燒腩仔姨媽一家，前排忽然話畀艾菲知佢哋上星期五會入迪士尼，難得有表妹一齊玩，艾菲就諗住湊完燒腩仔放學即帶佢入場，不過我哋開行turbo趕過去，遇著荔景站來架青衣車，再到欣澳站送車尾，終於都要六點先入到去，但呢日原來係迪士尼十周年慶祝，night parade無咗，煙花仲要七點三就放，即係得一個鐘唔夠嘅時間玩...
一知道有得去迪士尼，已經不停話要探米奇，高飛同Pluto，又話要玩揸車，但要喺一個鐘內完成所有嘢係無可能嘅事，唯有解釋佢知天黑米奇佢哋要休息，直接同佢排揸車就算。
等咗二十分鐘左右終於都玩到，而今次仲難得地有姨媽捱義氣陪佢玩，等艾菲可以舒舒服服咁喺出面等，Good!
其實今日除咗表妹浵入咗來玩，同樣有銀卡嘅表姨媽都帶埋表妹Belle入來湊熱鬧，三老表一齊排排坐影合照兼等睇煙花，實在太有我哋細個俾大人捉住一齊影相嘅感覺啦，kakaka...
不過期間發生咗件事，搞到艾菲忍唔住發火同一對自由夫婦爭執，完全唔明點解佢哋真係可以咁黑人憎，唔出聲就當你好蝦完全唔會理人感受，明明自己做錯事，唔認之餘仲諸多藉口，唔夠你講就問你係唔係香港人來搞分化，仲調轉頭來話我哋喺小朋友面前同佢據理力爭係好差嘅身教，呢D咁無賴嘅表現，真係好難怪有咁多香港人唔歡迎你哋囉﹗
遇著呢D人當然咩雅慶都畀佢哋掃走晒，但為咗小朋友們都好快收拾心情，奈何個煙花delay咗成廿分鐘先開始（莫非有嘉賓遲到？），小朋友們開始等到有D唔耐煩，好彩最終都順利捱到最尾一刻，不過問心真係唔覺呢場十周年煙花特別靚﹗仲有D後悔揀咗今日來添呀﹗
沒有留言:
張貼留言