為咗令燒腩仔keep住閱讀嘅熱情，艾菲都唔敢怠慢，成日去圖書館借書畀佢睇，亦好快已經摸索到佢嘅喜好，車同畫靚字少嘅無厘頭故事絕對係佢杯茶，其中竹下文子一系列關於車，同長谷川義史嘅繪本佢都好鐘意，偏偏呢D熱門書喺圖書館嘅書架上係特別難搵到，好彩圖書館仲有$2.5一本嘅預約服務，上網或者用圖書館app搵本書出來，㩒個制就hold到，收到email即可以去圖書館拎書，無人跟尾hold的話可以睇足十星期，實在係超級方便﹗
既然預約服務咁方便，艾菲當然用盡佢啦，一口氣將之前好想借但搵唔到嘅書hold晒返來，《小豬別哭啦》同《爸爸別急著說晚安》係上網見有人介紹故事又幾啱燒腩仔而借，《便便》就係之前喺書局打書釘睇過覺得幾有意思而借，至於《小雞逛超市》同《小雞過生日》就係朝聖心態，想睇吓呢系列嘅書到底有咩咁吸引而借，點知燒腩仔真係一睇就愛上，本《小雞逛超市》因為後面有人hold，只睇兩星期就還咗，但燒腩仔居然好記得內容，之後同佢睇書見到類似超市嘅畫面，即刻話係小雞個超市，本《小雞過生日》更加係睇到背得出內容，所以上次去台灣就決定買成套《小雞幸福書包》返來畀佢慢慢睇。
除咗自己去圖書館借書畀燒腩仔睇，艾菲都希望做到抽時間帶燒腩仔去圖書館睇書，不過多數要等到weekend米高放假先去到，所以書架上通常都已經無咩書好揀，最終揀咗呢四本，除咗《你最愛誰》嘅回看率比較高之外，其餘三本佢都無乜興趣。
自從開始咗去圖書館借書嘅習慣後，艾菲出街見到圖書館都會入去尋吓寶，有次去開黃大仙處理私務，臨走時見到個好細嘅圖書館，就貪得意走入去逛，然後畀艾菲發現呢到嘅兒童圖書書架係整齊到喊﹗好多平時無可能喺圖書館搵到嘅書，呢到都有兼齊全（特別係英文書），可惜當日艾菲無帶燒腩仔張圖書證喺身，所以只可以用自己圖書證僅餘嘅兩個quota，借咗工藤紀子（小雞系列作者）嘅《野貓軍團烤麵包》（呢本真係無諗過唔hold都借到），同埋五味太朗嘅《一起來玩吧》， 兩本都新淨到你唔信﹗
由於知道之後個星期會再去黃大仙處理私務，所以出發前專登還晒燒腩仔張圖書證嘅書，free返八個quota出來，再去黃大仙圖書館揀書，揀吓揀吓艾菲就開始懷疑呢個圖書館應該無乜小朋友來，皆因上星期target咗嘅五味太郎《捉迷藏捉迷藏》同《Cars》居然原封不動咁無畀人借到，仲要畀艾菲搵到本從來未喺圖書館見過嘅Peppa Pig硬皮書﹗而左上本《糖果牙齒》，艾菲誠意推介畀所有鐘意食糖，同唔鐘意刷牙嘅小朋友媽咪，皆因燒腩仔自從睇完呢本書後，就無再扭唔刷牙，艾菲一問佢係唔係想好似鱷魚仔咁剥晒D牙，佢都唔會再扭食糖扭得咁勁。
一張圖書證可以借八本書，艾菲同燒腩仔兩張證加埋就可以借足十六本，當我哋用盡兩個人嘅quota時，屋企就會棟咗一堆睇極唔完嘅圖書喺到，所以見睇到咁上下艾菲就還咗部分燒腩仔唔太有興趣嘅書去， 明明諗住等睇埋其他書先再借，但去到圖書館就忍唔住想尋吓寶，結果又畀艾菲搵到本之前好想買嘅小樹苗《我最愛的知識圖典場所篇》同教英文字母嘅《Alphabet Trucks》，雖然用字比較深但燒腩仔喺米高嘅講解下都睇得津津有味，另外仲喺CD堆中畀艾菲搵到隻 Disney CD（不過圖書館D CD絕大多數都花晒，艾菲都花咗唔少時間先copy到落電腦到聽），同樣深得燒腩仔歡心呢﹗
七月初去完旅行返來之後，艾菲如常趁燒腩仔返咗學就去屋企附近嘅圖書館揀書，但呢次去完之後就決定等九月開咗學先會再去，皆因暑假期間嘅圖書館除咗嘈到似街市，書架更加係亂到嚇親人，小朋友們睇完書好隨手咁放埋一邊就算，基本上係連想逐個架睇書名搵書都唔可能做到，所以求其揀幾本就走，燒腩仔除咗對五味太郎本《我說過了啊》同《小氣貓咪咪》比較感興趣外，其他反應都係好一般。
圖書館亂到揀唔到書來借，即又係用預約服務嘅時候，之前喺書展睇過五味太郎嘅《數字在哪裡》，艾菲覺得燒腩仔應該會鐘意，但又估佢唔會睇得耐，所以就放低無買決定去圖書館借，至於長谷川義史嘅《肚臍的洞洞》就係上網見媽媽介紹，順手又hold返來見識吓，不過燒腩仔似乎唔係太睇得明咁喎。
屋企附近圖書館被攻陷去唔到，趁上星期請咗日病假去健康院，檢查完我哋兩母子就坐巴士去中央圖書館睇書兼等米高收工，呢日嘅中央圖書館居然無想像中咁多人，D書仲要執得幾整齊喎，而事隔幾個月再帶燒腩仔去圖書館，明顯大個仔咗識得去到圖書館要安靜（應該係學校有教，但佢依然有D位會失控大叫同亂跑），仲自己行去書櫃拎咗成棟書畀艾菲講佢聽（幾乎講到艾菲失聲﹗），臨走前艾菲仲快手借咗四本書，由於呢排想斷練多D佢嘅腦力，兩本100人系列就好啱佢，一見佢心情好就拎出來畀佢玩（要好有耐性同專注先會肯玩），《我最愛的知識圖典節慶篇》就純粹當常識咁教吓佢，至於本《好多好多車》以為會好啱車迷嘅燒腩仔啦，點知內文花到艾菲都無乜心機睇，反而之前喺學校借本《前面還有甚麼車》仲吸引囉﹗
開卷有益：
第一回
沒有留言:
張貼留言