我哋坐地鐵出發，喺筲簧灣站行過去，大概十五分鐘左右就到，未入場買飛，已經見到門口擺咗枝大炮同幾部軍車，即刻帶車迷燒腩仔過去研究吓。
買完飛就坐電梯上咗八樓，其實艾菲想當年仲係學生時來過一次，知道呢到有分室內同室外展館，室內展覽廳就係有帳蓬嘅位置，其餘室外嘅展品就佈滿成個山頭。
一出電梯就見到大大個酷熱天氣警告牌，不過艾菲係有備而來嘅，芭蕉扇同遮當然係必備，前一日仲喺東薈城買咗頂新漁夫帽畀燒腩仔。
上到去啱啱好係中午食飯時間，本身有諗過喺東大街食埋魚蛋粉先去，但知道博物館有社企餐廳，而openrice食評都唔差，就決定幫襯社企，餐廳地方唔係好大，不過環境幾舒服，唔知係唔係位置偏僻，居然一個人都無畀我哋包場食飯。
畀燒腩仔揀食咩，佢話食包我哋就叫咗呢個厚多士畀佢，點知佢食完D菠蘿就唔願食，搞咗好耐先食到半塊，但實情係味道唔差㗎，至於米高同艾菲就分別叫咗個炒烏冬同出前一丁常餐，質素都OK。
食飽就開始參觀，正午時份就梗係留喺室內展覽廳涼陣冷氣先啦﹗
米高好認真咁睇展品，燒腩仔都好認真咁研究呢個電話㗎，kakaka...
博物館嘅所在地其實係想當年嘅軍事重地，室內展覽廳正正係當日嘅鯉魚門堡壘，所以場內嘅展廳同通道，都好有歷史嘅味道。
行完第一層嘅展廳，就上咗樓上玩，睇咗個關於海防武器嘅片，燒腩仔似明非明咁，唔知入咗幾多落腦。
除咗影相同睇片，仲可以畫吓畫同睇一D關於戰爭嘅圖書，艾菲亦剩機灌輸咗D反戰思想畀燒腩仔。
之後就開始行古跡徑睇室外嘅展品，主要都係一D大炮，左邊係比較新式嘅隱沒大炮，右邊就係古時要靠滑輪移動嘅大炮，而車迷燒腩仔就只著眼於幾個滑輪，企定定研究咗陣就問艾菲「係唔係可以郁」，到我哋答係就話「我想推佢」，聽到企隔離位保安姨姨都忍唔住笑。
睇完大炮，亦可以行落一D溝堡到參觀，有分三個唔同方向，不過入面其實係大同小異。
睇完山上面嘅展品，我哋就沿路行落山腰，雖則話係行山，實情只係行石屎路，又闊又好行，對於無行開山嘅我哋來講都好OK。
落到山腰就見到呢D軍營殘蹟。
望過對面海會見到鯉魚門，平時喺鯉魚門望過來就望得多，今次調轉由呢邊望返過去，最大發現係乜當年影婚紗相時行咗咁遠㗎？（由圖中間嘅大廈群，一直行到去右邊最盡嘅石礦場）
本來沿住山路落去就走得，但艾菲行行吓見到有條樓梯落海邊，對正避風塘好似幾靚咁，就拉咗米高同燒腩仔行落去，原來下面有個魚雷發射站，同放咗添馬艦嘅錨喺到。
上返樓梯行落山腳我哋就離開博物館，臨走前影返張到此一遊相先﹗
難得過海，梗係唔會去完博物館就走， 我哋沿路行返出去筲簧灣電車總站，坐燒腩仔好鐘意嘅叮叮。
有得望風景望車，燒腩仔不知幾enjoy，邊個話叮叮無保留價值㗎？？？
其實行完博物館，燒腩仔D電力都用得七七八八，仲誇張到拎住粒珍寶珠同我哋講無力食，不過我哋落車後其實仲要沿西灣河海濱公園行一段路先到下一站，艾菲唯有呃呃氹氹咁叫佢跟D哥哥姐姐跑同行花叢邊當行平衡木。
行咗成廿分鐘，終於來到下一站葛量洪號滅火輪，一心影完呢張相就入去參觀，點知...行到埋去入口先發現...是...日...休...館...O...原來逢星期二休館，只怪艾菲無查清楚就來...
咁辛苦行到過來先話無得入去睇，燒腩仔當然即時發難扭計啦，但嘈完一輪過天橋去到鰂魚涌公園，見有得玩就好快無事啦，呼...
沒有留言:
張貼留言