早一晚知道有得去迪士尼，燒腩仔已經進入興奮狀態，同佢出發去坐車時，仲開心到周圍同D完全唔識嘅陌生人講「我去迪士尼呀」，行過迪士尼牌坊開始聽到音樂時，仲用勁讚歎嘅語氣講咗句「D歌真係好好聽呀」，可愛到艾菲幾乎暈低咁滯。
來遠就指住噴水池話好靚，艾菲巡例都問佢一句影唔影，難得心情大好嘅燒腩仔話影，幾熱幾曬都即刻埋位影﹗
入park指定動作，本來叫咗個迪士尼哥哥幫我哋兩母子影，點知睇返相先知佢影到歪歪斜斜咁，連後面個米奇頭都唔係好見到，反而艾菲幫燒腩仔影嘅仲靚。
停咗好耐嘅小火車終於開返，梗係要第一時間帶燒腩仔去見識吓啦﹗
呢個小朋友，堅持坐前排，又唔知自己矮，坐前面咩都睇唔到，於是兩母子又熱又悶咁呆坐咗成個站，只係見到一堆樹。
喺幻想世界落咗車之後，又熱又餓嘅艾菲實在頂唔住，決定同燒腩仔返過去明日世界坐低食D嘢（呢邊最易搵位又感覺無咁難食），不過唔知點解佢入親迪士尼都無乜胃口咁（真係顧住玩？？？），食咗1/4個包都無就叫唔食，只係肯食薯條同飲果汁。
等埋米高就出發去玩啦﹗ 路過維修好嘅城堡，梗係要同燒腩仔影返張相留念啦，今次就遇到個好有心嘅迪士尼哥哥，好勁咁氹到燒腩仔望住鏡頭笑，出來效果相當好呀﹗
入來玩嘅第一個game，仲一臉期待嘅樣，到底玩咩呢？
之唔係玩過一次之後就變成最得寵嘅咖啡杯囉﹗唔知佢到底係真心鐘意轉到暈陀陀嘅感覺吖，定抑或係睇完《小雞逛遊樂園》嘅影響，一知道有得入迪士尼，即刻不停提住要玩咖啡杯，連至愛嘅揸車都幾乎唔記得要玩。
玩完咖啡杯，艾菲同米高都熱到溶咗，於是拉燒腩仔去玩小小世界，坐吓船仔涼吓冷氣過個冷河，否則真係中暑暈低都似呀﹗
玩完小小世界出來，見條樓梯幾靚喎，於是叫燒腩仔埋位畀艾菲影吓相。
點知呢個小朋友越影越失控，人又多佢又不停喺條樓梯到爬同跳，唯有即時叫停走人。
今次又睇咩睇到咁入神呢？
登...凳...咪就係終於夠膽自己玩嘅旋轉木馬囉﹗之前叫極佢玩都話驚，今次終於有突破啦﹗YEAH!
原先我哋諗住睇埋night prade先走，不過眼見大家都全身濕晒兼無乜心機玩，所以排埋揸車就提早走人。
米高忽然提議去愉景北食pizza，路過欣澳見到靚靚日落，上次影唔到今次梗係要影返啦﹗
見架巴士遲遲未到，又有咁大個咸蛋黃射住，艾菲即刻爭取機會練吓影背光相，今次...今次...終於...影到兩張比較滿意啦﹗
山長水遠走入來，就係為咗食呢個大大件pizza，實情係出面市區明明有幾間分店囉，不過艾菲同米高都幾鐘意愉景北呢邊，置身喺到嘅感覺係特別relax，明顯我哋係來食feel，值嘅﹗
食飽見廣場有個星星燈裝置喺到幾靚又影吓。
然後同燒腩仔去對面惠康坐埋車仔就走啦﹗夾啱巴士時間，返到屋企居然一個鐘都唔使﹗Good﹗
沒有留言:
張貼留言