再見我的N班生涯

燒腩仔嘅N班生涯終於喺上星期五正式完結，諗返初初返學時未適應日日喊住返學，再持續幾個月日日放學喺呢條多人兼極斜嘅長命樓梯到拉拉扯扯，真係一殼眼淚永世難忘，曾經諗過退學唔讀嘅艾菲，完全無諗過我哋兩母子最終可以捱晒兩個學期。

燒腩仔讀呢間學校，性質似托兒所咁只放紅假，就連暑假都只放一星期，對在職父母來講係相當之好（K1-K3仲只得全日班），個人自理會比較著重，但學術方面就唔好抱太大期望，老師們都算有愛心，不過可能工作繁重嘅關係，間中會出現甩甩漏漏，亦唔會有時間幫你教仔，就算艾菲日日親自接放學，都唔係幾同到佢班主任講到D咩（更加唔好旨意會有主動打電話來報告啦），不過勝在有駐校社工，燒腩仔就全靠佢幫忙先成功揻甩摞地呢鋪癮。

睇住燒腩仔由一個乜都唔識嘅BB，到返學後開始識得同同學仔相處，知道要守規矩聽老師話，到後期學識照顧自己，亦開始講到學校嘅點點滴滴，直至近半年開始enjoy返學，又記得老師教過嘅嘢，仲會咀gel gel咁同老師講同學嘅是非，艾菲呢11個月以來嘅淚水同汗水總算無白流。



來到最後一日，艾菲都想送返D嘢畀老師表達謝意，同燒腩仔商議過後，我哋決定親手做張thank you card畀老師們，不過艾菲只係一個Art拎D嘅媽媽，要喺有限時間同資源下完成呢個任務確係有D難度，好彩喺學校做過心意卡畀老師嘅燒腩仔，聽見張卡係做畀老師就即時配合無扭扭擰擰，否則張卡分分鐘過咗last day都未送得出。>.<

呢日燒腩仔其實都有D情緒，可能有少少唔捨得掛，返學時撞到米高朋友仲剩機喊咗出來，好彩返到學校又好快無事，等到放學艾菲就帶埋疊thank you card去接放學，呢隻仔一見到即搶住送畀老師，不過遞完畀老師就調頭走，連叫佢同老師傾吓偈都唔肯，直至派晒全部卡先肯乖乖企定，同校長老師傾兩句影返張相留念，睇來男仔就係咁無心肝，希望你唔好轉頭就唔記得呢一年以來老師們對你嘅愛啦﹗