reminder講明要早15分鐘到，怕遇上塞車我哋都早咗出發，去到見仲有時間剩就入咗反斗城逛，燒腩仔例牌行到車區即著晒迷咁企喺到逐架研究，然後有個慈父突然開聲話要送盒迷你工程車畀個仔﹗OMG!!! 明明屋企已經多車到玩唔晒，艾菲都講過如非必要唔好再買車畀佢，但慈父話個仔N班畢業好叻仔，想送樣嘢畀佢喎...咁你都講咗出口又點會收得返吖，燒腩仔聽見即好開心咁拎實唔放，艾菲無奈下都畀佢哋買咗呢盒車走。
等到夠鐘我哋就去登記拎飛，再去安全城門口排隊等候，見前一班小朋友未玩完，艾菲就剩機畀燒腩仔企側邊望吓，順便brief吓佢一陣嘅流程，提佢要合作聽姐姐話。
入口到放咗架BMW電動車，車迷見到即衝埋去話要影相，仲話一陣要揸呢架車添﹗
夠鐘D姐姐就出來同小朋友度體溫，然後帶佢哋入去坐定上堂學交通規則，估唔到燒腩仔都幾專心喎，艾菲聽到佢有認真回答姐姐嘅問題㗎﹗
之後要睇條片再答問題，燒腩仔都係估你唔到咁專心。
上完堂就去扮行人，跟住姐姐一齊睇交通燈過馬路啦﹗
姐姐帶佢哋來回行咗三次，到最後一次燒腩仔已經識自己睇交通燈過馬路啦﹗
做完路人甲就輪到扮司機揸車，不過呢個司機勁多嘢講，自己架車都未顧掂，仲走去同哥哥學是非，話前面架車撞到再前面架車，真係聽到艾菲滴晒汗...
玩咗N咁多個圈之後，姐姐叫停就停超合作，好乖咁駛返架車去停車場。
正當艾菲同米高滿心歡喜，想讚燒腩仔乖仔，無扭計唔走嘅時候，佢就因為手上呢張證書衰收尾...
話說玩完之後，艾菲巡例叫佢拎住證書影返張相，點知有位同組媽媽，一早就霸住個中間靚位狂影，燒腩仔見到人哋坐喺車仔到影又想跟風，但燒腩仔都未衝到埋去，呢位小朋友已經妙咀兼出手作狀打人，艾菲當然識趣拉走燒腩仔，叫佢企側邊影就算，不過燒腩仔可能心有不甘，所以全程唔係望住呢個小朋友，就係故意擰歪面唔畀艾菲影，影到艾菲無癮叫走，佢即唔忿氣爆喊兼大叫，終於要米高夾硬抱佢離開現場，訓話咗一輪先冷靜落來。
同佢講完一輪道理，見佢真係清醒返知錯，為免掃慶我哋就繼續行程，去返之前登記個位玩填色。
平時叫親燒腩仔填色，佢都苦口苦面無心機油，但唔知係唔係早幾日畀老師讚完，再加上同枱有另一個小朋友一齊油，喺朋輩嘅影響吓佢竟然肯認真油，幾次艾菲問佢得未，佢都話未油完要我哋畀多D時間佢繼續，難得你咁好雅興，媽媽實奉陪到底。
填完色就叫佢埋去拎住道具牌影相，不過又係唔多合作故意擰歪面囉...
反而呢架來登記時已經睇中嘅真車，就明顯好合作仲做晒V字手勢畀艾菲影。
臨走前like埋BMW嘅facebook page，就可以拎呢架紙板模型車返屋企啦，都幾實淨同靚仔㗎﹗
玩完見差唔多時間，就去food court食晚飯，之後帶咗燒腩仔去page one睇書。
自從自由人攻陷海港城後，我哋都好耐無來呢到行街，對上一次係農曆新年時同米高拍拖路過呢到，發現新開嘅page one變得好大好舒服，特別係童書區人流唔多，又有位畀你打書釘，感覺舒服過誠品好多，所以今次都專登帶燒腩仔上來洗滌心靈，先用《小雞去露營》來氹佢坐定，再慢慢同佢講《愛哭公主》，然後佢好似知艾菲講咩咁，有D唔好意思嘅樣，跟住艾菲就叫佢一齊背愛哭公主嘅不哭咒語，呢幾日佢一想扭計時，艾菲就唸一次咒語佢聽，或者問佢係唔係愛哭公主又來探佢，so far都有D效用喎，睇來下次出開旺角要買返本返來鎮宅先得啦﹗
沒有留言:
張貼留言