自從燒腩仔兩歲後，艾菲對佢嘅飲食放寬咗好多，間中都會畀佢食麥當勞...嘅...粟米杯，皆因佢唔食佢爸爸米高都要食（有次同同學仔媽咪講開，原來好多爸爸都係麥當勞fans來），後期進展到畀佢食麥芝蛋漢堡，再到近呢兩三個月艾菲竟然連漢堡包都畀佢食埋，仲要一食就愛上成日提住，有次同佢行過超市，佢死命咁拎住包芝士喊晒口話要買，向來唔縱容扭買嘢嘅艾菲當然無就範，但就估到佢其實唔係想要芝士，只係想食芝士包裝上面個漢堡包，所以就提出唔扭買嘢就整漢堡包佢食呢個offer。
為食嘅燒腩仔聽到有漢堡包食，當然即刻合作無再扭啦，不過就輪到艾菲煩買料，如果自己食的話好簡單，求其買個嘉頓漢堡包加急凍漢堡扒，翻熱漢堡扒再夾塊芝士就OK，但畀小朋友食始終想健康D，有菜有肉同盡量避開醃製品，所以就好神心咁決定自己用急凍雞柳整雞肉漢堡，同漏夜走去屋企附近嘅日式超市搵日本產可即食嘅蕃茄。
雞肉漢堡嘅造法艾菲係參考OL醉愛廚房嘅食譜，無跟足份量，亦純粹憑感覺調味，所有材料撈勻先加蛋，如果太濕就加多D麵包糠，然後造型同拎去煎，煎完喺麵包到搽上茄汁，按次序加入芝士，雞肉漢堡同蕃茄就搞掂，另外怕唔夠菜仲特登整埋南瓜薯蓉（唔怕熱氣可以整薯角添）。
全程喺廚房門口監視艾菲整雞肉漢堡嘅燒腩仔，見到呢碟home made開心樂園餐，都忍唔住嘩嘩聲咁叫出來，YEAH！I'm loving it!
一影完相就急不及待要開動啦﹗由於個雞肉漢堡係有一定厚度，所以佢要擘到獅子咁大個口先咬到﹗
而醒目嘅佢，咬咗兩啖發現都唔多咬到後，就決定逐層食啦﹗kakaka...
個包整到咁大個，仲有大半碗薯蓉嘅份量喺到，艾菲原先以為燒腩仔實食唔晒呢個餐，點知佢最後只係推咗四分一舊仔肉畀艾菲食之外，其他全部自己掃晒，仲問艾菲拎多塊蕃茄來就咁食添，清腸胃餓咗兩日之後，呢個小朋友嘅食量又變得好驚人啦﹗
沒有留言:
張貼留言