Mini生日會

消失咗成個十月咁滯，除咗顧住玩廚房個新玩具之外，其實主要係因為呢排私務繁忙，成日早出晚歸唔喺屋企，返到來又要招呼屋企個不合作運動忠實粉絲燒腩仔，晚晚惡戰連場之後再加埋自己身體上確實出咗D狀況（其實都無咩嘢，呢個遲D有機會再講），衡量過之後唯有暫時放棄blog務一排，但實情艾菲係有好多好多嘢想blog㗎﹗



(呢排D相唔知點解好暗，得閒要較吓部機先）

所以難得今朝俾燒腩仔激到爆血管個人勁精神，快手寫返之前好想寫嘅Mini生日會先，一如往年艾菲都係喺燒腩仔婆婆屋企搞，婆婆仲專登揀咗燒腩仔農曆生日嘅正日添，而有過上年淘寶遲出貨嘅經驗，今年未九月已經開始準備所有物資，今次主題係燒腩仔近期至愛《Cars》，雖然明顯唔係艾菲杯茶，但為搏個仔一笑，艾菲都盡量滿足佢。



因為預多咗時間訂，所以有部分裝飾可以加埋燒腩仔個英文名落去，出來效果都幾唔錯，但其實呢到係來自兩間唔同淘寶店嘅decoration，一間靚D有特色D可以印名亦貴D，於是慳媽艾菲訂咗必須嘅用品之後，就喺另一間買standard款嘅枱布同餐具，mix埋一齊完全唔覺。

而為咗生日會嘅兩個小朋友，艾菲仲專登訂咗兩頂生日帽同波波，另外仲搵咗N年前Ice媽媽送畀艾菲嘅狗仔汽球出來，但可能D汽球放得太耐，其中一隻狗仔有D漏氣，o...



呢日我哋一早就帶齊嘢返咗燒腩仔婆婆屋企，艾菲同米高負責搞布置，燒腩仔就負責幫手整至愛菠蘿腸仔，個樣都好似好認真咁㗎﹗



差唔多夠鐘就換定衫帶定生日帽同生日badge出來迎賓啦﹗



話咁快就有第一個客人到啦﹗表妹仔專登著咗條紗裙來參加呀﹗兩老表即刻來場波波大戰打來打去，但表妹仔好快已經畀電視吸走咗...



等埋姨婆婆一家同舅父到場就開餐啦﹗相中所見除咗燒腩仔公公整嘅蘿蔔糕，茶葉蛋，粟米同雞翼之外，其他全部來自Pizza Hut同KFC，本來艾菲都好想整返D小食或者DIY返D回禮禮物俾大家㗎，不過咁啱生日會前一日突然又有D私務要處理，最終只好投降棄權勁無誠意，好彩在場嘅全部都係自己人唔會介意。



食飽當然就係生日蛋糕出場嘅時候啦﹗為咗配合《Cars》嘅主題，艾菲專登喺美心訂咗呢個蛋糕畀燒腩仔，面頭兩架車仔係玩具來㗎，有蛋糕食又有車玩，啱晒燒腩仔﹗



燒腩仔：我3歲啦﹗哈哈哈...



承蒙大家嘅厚愛，除咗生日利是之外，燒腩仔仲收到好多生日禮物，而作為一個出晒名嘅車迷，幾乎九成嘅禮物都係車，呢個小朋友幸福到呢...屋企D車就來多到可以開車展啦﹗﹗﹗作為媽媽嘅艾菲只好做衰人將呢堆車扣起，留返佢之後乖先慢慢送出（之前聖誕節收嘅車到宜家都仲未玩晒呀﹗），同時要謹記呢一年都唔好再買車畀佢囉﹗>.<



既然講開上個月頭嘅Mini生日會，艾菲都不得不提上星期五嘅學校生日會，話晒都係燒腩仔人生入面第一次做學校生日會主角，艾菲作為媽媽點都要有D表示，於是特登抽咗一個下午出來，整咗應節嘅南瓜曲奇請佢D同學仔食，明顯自家製有D歪歪斜斜又大細眼，但點都叫做一份心意啦﹗:P



整好曲奇餅就用之前喺淘寶淘嘅包裝袋入好，再喺背面逐個貼上自製嘅name tag，雖然只係好簡單嘅手作仔，不過要pack成30份都好花心機呢，下年艾菲真係未必仲有呢份閒情，可能畀錢買D小禮物畀大家就算lu...



千辛萬苦整咗D曲奇餅出來，為免出意外都係由艾菲親自送返學校好，順便帶埋呢個小主角返學，佢事前已經連續問咗艾菲幾日「媽媽，你係唔係整曲奇餅請同學食呀」，上車後更加係死命咁拎實盒餅，見你咁緊張艾菲嘅辛苦總算無白費，hehe...



送完燒腩仔返學，艾菲做咗陣偽闊太喺附近慢歎個lunch，再四圍逛一輪又夠鐘接放學啦﹗一到課室門口就見到燒腩仔帶住呢頂毛毛生日帽（燒腩仔學校係間好有歷史嘅學校，估唔到連生日帽都跟足傳統，呵呵...），艾菲即時就聯想起米高細個都有一張帶住毛毛生日帽影嘅相，果然係兩父子呀，kakaka...