首先介紹個正氣D嘅甜品先，小朋友成日一咳就唔斷尾，真係聽見都心痛，除咗靠睇醫生食咳水之外，艾菲都會試吓食療，雖然成效唔係好顯著，但幫輕吓舒緩吓都好吖，呢個川貝燉雪梨就係其中一樣艾菲會試嘅，先將雪梨頂切開，然後用匙將雪梨芯挖走，之後放少量磨成粉嘅川貝（用攪拌機個乾磨打就OK），同一粒仔冰糖入去，再將雪梨頂用牙簽固定返落個身到，放燉盅燉45分鐘就食得，製成品甜甜地都幾好味㗎，至少燒腩仔唔會抗拒先啦﹗
燒腩仔除咗係甜品控亦係一個蛋控，無論係炒蛋，煎蛋，蒸蛋定烚蛋，佢都好可以食唔停口，所以見佢無扭計，專登趁佢返咗學快手整呢個滑滑鮮奶燉蛋，等佢放學返來有得食，材料同造法係參考簡易食譜嘅超滑的鮮奶燉蛋，基本上將全部料撈勻就蒸得食得，絕對係easy job﹗
一見到呢碗薑汁鮮奶燉蛋白出場，多數係艾菲整完其他甜品有蛋白剩要清咗去，材料同造法都係參考簡易食譜嘅薑汁鮮奶燉蛋白，簡簡單單將所有材料撈勻拎去蒸就OK，艾菲仲要懶到連薑汁都用攪拌機幫手打碎再入茶袋揸汁，既方便又快捷。
燒腩仔好鐘意食蛋糕，有時放學會扭艾菲買畀佢食，但艾菲唔想吓吓買麵包鋪D蛋糕畀佢食，一來唔知加咗幾多防腐劑同用料唔知來自邊到，二來定價實在越來越貴好唔抵，其實自己整快快手手一個鐘內實搞掂，食譜係參考餅神vanlily嘅超鬆軟海棉蛋糕，整咗咁多年都未失過手，味道同街賣嘅無分別㗎﹗
唔知點解突然挑起條筋想自己整爆谷，睇點Cook Guide條片見幾易，就四圍去搵乾粟米粒來整，只係100g乾粟米粒，爆起已經有成大煲，感覺真係好神奇，不過原來最難唔係爆，而係撈個焦糖醬，一來焦糖醬容易過火食落會有陣燶味，二來加咗醬之後D爆谷會黐埋一舊，所以呢碗爆谷雖然夠脆但個味同賣相都唔合格，要搵日擇日重賽先得﹗
記得有日掃blog時見Little K媽媽放假都專登起身整愛心早餐畀Little K食，令向來早餐只畀燒腩仔hea食cereal or麵包嘅艾菲，忽然燃起道火整pancake畀燒腩仔，食譜係跟簡易食譜嘅Pancake Recipe，早一晚預備定第二朝開火煎就得，而第一次嘅大成功仲令艾菲下定決心再整多次兼試畫公仔，點知...原來畫公仔係好難㗎﹗難唔係難在畫，而係難在控制火喉，畫咗大半個鐘只得三塊比較見得人，其他唔係太燶就係個樣唔見咗...
一到夏天，艾菲就鐘意煲吓薏米水來清熱兼美白，一直都只係識煲最簡單嘅檸檬薏米水，然後有日去餐廳食飯，飲到杯斑蘭薏米水，見佢幾香幾甜一試難忘，就決定自己買料試煲，幾片斑蘭葉，薏米，冰糖同水一齊煲45分鐘就飲得，米高仲激讚好味過餐廳嗰杯，不過燒腩仔唔知係唔係對斑蘭葉敏感（飲落咗薏米嘅湯佢又無事喎），飲完個身即出紅點，所以艾菲煲咗一次之後就無再煲啦﹗
前排芒果當造，艾菲又點會錯過呢個一年一度整芒果布甸嘅機會吖，食譜之前都同大家分享過，自己整唔會落生雞蛋，又可以落超多芒果粒，足料同好味過街買嘅多多聲呀﹗
啤酒啫喱係用來氹小朋友嘅小吃之一，一知道燒腩仔表哥表姐上來玩，艾菲就準備定來招呼佢哋，食譜又係之前同大家分享過，艾菲用啫喱粉直接整，簡單到連燒腩仔都做得到。
自從燒腩仔全面轉飲日本奶之後，艾菲間中都會拎佢D奶來整牛奶布甸，食譜好耐之前同大家分享過，製成品真係同街買嘅無分別，自己整仲可以健康D來個減糖版，燒腩仔鐘意到連個樽都想食埋呀﹗
要數夏日甜品，點少得雪糕同雪葩，呢個夏天艾菲比上年更勤力，雪櫃常備雪糕雪葩，除咗之前父親節招呼燒腩仔公公婆婆嘅芒果牛奶雪糕同柚子雪糕，最近就趁Piago森永煉奶減價，買咗枝來整超濃牛乳雪糕，同用Yonanas整咗我哋一家都好鐘意食嘅菠蘿雪葩。
大家睇到艾菲D傑作可能以為艾菲好有心機，實情啦...艾菲都係揀D簡單易整嘅先來做咋，尤其平時得自己一個湊住燒腩仔，實在有太多估你唔到嘅嘢要做，好多時招呼得佢來已經無時間同心機整甜品，畢竟甜品唔同正餐唔係必需品，好似佢最近扭計多咗搞到艾菲無乜mood，咁呢排就全部人都無甜品食啦﹗
沒有留言:
張貼留言