今次再臨，雖然正值暑假，但畢竟都係星期一，人流明顯無上次咁瘋狂，我哋喺東涌等咗十分鐘巴士就上到車（上次紅假去係等咗足足兩個鐘呀﹗），去到先搵返上次間抵食茶餐廳醫肚，然後就出發四圍逛，燒腩仔仲心情大靚，平日咩手飾都唔願帶嘅佢，竟然主動搶艾菲副太陽眼鏡去帶，好﹗就等媽媽遲D搵返副小朋友超畀你型仔吓啦﹗
平日來好多鋪頭都無開，不過真心行得好舒服，至少可以逐間鋪頭入去望吓，咁先似遠離煩囂嘅大澳㗎嘛﹗
逛咗陣我哋就過橋去另一邊行，呢個影相位當然要影返張到此一遊相啦，背景終於唔係人同人，真係同上次來差好遠，而大家可以留意吓燒腩仔手上已經拎住咗佢呢日嘅戰利品吹波膠﹗
就係知呢個仔怕熱又識揀人蝦，為免佢扭米高抱麻麻煩煩咁，專登喺士多買定呢枝歷史悠久嘅吹波膠，氹佢行到去古廟到先畀佢玩，第一次玩嘅佢當然唔識吹啦，但見到我哋唔知點解吹到個波出來都覺得好過癮。
今次終於記得放相機入袋嘅艾菲，梗係要影返D靚靚風景相來留念啦﹗
可惜呢位小朋友係有頭威無尾陣，沿路行返出去時已經扭抱扭到癲，行唔夠兩步就話要停低飲水，呢日天氣已經熱到不得之了，仲要係咁同佢拉拉扯扯真係好攞命，終於米高應承行返出去買枝汁汁過佢歎先好少少，然後就買咗艾菲至愛紫貝天葵畀佢，第一次飲嘅佢仲話呢枝係士多啤梨汁來添﹗kakaka...
之後我哋向住大澳文物酒店嘅方向行，沿路燒腩仔又不停扭飲紫貝天葵（佢目的係要成枝清晒），唔畀就不停製造煩音來轟炸我哋，煩到米高都忍唔住話佢係少爺兵唔捱得，艾菲就索性唔理佢只係專心影風景。
有圖有真相，少爺兵無論係去到上次好興奮嘅郵局定紅樹林，都只係顧住枝紫貝天葵，叫佢埋位影張相都係屎臉交差就算。
千辛萬苦先氹到少爺兵行上去大澳文物酒店，但枝紫貝天葵已經所餘無幾，回程點算好呢？
好彩行咗陣，就聽到遠處傳來越來越近嘅直昇機聲，原來有病人需要出市區醫院，要坐政府飛行服務隊嘅直昇機，來遠睇住架直昇機降落，估佢應該未有咁快走，我哋即氹燒腩仔返出去睇。
然後燒腩仔好興奮咁同我哋一齊跑出去球場睇直昇機（段路都OK遠㗎），講真艾菲咁大個都係第一次咁近距離睇直昇機升降咋，呢個特備節目真係來得合時﹗
喺暴曬下睇完直昇機，我哋一家三口都熱到溶咁滯，不過見燒腩仔睇完直昇機好似醒神咗，艾菲就膽粗粗咁提議過返橋，食N年前跟公司遊昂平360時導遊介紹嘅車站豆腐花（直昇機出現前，米高為免燒腩仔扭，係話求其搵間坐低食就算），味道好不在講，最重要係有冷氣有位坐嘛。
食完豆腐花再買埋蝦乾，我哋就起程返出東涌，仲去東薈城睇埋日落添，呢日夠晒圓滿啦﹗
後記：
事隔幾日後，有晚我哋返燒腩仔爺爺嫲嫲屋企食飯，燒腩仔爺爺問燒腩仔去大澳好唔好玩時，燒腩仔居然話佢有「少爺冰」食囉，原來佢一直以為米高話佢嘅少爺兵係食得，真係估佢唔到呀﹗ :P
沒有留言:
張貼留言