要介紹懶人飯，呢個網上hit爆嘅整個蕃茄飯實無走雞﹗步驟超級簡單，先洗米，然後將蕃茄洗乾淨同介十字，再放其他鐘意食嘅料，加幾滴仔油，少少黑椒同鹽調味，㩒飯煲製煲飯，煲好將蕃茄壓爛撈勻就搞掂，而鐘意食有味飯嘅艾菲，仲會喺撈飯時加D parmesan cheese落去，個味係出奇地夾同正﹗
之後出場嘅係蕃茄飯變奏版嘅南瓜飯，同樣道理同方法，先洗米，然後將南瓜去籽去皮切件，再放其他鐘意食嘅食材同落調味料，㩒飯煲製煲飯，煲好將南瓜壓爛同加parmesan cheese撈勻就OK，艾菲有時會唔加芝士，而改加一大匙日本麵豉醬落去，又係另一番風味，咪睇佢賣相唔特別吸引，次次都食到燒腩仔舔舔脷㗎。
講開原煲飯，不得不提呢個三文魚釜飯，釜飯簡單D介紹即係日式煲仔飯，艾菲好多年前喺松島食過一次之後就愛上，返來上網搵食譜發現唔難煮，去日式超市買枝味醂，鏗魚汁同日本豉油就煮到，而呢個三文魚釜飯就係參考鬼嫁老師嘅蟹肉釜飯改成，只係改咗材料做三文魚同加咗D甘荀絲同本菇咁，簡簡單單又一餐啦﹗
一鑊熟嘅，除咗有飯，仲有意粉，呢個白汁雞肉蝴蝶粉其實係抄Paisano's Pizzeria而做，不過就改用咗one pot pasta嘅方法，調味比例同煮法又係參考鬼嫁老師嘅一鑊熟意粉—白汁底， 先用鹽同黑椒簡單醃好雞肉，之後就將蝴蝶粉，甘筍，雞肉，連埋牛油，牛奶同水一齊放落煲到煮，煮到D汁收再加少少調味同芝士就OK，除咗要全程睇住攪拌免黐底之外就乜都唔使做㗎啦，最重要係容易得來堅好味，深得白汁怪米高嘅歡心，所以係艾菲家出場率頗高嘅菜式來㗎﹗
One pot pasta除咗有白汁底，亦都有艾菲好鐘意嘅蕃茄底，呢個蕃茄海鮮長通粉係隨意喺屋企冰箱搵料來整，調味同煮法都係參考鬼嫁老師嘅一鑊熟意粉—蕃茄底，不過比上面個白汁雞肉蝴蝶粉麻煩少少係D海鮮不能過熟，所以今次除咗要全程攪拌免黐底之外，仲要及時抽返D熟咗嘅海鮮出來，等煮好時再加返落去就食得啦﹗
其實艾菲唔係特別鐘意食白汁底嘅意粉，但偏偏好鐘意食Carbonara，有次出街食咗個無味嘅Carbonara，把幾火決定返屋企自己煮好過，而為咗遷就燒腩仔，今次就將煙肉改咗做火腿，聽個名以為好難煮，實情係超容易，只需先煮好意粉，趁煮意粉時喺個大碗到準備定蛋汁，將兩隻蛋，50ml淡忌廉，半杯parmesan cheese撈勻，煮好意粉就開個pan炒香洋葱同火腿，再加入意粉抄勻，之後將全部意粉連料倒入蛋汁撈勻即可上枱，不過艾菲唔想畀燒腩仔食生蛋，所以就做多個step，將D意粉放焗爐到用高溫焗十分鐘先食，焗完都無影響口感好滑好香蛋味呀﹗
呢個蕃茄吞拿魚長通粉係另一味艾菲推介嘅懶人意粉，只需煮好長通粉隔水，再加罐頭蕃茄同罐頭吞拿魚落去炒勻就OK，因為罐頭本身已經有調味，所以艾菲連調味都唔使做，真係就咁炒兩炒就食得。
除咗原煲飯之外，艾菲都好鐘意煮碟頭飯，而日式牛肉飯係唔知點解每隔一排就會好想食嘅菜式來，食譜當然又係參考鬼嫁老師嘅溫泉蛋吉野家牛肉飯，只需煮好個汁底，加D牛肉落去煮熟就可以放飯面食，連埋煲飯半個鐘就搞掂。
豚肉生薑燒係繼牛肉飯之後，艾菲另一好鐘意食嘅日式碟頭飯，甚至鐘意自己煮多過出街食，貪佢薑味多少可以自己調較，而且可以煮多少少汁來撈飯，唔使好似街食咁就住就住，至於食譜當然又係參考鬼嫁老師嘅豚肉生薑燒丼啦﹗嘻...
除咗日式飯，艾菲都鐘意食台式嘅嚕肉飯，不過之前喺網上參考咗好多篇食譜，煮出來都唔係艾菲想要嘅味道，終於某日喺書局打書釘時畀艾菲搵到個啱口味嘅嚕肉飯，自此以後艾菲家每隔一段時間就會出現呢個飯，食之前一晚趁燒腩仔瞓咗就煮定，一來會入味D好味D，二來到夜晚要食時，只需翻熱D嚕肉同煮個白飯底就食得，加多隻烚蛋就最perfect啦﹗
最後要介紹嘅係飯糰，又係一樣好簡單嘅菜式，只需要去AEON $12店買飯糰模就OK，餡料可以好隨意，畀燒腩仔食嘅艾菲通常會加三文魚碎落去，自己食就會加豬肉鬆，不過燒腩仔唔知點解唔太like食飯糰，所以整過兩次艾菲就無再整啦﹗
正所謂唔打得都要睇得，懶都要懶得有技巧，係艾菲咁多年來做人嘅宗旨，呢D懶媽飯餸，全部睇落好似唔簡單，實際喺廚房切兩切炒兩炒就搞掂，餵得飽米高同燒腩仔又唔會被投訴無誠意，仲幫艾菲慳到唔少時間來上網寫blog㗎﹗
沒有留言:
張貼留言