Day 1 26/8/2015 (Wed)
第一日返學專登預早出門，同上次來註冊時一樣，因為有直車到學校，我哋唔使半個鐘已經返到去，學校好貼心咁，喺禮堂放晒D滑梯，搖搖船之類嘅大型玩具出來畀小朋友任玩，一入門口燒腩仔就畀車陣引咗埋去，好彩我哋早到唔使排隊就玩得，之後都勸咗佢一陣先肯去玩其他嘢，然後就到燒腩仔嘅同班同學妹豬隆重出場﹗我哋兩個媽媽勁興奮，即刻拉佢哋握握手做個好朋友，以後你哋就要互相照應啦﹗kakaka...
玩咗陣見差唔多夠鐘，就帶燒腩仔去洗手間再坐低準備開學禮，而米高就喺正式開始前撤退（通告寫明只可以一個家長陪，但有D家長就帶埋姐姐一齊陪...），所謂開學禮其實都無咩特別，只係校長簡單介紹吓學校，之後就輪到分組參觀課室同玩遊戲，我哋組先去玩玩具，燒腩仔好乖全程肯排隊又無爭嘢玩，仲識撩同學仔玩（不過人哋唔睬佢囉:P），玩彩虹傘時玩到勁hyper，睇到艾菲都好開心同放心。
到夠鐘就輪到我哋入課室參觀啦，小朋友要自己搵返自己個位坐，而媽媽最開心嘅除咗係燒腩仔真係大個仔，識得自己坐定定聽老師講嘢，就係妹豬居然同佢同組兼坐隔一個位咋，嘩﹗你兩個有緣到呢﹗大家坐定後老師就簡單介紹返學要注意嘅事項，講完就逐個派書包同禮物，女仔有Minnie換衫公仔，男仔有Thomas電動火車，開心死燒腩仔呢個車迷，一出課室門口就好威威咁跑去show畀喺出面等我哋放學嘅米高睇啦﹗
Day 2 27/8/2015 (Thu)
第二日返學繼續由艾菲陪燒腩仔，呢日一返到學校，車迷又畀車陣引咗埋去，但見後面排隊條龍越來越長，艾菲就拉燒腩仔走，玩滑梯同爬蟲蟲都一樣開心，到夠鐘就全部人一齊入禮堂坐定，原來呢日係玩集體遊戲。
我哋先玩唱歌做動作，再玩音樂傳球，一停音樂拎住指定顏色波嘅小朋友要出去台前答老師問題，之前返N返到hea吓hea吓嘅燒腩仔，係估你唔到咁投入，一直等出去答問題嘅機會，試咗三round後終於畀佢等到，老師一宣布咩顏色波嘅小朋友出台前，佢第一時間跑咗出去，好勇猛咁答問題全無怯場，實在係睇到艾菲眼都突，呢個真係我個仔？？？
之後學校安排咗切蛋糕儀式，個個小朋友見到蛋糕都嘩嘩聲勁開心，燒腩仔當然都唔例外啦，影相時艾菲仲驚佢會手多多篤個蛋糕添呀﹗臨走時老師又一人派一把扇仔做禮物，呢間學校真係好識捉住小朋友嘅心，等個個都返學返得開開心心，返到屋企同燒腩仔傾偈，佢仲用慘慘豬嘅聲同艾菲講「我唔捨得學校呀」，真係浮誇到有D頂佢唔住...
Day 3 28/8/2015 (Fri)
第三日家長可以同小朋友一齊試搭校車返學放學，其實艾菲從來都未坐過校車返學㗎，所以呢日艾菲同車迷燒腩仔一樣咁期待，一早就落去車站等車，而校車好準時就來到，保姆姨姨同司機叔叔都好nice，車上亦設有安全帶，坐完嘅感覺係令人安心嘅，燒腩仔亦全程淡定望街無扭，我哋接埋其他同車同學仔就返學校啦﹗
返到學校，燒腩仔又再一次迷失於車陣之中，到夠鐘入課室時，勸咗佢一輪先肯走，然後老師將同學仔分成兩組，我哋被安排先出去玩遊戲同影相，而燒腩仔嘅反應係再一次令艾菲感到驚喜，老師叫佢哋出去排隊，大家小朋友都仲猶豫緊時，燒腩仔見有一個同學仔出咗去，佢九秒九就拍凳跑出去做第二個，行動迅速同積極到艾菲難以置信，之後玩彩虹傘又係玩到勁hyper，到排隊等影親子合照時，仲突然主動拖住妹豬手示意一齊玩，呢吓真係笑到艾菲同妹豬媽肚痛呀﹗kakaka...
夠鐘我哋就被安排返課室模擬上堂，小朋友要先坐低聽老師講故事，再去洗手間洗手預備食茶點，見老師都會教佢哋唱茶點歌，講唔該多謝同叫人食嘢先准食，呢D都係艾菲平日好著重嘅嘢來，希望佢喺老師嘅訓練下會做得更好，而放學前老師又一人送咗枝牙刷畀佢哋，於是燒腩仔就笑晒口咁離開學校，同艾菲一齊坐校車返屋企啦﹗
臨落車前，艾菲問返燒腩仔今日返學開唔開心，佢當然例牌話好開心，但艾菲提到星期一要自己一個坐校車同上堂，佢就有少少變臉話要艾菲同佢一齊坐，艾菲即時同佢解釋點解要自己坐校車，而內心都不其然有少少擔心，唔通佢始終都難逃一喊？之前返N時爆喊同放學大發脾氣嘅情景再一次喺艾菲腦海中閃過...
Day 4 31/8/2015 (Mon)
呢日係真正嘅挑戰日，燒腩仔要自己一個坐校車同上堂，到底佢搞唔搞得掂，會唔會爆喊或者放學返來發脾氣呢？佢仲要星期日忽然胃仔唔舒服嘔過來，情況實在令人憂慮﹗而為咗令呢日順順利利，艾菲喺過去嘅weekend好努力咁同燒腩仔洗腦，不停brief佢坐校車嘅流程，亦多謝有心家長們send咗上午班落校車嘅直擊片段出來，等艾菲同燒腩仔可以更安心咁出發，然後我哋兩母子開開心心咁去車站等校車，校車一來燒腩仔即自動自覺跟保姆姨姨上車，坐定後仲好開心咁同艾菲揮手，見艾菲影相仲識做埋V字手勢添呀﹗
目送校車離開一刻，艾菲真係有D感動，但又未敢開心得太早住，皆因呢個仔絕對有可能有頭威無尾陣，所以返到屋企艾菲一直食唔安坐唔定咁，好彩有同樣擔心嘅妹豬媽一齊whatsapp傾吓，D時間先無咁難過，然後一睇到有家長報料話校車隊已經離開學校，即勁心急咁衝落樓等燒腩仔（明明係尾站，都唔知急D咩>.<），等到頸都長終於見到燒腩仔笑晒口咁返來，第一時間問佢坐車同返到學校有無喊，佢係好肯定咁答「無」，仲講到喺學校食咗咩茶點，上堂做咗咩畀艾菲知，經過一晚觀察後亦唔覺佢有特別情緒問題，YEAH﹗媽媽真心覺得你好叻仔呀﹗
Day 5 1/9/2015 (Tue)
為期四日嘅適應日已經完結，呢日學校正式開學，其他K2同K3嘅哥哥姐姐都會返學，艾菲前一晚都要brief定燒腩仔，不過見燒腩仔之前一日表現咁好，艾菲都唔怕佢會有咩事，呢日因為安排唔到校車接返學，所以艾菲要親自送佢返去，仲一心諗住返學校同佢影吓相留念，點知呢個仔實在太愛呢間學校，一入學校就拉艾菲行去課室，未行到課室門口就已經同艾菲講「bye bye媽媽」再一枝箭咁標入去，然後係頭也不回咁自己放書包同坐底玩，搞到企喺門外嘅艾菲連同佢揮個手講bye bye或者偷拍佢嘅機會都無...>.<
送咗佢返學之後艾菲就即刻趕返屋企做家務，等到夠鐘又準時落樓接校車，今次有個K2姐姐同佢一齊落車，而燒腩仔來遠見到艾菲，已經笑晒口咁同艾菲揮手，呢吓真係好warm好開心，然後兩母子有傾有講咁返屋企，燒腩仔除咗妹豬之外仲未講到其他同學仔嘅名，不過就講到班主任同另外兩個助教嘅名，亦可以好仔細咁講到喺學校發生咗咩事，睇佢講到眉飛識舞嘅樣，艾菲已經感受到佢有幾鐘意呢間學校。
Day 6 2/9/2015 (Wed)
呢日正式上課返三個鐘，對於艾菲同燒腩仔來講又係一個新體驗，仲要遇著燒腩仔又一朝早嘔到一床都係兼出門前食粥唔多合作，艾菲成朝忙到一頭煙咁，再趕頭趕命帶燒腩仔落樓等車，好彩有驚無險無遲到，但校車就因為落大雨塞車遲咗十分鐘來，所以上車時有少少混亂，燒腩仔都來唔切同艾菲講bye bye就畀保姆姨姨夾走咗，但好笑嘅係艾菲其實唔太介意，不過燒腩仔放學返來傾偈時就忽然爆咗句「我無bye bye你呀」，哈...原來佢係咁在意呢件事，艾菲即刻心都甜晒﹗
放學時校車又遲咗十五分鐘先到，不過見到燒腩仔來遠就笑晒口咁同艾菲揮手，等耐D都可以接受嘅（咁當然準時返來最好啦），然後有個八卦仔除咗講學校食咗咩茶點同學咗咩之外，開始識得講同學仔是非啦，講唔出同學仔名但講到有人賴vee，又話自己介紹咗吸印仔呢個遊戲畀妹豬，但妹豬唔肯同佢一齊玩喎... >.<
然後到夜晚陪瞓時，燒腩仔忽然問艾菲屋企有無小布豬，艾菲醒起佢本書入面個主角有隻小布豬帶住返學，就問佢係唔係老師今日講故事提過，佢話係仲話老師有隻好大嘅小布豬，所以艾菲就搵咗隻N年前喺麥當當換嘅豬仔出來畀佢，佢即刻開心到攬實隻豬係咁錫，瞓著咗都仲拎到實一實，哈...估唔到呢個仔真係有留心上堂聽老師講嘢㗎喎﹗
小總結：
總結返呢個星期嘅K1校園生活，艾菲係好感受到燒腩仔嘅投入，同以前返N班簡直判若兩人，每日放學都笑晒口咁話好開心，亦比之前返N時講到更多學校發生嘅事畀艾菲知，雖然so far都無收到老師嘅電話匯報，但單睇燒腩仔嘅表現，同親身了解完學校嘅硬件後，艾菲已經知道自己無揀錯學校，原來一間對嘅學校係有咁大嘅分別﹗
亦由於我哋宜家都係返下午班，喺生活習慣上同以前返N班無咩太大轉變，就算坐校車係尾站上車尾站落車，都只係早以前半個鐘出門口，返到屋企嘅時間更加係無變咁滯，但艾菲就多咗休息嘅時間，兼夾唔使日日行條長命樓梯四次，真係大人細路都心情開朗好多，燒腩仔無再日日放學搞事扭計，艾菲都覺得輕鬆D無咁大壓力，連親子關係都比之前好咗，攬攬錫錫多咗，就算佢扭計艾菲亦有心情試吓氹佢先，唔會再好似以前忟爆忍唔住鬧咗先﹗
沒有留言:
張貼留言