34個月

Hi! Hi!又到我一個月出場一次嘅時候啦﹗我話咁快就34個月大，媽媽話仲有兩個月我就足三歲，而仲有半個月我就會正式升K1，我好快就變大個仔啦﹗



呢個月肚仔無再唔舒服，食方面叫做正常咗，但無再好似細個時咁拆得，每餐食到一碗飯連餸，多數食到尾都無心機，成日食晒D餸唔食飯，要爸爸媽媽出盡法寶氹先肯食埋佢，不過有個突破就係終於肯用手食雞翼，以前一拎上手就會嫌污嘈，要爸爸拆肉畀我先肯食，宜家可以自己食到得返兩條骨好乾淨啦﹗



瞓覺方面嘅最大轉變，就係媽媽終於的起心肝加插睡前說故事時間，我每晚可以自己揀兩本書入房畀媽媽講（其中一本一定係小雞系列>.<），對於呢個安排我超級滿意，仲成日聽完一次要媽媽再講多幾次，直至媽媽講到口水乾堅持唔再講先肯去瞓，大概十點半熄房燈，通常都碌到十一點幾先瞓到，然後第二朝九點左右就會自己醒，至於晏覺都係keep住放學返來瞓一個鐘左右，有時有街去有嘢玩可以唔瞓，不過大人就要忍受一陣扭眼瞓發癲時間我先會正常返。



活動能力無特別進展， 行路時依然係一攰就好易跌，媽媽已經同我約咗期返健康院跟進，希望醫生姑娘會有D好建議幫到我啦﹗上落樓梯跑跑跳跳都無咩問題，去公園玩時始終唔太願意玩要攀爬或者搖嘅玩意，但爸爸媽媽帶住的話都勉強完成到，至於小肌肉方面，依然係要多加練習，填色畫線畫圓圈都比之前smooth咗。



認知能力越來越好，好記得學校英文老師教嘅英文單字（特別係同車有關嘅字），亦識得自己將佢哋翻譯返做中文，睇咗《我自己會讀》嘅書幾次後，都開始慢慢認得D中文字，同埋終於識得慢慢指住D嘢來數數，認數字越來越快同準，出街認巴士號碼已經好少出錯。



空間感keep住有進步，終於識得玩簡單嘅迷宮遊戲，砌砌圖亦砌得越來越快，砌LEGO都開始有板有眼，同埋開始會自己創作故事來自己同自己玩，成日拎住D車或者煮飯仔來一人飾演多角。



好鐘意同小朋友一齊玩，去到公園會主動撩其他小朋友，亦會專登做D唔啱嘅行為來引人注意，同同學仔相處好咗， 少咗出口話人，亦對表妹態度友善返，雖然都係專搶表妹D玩具，但間中又會好似哥哥咁帶住表妹玩。

自理能力keep住，著衫除衫全部都係自己來，媽媽只需將D衫分好前後放喺到，同除衫時幫我手一齊反起件衫，我就可以自己搞掂，至於potty training就忽然有少少退步，有兩個星期keep住喺學校賴vee（喺屋企同去街又無事㗎喎），不過喺媽媽同老師嘅努力下，我又好快回復返正常啦，瞓覺片媽媽話仲未敢同我戒（整濕床褥好大獲﹗），但我宜家都多咗自己行出房搵爸爸媽媽話要去廁所㗎啦，媽媽話再穩定D就可以正式戒埋佢。



把口除咗唔識收，同好鐘意亂咁學人講嘢之外，仲成日好似「浪」過油咁四圍氹人，媽媽話要記低佢，等大家唔好咁容易受騙喎...

事例一：

某日只得我同姨媽兩人拖住手行街時

燒腩仔：件衫真係好靚呀﹗（浮誇tone）
姨媽：係？咁你記唔記得你著緊件衫係我送？
燒腩仔：記得呀﹗之前喺電話講咗多謝啦﹗
姨媽：咁你鐘意就著多D啦﹗（滿足地甜笑中）

事例二：

某日返學前食lunch時

媽媽：你食完未呀？夠鐘換衫返學啦﹗（洗手間換衫中）
燒腩仔： 食緊啦﹗（hea答）
媽媽：你停晒手做咩？又話食緊？（換衫出來發現呢個小朋友根本無食到）
燒腩仔：媽媽，你好靚呀﹗
媽媽：你唔使同我來呢套，我唔受㗎﹗快D食埋去啦﹗就遲到啦﹗
燒腩仔：哦...



最後又到講情感發展啦，媽媽話我呢個月又有D退步跡象，好多時玩得太開心或者攰就會出現一D失控嘅情況，明知唔啱嘅嘢專登去做去扭，會剩機搗亂借題發揮咁喺到嘈（有時可能係我哋無行到佢想行條路，又或者我哋講咗句唔啱佢聽嘅說話，都可以係一個嘈嘅理由），最惡頂係唔會理自己身處咩環境，盡情地尖叫大喊成半粒鐘都唔肯收聲，搞到媽媽超激氣嬲咗我成日，要我守行為做返好先原諒我。

不過好嘅係清醒返之後會肯講道理，知道錯會乖乖地接受懲罰，亦開始識得同大人道歉認錯，而自從媽媽話過我幾次之後，我宜家每次見到樓下嘅保安姨姨叔叔都一定會打招呼（之前唔知做乜突然有一個星期完全唔睬人），就連坐電梯時撞見樓上樓下嘅姨姨叔叔，我都會好主動咁同佢哋say hello（仲成日將自己D嘢講晒畀人知添），搞到人哋都唔知應我好定唔應我好啦﹗嘻...