艾菲事前專登忍住口，直至活動前兩三日先同燒腩仔講有得同小朋友一齊整pizza，佢一聽到即刻勁興奮，仲話要落好多好多菠蘿同火腿，到當日朝早起身仲第一句就話「我一陣去整pizza呀」，不過到夠鐘出發時又有少少扭（呢排出親門口都要扭吓先安樂>.<）， 去到現場更加係扮怕醜，咩人叫佢都唔應...
好彩餐廳方面，一早就已經布置好成個party area，有小朋友至愛嘅氣球，同巨龍肚B佢哋拍吓波，逐漸回復正常mode。
等齊人就正式開始啦﹗首先係要著圍裙同帶廚師帽，由於艾菲出發前已經畀定相佢睇，講明要著圍裙同帶帽先有得玩，所以今次都好順利無好委屈咁嘅樣，仲識畀個V字手勢艾菲影相添﹗
跟住就一人一塊餅底，姐姐教佢哋盡情地拍，拍返D空氣出來，呢個動作對燒腩仔來講，當然係爆like啦﹗
之後就係落茄醬，呢個有少少難度，要米高出手幫忙。
之後啦...有人笑得好迷人喎...
原來係...
偷食中﹗﹗﹗
越叫佢唔好偷食佢越要專登食多幾啖，艾菲唯有出動同輩壓力，叫豬脾同龍BB幫手睇實佢﹗^^'
然後就輪到佢最期待嘅位啦，幫個pizza落餡料，有橄欖，火腿，雞肉，蘑菇，不過就係無燒腩仔至愛菠蘿，好彩佢好似唔記得咗咁，完全無搵喎﹗
落埋芝士就大功告成，可以交出去畀姐姐拎去焗啦﹗
等緊pizza嘅時候，姐姐就拎咗個又靚又好味嘅朱古力蛋糕出來，同九月之星嘅南瓜仔，包包，巨龍媽同Anki媽慶祝，肚B媽仲要好細心咁一早準備定生日帽添﹗
切完蛋糕，坐低飲杯果汁抖吓...
同大爺爸玩吓波...
題外話，艾菲真係要高度讚揚吓大爺爸，佢嘅出現令一眾媽媽終於可以抖吓氣，大家睇佢幾受歡迎，成班小朋友圍住佢一齊玩波，以後有咩大型gathering一定要預埋佢﹗
再撩吓靚女...仔...你做乜次次同妹豬影相都貎合神離咁㗎...
跟住個pizza就出爐啦﹗為食燒腩仔第一時間當然係食啦﹗個味比相像中還要好味喎，我哋食唔晒打包拎返屋企，到第二日翻熱再食都一樣咁正﹗
食完pizza影埋大合照就要同大家講bye bye啦，期待下次嘅gathering，大家再約出來玩呀﹗
沒有留言:
張貼留言