之前都提過，艾菲近排私務繁忙，成日出咗去唔喺屋企，平日多數會叫燒腩仔爺爺嫲嫲過來幫手湊一陣，但到weekend湊仔呢個責任就好自然咁落咗喺米高身上，好彩燒腩仔都好肯跟米高，所以艾菲都好放心將個仔交畀佢，兩父子喺屋企作反極都有個譜，至少人生一定安全先嘛。
然後上個月中某個星期六，艾菲又臨時有事要出去忙，米高忽然喺星期五晚臨瞓前同艾菲講，想帶燒腩仔坐纜車去山頂再行落去HKU，吓？行山？咁認真？燒腩仔出名少爺兵來㗎喎...上次去大澳行兩步嘈一次飲水嘅記憶猶新，就算平日佢跟米高出去踢波，回程時都定必詐型話眼瞓扭計，米高係邊到來嘅膽量挑戰呢個仔呢？
艾菲起初以為米高只係講笑，敷衍佢叫佢諗清楚就瞓，點知第二朝佢真係好認真咁執嘢準備出發，咁...艾菲唯有祝佢好運，同循例提醒燒腩仔要合作，而最重要嘅係吩咐唔鐘意影相嘅米高影返幾張相畀艾菲望吓，確保佢哋兩父子一路平安啦，kakaka...
就係咁，佢兩父子好開心咁出發啦﹗而成個行程中艾菲覺得最富有挑戰嘅check point就係排隊等坐纜車，宜家平日等坐纜車條隊都長到嚇死人，更何況佢哋呢日係星期六，睇相都睇到燒腩仔等到呆晒，不過可能未坐過嘅關係，米高話佢都無點扭好合作，GOOD!
等咗一個鐘左右終於上到車，艾菲事後問返燒腩仔喺車到見到咩，佢話見到艾菲喎... >.<
一到埗，米高就帶咗燒腩仔入商場歎冷氣順便去洗手間，偶遇媽媽細個最鐘意玩嘅食鬼，但呢個仔明顯唔識欣賞啦﹗
過完冷河就要出發啦﹗仲識畀V字手喎﹗睇你一陣仲有無咁好氣﹗
由山頂行落HKU呢條路，艾菲細個都跟燒腩仔公公行過，對大人來講絕對係easy job，對小朋友呢...米高就話燒腩仔都OK，只係沿路落斜會拉住米高話唔好行咁快，可能真係得佢哋兩父子特別合作嘅關係，米高用糖同水氹吓燒腩仔都OK肯行，真係全程自己行兼好努力咁執樹葉交功課（咁啱個星期一要交樹葉返學校）。
話都無咁快就行到HKU，仲去咗爸爸當年上堂嘅課室門口參觀添﹗開心得佢呢﹗
呢張相終於破解咗燒腩仔點解咁合作之謎啦﹗皆因佢哋未出發，米高已經同佢講好，如果乖乖地自己行到HKU，就請佢去canteen食雞脾薯條，喺食垃圾食物方面米高係絕對講得出做得到㗎，仲畀埋茄汁佢慢慢點添﹗艾菲真係無眼睇﹗
佢哋歎埋下午茶，艾菲都差唔多夠鐘忙完，所以呢兩父子就收拾行裝，過返海接艾菲，不過呢個小朋友坐唔夠幾個地鐵站已經話眼瞓，難為米高行完山仲要抱住呢個人仔瞓，呢個爸爸真係巧強勁呢﹗今次唔畀返個叻叻手指佢點得呀﹗
沒有留言:
張貼留言