呢個小朋友，臨出門口又扭計，結果搞到艾菲再一次遲大到 >.<，去到艾菲仲四圍望緊大家去咗邊之際，燒腩仔已經飛奔咗去南瓜仔同南瓜妹身邊，哈...證明佢上次出來係有認住佢D朋友仔㗎﹗
等齊人我哋就埋去玩水啦﹗燒腩仔玩慣玩熟，一埋位就玩到成身濕晒﹗
而佢今次亦終於有新玩法，就係用腳去踩D水柱，仲keep住呢個姿勢勁耐唔郁添﹗
由於燒腩仔玩來玩去都係用腳踩實唔郁呢招，今次又有米高幫手搖距監控，艾菲可以好放心咁四圍捕獲其他小朋友，其中以Little K呢張艾菲最鐘意，呢種咁純真嘅笑容，睇見都不其言跟住笑﹗
仲有呢張艾菲都好鐘意，好感受到妹豬爸同妹豬之間嘅信任同親密，好sweet呀﹗
玩完水換過件衫，大家都開始冷靜落來，最好當然係影大合照啦﹗今次陣容強大咗好多，亦熱鬧咗好多，但喺一眾家長嘅合作下，都好快手就影完，讚﹗（艾菲部機唔夠wide，要借寶品媽張相一用）
影完合照大家就四散啦﹗唔知男仔係唔係電力特別充足㗎呢？當大家都開始靜落來時，龍BB，南瓜仔，巨龍同燒腩仔仲可以拎住波不停圍圈跑﹗
之後見到一仔枝泡泡槍又搶住要拎來玩。
後來仲畀佢發現咗呢個車迷陣地，成班車迷圍晒喺張凳到玩車，驟眼睇係激似平時公園D阿伯圍埋捉棋咁，分別只在於人哋班阿伯捉棋佢哋班細路玩車囉，kakaka...
瘋狂車迷玩「撞車」玩到咔咔聲，龍B媽喺側邊勸佢哋唔好撞佢哋偏要撞，唔知有無嚇親一齊玩嘅Little K同肚B呢？嘻...
玩到差唔多，艾菲就喺車迷堆中活捉咗燒腩仔出來，等佢同新同學仔妹豬認識吓影返張相先﹗
1. 燒腩仔：咩事呀？又捉我哋兩個一齊影相...
妹豬：唔使怕，我望右你望左，佢哋奈我哋唔何﹗
2. 燒腩仔：媽媽話影相要笑呀，你笑吓等我好交差啦，嘻...
妹豬：哦...嘻...見係你咋...
3. 妹豬：咁得未呀？
燒腩仔：做埋V字手啦，佢哋會滿意D㗎﹗
4. 妹豬：係唔係咁呀？雙V，型晒﹗
燒腩仔：唔...你型到我都無眼睇啦﹗
臨走見到Anki同媽媽喺草地前影相，燒腩仔又走咗埋去一齊影，呢張影到佢兩個好似跳緊舞咁，好cute呀﹗
後來大家都爭取最後機會，喺草地到追追逐逐玩多一分鐘得一分鐘，真係玩得好開心好盡慶呀﹗
沒有留言:
張貼留言