三歲啦﹗

Happy Birthday to me! Happy Birthday to me! Happy Birthday to me! Happy Birthday to me! 呼...講個秘密你哋聽吖，我上星期三已經足三歲啦﹗仲一連食咗四個生日蛋糕添呀﹗係唔係睇落都肥仔咗呢﹗



今年生日，因為要返學，所以爸爸媽媽無特別帶我去邊到威，只係前一晚喺屋企食定生日蛋糕，返學前同媽媽拍拖喺樓下餐廳食飯，同放學後等爸爸放工返來，去牛角喪食燒肉同玩的士咋﹗雖然無做過D咩，但我都好開心好滿足㗎啦﹗


呢個月我D胃口又回復正常，鐘意食嘅例牌勁食，唔鐘意食嘅就會食得勁慢，然後食唔夠半碗就同媽媽講「我夠啦唔食啦」，但係...講完呢句...通常都無咩好下場，媽媽一係就唔俾我食至愛嘅飯後果，一係就無好好味嘅果汁飲，最終我都係乖乖地食埋去，不過咁樣拖拖拉拉法，一餐飯又要搞成個鐘先食完。



至於瞓覺方面，自從返學取消咗晏覺之後，每晚九點半就上床瞓覺，通常十分鐘內都瞓著，不過第二朝七點幾就會醒，搞著趕住出門口返工嘅爸爸，好彩嘅係媽媽多數乜都聽唔到繼續瞓，仲成日勸爸爸唔好理我逼我自己瞓返，跟住我哋就各有各瞓到十點先起身食早餐，不過放假的話媽媽就多數會要我瞓返一個鐘晏覺，等我去街去得夜時唔好發忟，然後夜晚又可以遲返一個鐘先上床瞓覺。



活動能力都係咁上下，唔知係唔係轉咗學校，唔使再日日行長命樓梯，同埋跑跳嘅地方多咗，所以無再好似之前跌得咁密，宜家weekend夾到時間，仲會跟爸爸去踢波添﹗至於小肌肉方面，喺媽媽嘅特訓下，已經可以玩到細lego，媽媽最近仲淘咗D摞絲玩具畀我郁多D D手指呀﹗



認知能力越來越好，特別係對老師教嘅嘢好深印象，認字唱歌英文普通話都跟到，雖然宜家學校日日都有一樣功課做，但工作態度明顯比返N時積極，每日放學返來食完下午茶，就會自動自覺埋位做功課，通常十分鐘內搞得掂唔使媽媽勞氣，媽媽話除咗歸功於老師教得好之外，亦係因為我揸筆用力都進步咗（艾菲：相對之前D嘔血日子真係天同地比呀﹗）。

開始同同學仔混熟，每日放學返來都會話同咗邊個邊個同學仔玩，又會話邊個係佢好朋友，但有時都會投訴畀同學仔蝦，但媽媽問多兩句再問吓老師，就知我係吹水唔抹咀，宜家對表妹嘅態度友善咗，少咗郁手郁腳蝦佢，反而係調轉畀表妹搶返我D玩具轉頭。



自理能力都係咁上下，著衫除衫已經可以全部自己來，媽媽只需要擺好位畀我著就OK，至於戒片已經全面成功，媽媽同我出街會定時提我去廁所，但我堅決唔去都會由我，等我急到跳時後悔，佢講明唔會帶樽仔畀我周街去，濕咗就返屋企邊到都唔去，所以我點都一定會忍到入廁所先來爆發，不過夜晚都會繼續著片瞓以防萬一，媽媽話過埋呢個冬天就可以連夜晚都唔著啦﹗

把口繼續唔識收，由起身就講到瞓覺俾媽媽stop先識停，除咗識得駁咀講條件激到媽媽彈吓彈吓，仲開始會每事問，例如會問街上個叔叔坐喺到做乜（乞衣），又問點解個姐姐條褲爛咗（穿㝫牛仔褲），有時喺街到見到其他小朋友扭計又會懶叻咁話「我見到個愛哭公主呀」，搞到媽媽都唔知應該點答我好。


最後又講到情感發展，媽媽話我呢個月都係有D難搞，失驚無神就會發作為嘈而嘈，成日扭扭擰擰講反話，發脾氣又會有郁手想打人嘅動作，好多時佢想同我講道理，我就會大喊大叫或者話「唔講」「唔想」來耍佢走，但自從佢同老師傾完後，就同我講明機會只係得一次，我再唔答問題就乜都唔使傾唔使做，只可以去罰企或入房瞓，so far用咗呢招半個月左右，媽媽話總算無以前咁失控喎。