35個月

嘩﹗唔覺唔覺我就35個月大，仲有一個月就三歲啦﹗為咗隆重其事，媽媽仲專登買咗副超畀我去威戴，藍色撞黑色係我自己揀㗎，襯返我喺呢個夏天曬黑咗嘅膚色，大家覺得我型唔型呀？



呢個月我D腸胃又差咗，無端端喺一星期內嘔咗兩次，不過兩次都係嘔完就無事，唔使睇醫生食藥，但就畀媽媽勒令食兩日白粥清腸胃，結果我餓到半夜瞓唔著，喊住去隔離房求爸爸媽媽畀我食餅充饑呀陰公，自此以後我又變返大食怪，有咩都搶住食唔識停，食飯食得超快唔使媽媽勞氣（艾菲：今次又唔知keep到幾耐啦﹗）。

至於瞓覺就成日畀爸爸投訴，晚晚十點入房搞到十一點先瞓，但成日朝朝七點幾八點就起身，走過隔離房叫醒爸爸話去廁所（艾菲：通常凌晨五點前就係我負責嘅，但呢D鐘數我多數咩都聽唔到要米高搞:P），尤其爸爸放大假個星期，更加係日日準時叫醒佢，仲要去完廁所唔肯瞓返，搞到爸爸放假都無覺好瞓，要媽媽訓話一輪先好返少少肯上床瞓多陣，至於晏覺已經變得可瞓可不瞓，有時你叫我瞓我偏唔瞓，不過有時媽媽唔想畀我瞓，我行住街睇緊玩具都會扭爸爸抱我瞓。



活動能力嘅最大進步係，經過十堂幼兒水上安全班後，我終於接受到畀水淋同潛落水幾秒﹗行路時依然係一攰同唔專心就好易跌，去完健康院之後轉介咗我去醫院睇兒科，即管睇吓有無得做物理治療改善吓啦﹗上落樓梯跑跑跳跳都無咩問題，宜家識得跳飛機要單腳跳，至於小肌肉方面，喺媽媽嘅特訓下，扣鈕除鈕都叻咗好多啦﹗



認知能力越來越好，好多嘢一教就記得，尤其D英文單字，爸爸媽媽都不過係睇書見到先hea教吓，但我轉頭已經記得晒，仲真係可以舉一反三咁用返出來，亦開始認得D簡單嘅中文字，成日一見到就好緊張咁話畀媽媽知，數數都叻咗好多，喺媽媽嘅引導下（要keep住畀D提示佢諗下一個係咩），勉強可以由1數到100。



好鐘意同小朋友一齊玩，無論去公園定返學都會主動撩其他小朋友，仲會好快咁學埋人哋D唔乖嘢返來，同新同學相處暫時都好似幾OK（暫時仲未講到同學仔名，不過問親佢都話有同其他小朋友一齊玩），對表妹態度友善咗，有時仲會好肉緊，整親表妹都唔知，但就唔係次次肯讓D玩具畀表妹玩。



自理能力進步咗，著衫除衫繼續自己來，就算宜家新校服要著裇衫扣鈕除鈕都搞得掂，同時亦配合學校要求學識咗zip衫（艾菲：當然要幫手zip靚D先出得門口啦﹗），至於戒片可以話全面成功，無論日頭定夜晚，成個月都未出過一次意外，但媽媽話安全計都係夜晚繼續著住學習褲先（艾菲：初步打算睇埋冬天凍佢肯唔肯起身去廁所先戒），有時會扭計唔去，然後忍到最急先去，當然我要為自己嘅行為負責，就係急到跳舞咁跳住去搵廁所啦（佢一急到就來忍唔住就會不停跳 >.<）﹗



把口係完全唔識收，都不過係開咗學一星期，媽媽趁接放學時問老師我返學返成點，老師第一句就話我好多嘢講（艾菲：well...個語氣其實係讚賞佢投入同會主動講嘢嘅），就算喺屋企無人得閒同我講嘢，我都會自己同D玩具講㗎（有晒故事同唔同語氣），大人唔畀講嘅說話我會專登講多幾次，又會用教大人嘅口吻講：「我幫咗你喎，你快D唔該返我啦」（艾菲：實情係越幫越忙囉），而媽媽最不爽嘅係我終於學識駁咀，做錯事畀佢訓話中我都唔怕死夠膽駁佢，有次佢同我講想傾返件事，我好直接就應佢「我覺得唔使傾」，佢話瞓覺前唔好再飲水，我又會駁佢「爸爸話畀㗎」，激到媽媽彈吓彈吓。



最後又講到情感發展，媽媽話呢個月係大起大跌月，月初時係成日搵嘢扭，好鐘意講反話扭扭擰擰，少少嘢唔順我意就盡情尖叫大喊，又會意圖郁手推開媽媽（艾菲：最經典一次係掃跌我部iphone搞到mon都爆埋啦﹗），就算後期媽媽已經進展到唔理我，我仲會唔忿氣故意挑釁佢咁，特登叫得再大聲D，逼到佢發火開聲鬧我為止，不過自從媽媽有次好強硬咁表態，話佢知我搵嘢扭一定唔會讓步，我又開始好返少少，雖然仲係會keep住搵嘢扭同嘈，但只要媽媽堅持唔就範（艾菲：其實仲要加埋唔好再刺激佢），我就唔敢將行動升級尖叫（艾菲：至少戒咗尖叫先，都叫做進步好多㗎啦﹗）。

同上個月一樣，好嘅係清醒返之後會肯講道理，知道自己錯會乖乖地接受懲罰去罰企反省，會識得主動道歉認錯，同埋唔知係唔係始終轉咗學校新環境，最近都多咗要求媽媽攬，好彩媽媽多數都有求必應（艾菲：唯一會拒絕攬佢係佢扭緊計又點都唔肯認錯時），攬到我實一實再互錫一輪，搞到爸爸都話頂我哋唔住囉，kakaka...