Music Wonderland@Tom Lee

一直都計劃等燒腩仔夠六歲，D手指仔發育好先開始教佢彈琴，但艾菲認同音樂感應該自小培養，所以前排都有留意過市面上一D音樂興趣班，其中Tom Lee個Yamaha紅蘋果課程，好似都幾似樣，所以都有去了解過，但同米高商量一輪後，覺得燒腩仔始終仲細，而且屋企附近都無開新班，決定睇定D再算，睇吓睇吓就過咗半年，艾菲都幾乎無咗件事，然後忽然有日收到email話有試堂優惠，見$50咁平就當去見識吓啦﹗



由於燒腩仔都接近三歲，所以我哋最終無同佢試到紅蘋果，而係試高一級嘅Music Wonderland，老師話呢個課程同紅蘋果最唔同之處係，小朋友可以坐喺電子琴前面，訓練佢哋坐定定守紀律，小朋友見到有琴彈當然好興奮咁不停拍啦（好彩部琴係無開power掣，唔係實嘈爆），不過張琴凳真係幾高，唔小心or坐唔定就會跌落來，所以一齊上堂嘅家長一定要小心睇實。

老師介紹完自己，又認識完同學仔後，就正式開始上堂，首先拎咗本圖書出來，叫小朋友睇入面有咩人物，再叫小朋友做動作同扮聲，例如扮獅子行路，扮小貓打鼓，除咗做動作，亦會畀小朋友拍琴鍵練節奏，而同一時間佢會播歌配合返。



之後嘅大半堂，其實都係做類似嘢，講故事播歌做動作，其中一part有畀小朋友開琴，拍吓琴鍵扮係私家車響安，可惜慢熱嘅燒腩仔，除咗拍琴鍵扮響安最投入外，其餘時間都係一副O咀樣，即明明都feel到佢係開心，但就係唔肯跟住一齊做動作，艾菲只好比佢表現得更投入來引導佢。

到落堂前，老師派咗個橙公仔做禮物，亦簡單介紹返個課程，之後就bye bye，完全無hard sell，而我哋當然係玩完就算無join到，皆因佢教嘅嘢無艾菲想像中咁厲害，基本上自己畀D心機同時間都一定教到，再加上我哋無考cert嘅升學壓力無必要為學而學，成個課程唯一最可取之處，就係唔會為適應怪獸家長而過早教小朋友用手指彈琴，呢樣嘢係艾菲對坊間某D為收生乜都得嘅琴行最反感嘅﹗