我哋坐巴士出發，去到觀塘碼頭落車，一落車就見到呢架載運油車過海嘅船，宜家呢D交通工具真係買少見少，難得見到當然即刻帶燒腩仔埋去見識吓，而本身係車迷嘅燒腩仔都好認真咁睇同聽我哋講解。
睇完船行咗五分鐘左右，我哋就到觀塘海濱長廊啦﹗擴建之後嘅海濱長廊，感覺係一望無際開揚咗好多，可以清楚望晒對面海嘅港島東，連每逢假日都逼爆草地嘅人群都分散咗。
以前來呢到，除咗睇日落同坐吓草地，其實已經無咩好做，但宜家就喺後面天橋底位置開咗個感官花園，入面D設施同出面一般遊樂場嘅好唔同，比較著仲搖擺，轉動同刺激唔同觸覺，都幾啱燒腩仔呢D感統比較差嘅小朋友喎﹗
一入去就會見到呢D同出面公園嘅款好唔一樣嘅搖搖馬，有單人雙人亦有多人坐上面搖嘅，不過對於燒腩仔來講，玩單人震動喺佢預計之中嘅已經係極限。
行過少少就會見到一個個搖搖腳踏，行到盡頭會有呢D兒童版健身器可以俾佢哋郁吓手仔，不過無論我哋點鼓勵燒腩仔，佢都係唔敢自己行個搖搖腳踏，只係肯直接行去個健身器到玩。
唯一最主動玩嘅就係跳飛機，跳完數字版再唱住ABC咁跳埋英文版。
燒腩仔：嘻...玩跳飛機我真係百跳不厭㗎﹗
跳完飛機見到有呢個會郁嘅單桿物體，我哋又拉佢去試吓，但佢唔係好識自己收埋對腳囉，所以都係玩唔到。
再行入少少會見到呢個瘋狂氹氹轉同搖搖板，點解艾菲會話係瘋狂版呢？皆因小朋友們都玩到high晒，搖搖板係彈到我哋睇見都唔敢畀燒腩仔坐落去玩，氹氹轉就有班哥哥姐姐好積極咁不停推，嚇到燒腩仔坐入去轉咗一圈就叫走。
繼續向前行會見到一排俾細少少嘅小朋友玩，專門刺激唔同感官嘅轉轉轉玩意，左邊個轉嘅時候係會有沙沙聲，右邊個就係彩虹色，呢D都係其他公園比較少見。
離開感官花園，已經係海濱長廊延伸部分，行行吓忽然見到中間有把遮嘅物體，我哋就好好奇咁行咗埋去，艾菲仲諗住叫燒腩仔企喺把遮下面影張相就算，點知有個十歲左右嘅哥哥仔跑過來親身示範，我哋先知呢把遮原來係畀人握實上面嘅扶手再轉㗎﹗哈...又幾得意喎﹗
玩完把遮之後，我哋就沿住海邊向牛頭角方向走，呢邊嘅草地比原先嘅仲要大同靚，再加埋秋天嘅涼風，喺到野餐應該都幾唔錯﹗
難得有咁大片草地，又有個咸蛋黃射埋來，梗係爭取機會同燒腩仔影吓相，不過呢日艾菲唔係好捕捉到靚嘅角度，燒腩仔亦有D嫌坐草地污糟唔太合作，再加上佢件衫撞晒色，所以影出來D相都唔太滿意。
影人唔OK就轉影日落啦﹗如果有時間慢慢喺到等個太陽再落低D，影出來嘅效果應該會靚好多﹗
而公園設計者都好貼心，喺尾段對正太陽落山嘅位置起咗幾個暸望台，俾人喺上面欣賞日落，現場所見就已經有班龍友set定腳架喺到等啦﹗
去到最尾位置就見到呢個裝置，似乎係想同原先個地標做個首尾呼應咁，唔知夜晚著咗燈之後係唔係都一樣咁靚呢？
沒有留言:
張貼留言