去到公園，我哋就即刻同燒腩仔戴頭盔同護膝護踭，其實個頭盔已經買咗一排，係喺大埔墟嘅單車用品鋪到買，原先想買檬媽推介嘅BELL，但單車鋪個負責人話燒腩仔個頭未夠大帶，而且D款唔係太女仔就係太娘唔多啱佢，所以最終買咗鋪頭推介嘅Cannondale，同樣係美國牌子，摸落比之前單車公園介紹款台灣頭盔實淨。
燒腩仔本身好抗拒戴帽，試頭盔時都係不情不願咁款，係艾菲講明唔帶頭盔無得踩車先無奈就範，買完之後米高帶過佢落樓下平台玩，但踩唔夠十五分鐘佢就主動叫走，明顯就係唔慣帶頭盔，估唔到今次隔咗一排再玩，佢又出其地合作喎。
一著好裝備，即開行turbo全速前進，可惜經過多次練習後，呢位車手嘅技術係一D都無進步過，上斜落斜要靠米高幫手推，轉彎停車依然係靠手動。
其實無人都有無人嘅好，至少唔使擔心呢個橫衝直撞嘅小朋友會撞到人，成條路畀佢一個玩晒，型﹗
不過天氣咁熱，為免中暑暈低，大家去戶外玩時，真係要記得多飲水，同埋適當時候就去陰涼位抖抖。
路過公園中間嘅風車陣，燒腩仔話想睇D風車郁，艾菲就叫佢幫手吹郁佢，然後豬咀先生又來啦，kakaka...
圍住公園踩咗一個圈，我哋就玩完scooter啦，而米高就畀咗粒冰燒腩仔降溫兼當奬勵（米高自從發現真空水壺可以保冷之後，宜家去親戶外玩都會裝一樽冰出去），喺D咁熱嘅天氣下，燒腩仔當然相當受落啦﹗
跟住叫燒腩仔去公園玩，呢隻仔居然嫌D設施辣手唔肯玩，hea玩完呢個韆鞦就叫走。
但一場來到，又難得有大草地兼無乜人，梗係吹埋泡泡先走啦﹗
其實艾菲係特登唔帶泡泡槍出來，皆因最近上游水班學吹水，艾菲先發現燒腩仔一直以來吹氣嘅方式係錯，所以只帶呢樽仔泡泡來逼佢練習多D。
唔知大家留唔留意到，佢吹親泡個咀都唔係豬咀兼見到牙，所以每次都會有口水噴出來，亦吹唔到幾多個泡，而呢樣嘢我哋單憑口講係好難講得佢明，只可以靠佢自己練多D慢慢摸索。
好彩燒腩仔唔知自己被特訓，仲玩到勁開心唔願走。
不過仔呀仔，你可知道你嘅開心，係建築喺媽媽嘅痛苦身上﹗﹗﹗為咗陪你來玩，艾菲畀D衰蚊咬咗足足九大啖，D手手腳腳腫咗幾日都未退（艾菲對蚊蟲係超敏感，輕則腫到變豬蹄，重則流濃流水留下永久疤痕），已經做晒防蚊措施都咬成咁，反而燒腩仔乜嘢防蚊措施都無做，竟然可以全身而退乜事都無（成件事實在太離奇，佢真係由細到大都無畀蚊咬過一啖㗎）﹗
離開時喺近公園門口嘅樹上面見到呢隻蜥蜴，其實艾菲係有少少驚呢D爬蟲類動物㗎，但為咗唔想燒腩仔似自己，艾菲都要扮淡定扮無嘢，教佢咩叫保護色又同佢介紹佢條長尾巴，仲勇到埋去影低佢（當然係企遠遠咁zoom埋去啦），真係唔畀個叻自己都唔得呀﹗:P
離開佐敦谷就坐車去咗Mikiki食飯，居然見到艾菲兒時偶像叮噹喎，即刻拉呢個小朋友埋去影相啦﹗
叫佢拎實拳頭扮大雄，但就扮極都唔似囉﹗>.<
沒有留言:
張貼留言