期入面有無長大，不過上次已經照到BB豆豬有心跳，出現血絲嘅情況亦喺第二日已經停咗，所以呢兩星期艾菲都唔算好擔心（但仍然係有D忐忑不安咁啦）。

送咗燒腩仔上校車後，艾菲就先返屋企休息，順便等米高放工返來會合（放下午），一心諗住拍拖去學校接埋燒腩仔放學，再一齊去TST診所覆診，點知兩點左右忽然收到姑娘電話，話Dr Wong有個病人就來生得，黃昏嘅appointment要取消，佢叫艾菲一係改第二日，一係就提前四點半要到，千辛萬苦先等到呢日，艾菲當然唔想改期，但燒腩仔又四點半先放學喎，唔通叫米高去接仔，艾菲自己去覆診，咁咪白白錯過咗俾燒腩仔見BB豆豬嘅機會囉...

同米高商量咗陣，艾菲決定照要四點半嘅booking，心諗Dr Wong實遲到，然後就同米高兵分兩路，艾菲先去診所報到，米高就提前四點去學校接仔，同佢早退半個鐘再飛的出TST會合，結果時間真係啱啱好，去到診所仲要等多陣先有得見醫生。

其實今次唔係燒腩仔同Dr Wong嘅第一次重聚，艾菲生完佢之後嘅一次產後檢查，佢哋兩個都已經見過面，不過當時燒腩仔係全程瞓著，今次就大個仔同知咩事，事前艾菲都大概brief過燒腩仔入到房會點，佢都好乖好合作無扭計，只係見到Dr Wong時怕怕羞羞咁唔肯叫人，咁Dr Wong唔係特別鐘意小朋友，反應唔特別興奮都係艾菲預計之中嘅。

Dr Wong循例問吓艾菲近況就埋位照超聲波，BB豆豬好乖豬，又係Dr Wong一照就搵到佢，而佢嘅size亦有跟住周數大，只係相對size都係細少少，於是Dr Wong決定改遲少少個預產期，然後我哋一齊聽BB豆豬嘅心跳，嘻...今次艾菲無再喊啦，但都係覺得好感動，簡直係世界上最好聽嘅聲呀﹗

照完之後Dr Wong問我哋有無問題，米高就叫燒腩仔問返頭先照超聲波時佢問米高嘅問題，就係BB豆豬幾時出來啦，而Dr Wong就有D衰咁答燒腩仔，「你望都望佢遲D先出來啦，佢出咗來你就好慘㗎啦」（完全係艾菲預計中嘅答案，因為Dr Wong係個實際型嘅醫生，好少會講花巧嘢來氹你），唔...佢講嘅都係事實嘅一部分，但艾菲都係想畀D憧景燒腩仔先。

總結今次檢查，Dr Wong應該係知艾菲一直唔係好放心，所以就特別講咗句「一般來講夠八周又有心跳，我哋就當佢係穩定嘅case㗎啦」，臨走前Dr Wong都有同我哋介紹吓咩係Nifty同幾錢，但佢一聽到艾菲有去排政府醫院，就直接話政府宜家實有Oscar做，Nifty當聽吓參考吓就得，仲好好咁話Oscar已經有超聲照波，無咩事可以照完四星期後先再去佢到覆診，完全唔會為賺錢而要你密密覆診或氹你驗呢樣驗嗰樣。