事前無同燒腩仔講，但佢好似估到咁，早幾日放學忽然同艾菲講：「媽媽，你可唔可以帶我去迪士尼玩」，咁我哋就剩機叫佢要乖要合作先有得去，結果佢喺星期六都叫做乖咗半晚啦，但到星期日朝早起身又發作，不過見佢都唔係好扭就照出發。
人多係我哋事前已經預計到嘅事，沿途艾菲都有同燒腩仔做定心理輔導，但天氣熱就真係無預到，呢個少爺兵逼完車之後，行入park嘅短短路程入面，已經叫咗幾次要飲水，眼見入場條人龍長到無朋友，仲要行兩步就突然停喺路中心要我哋畀水佢飲，點勸都唔肯行多兩步排住隊先飲，唔畀就即時黑面神上身兼發難喺到嘈，堅係搞到大家都好無癮。
好彩今次有慈父米高同行，為免我哋兩母子繼續硬碰硬，佢都即時提出艾菲去shopping，佢同燒腩仔去揸車嘅建議，咁艾菲家陣又確實咩都唔玩得，唯有自己四圍逛吓冷靜吓，原來黑色世界一過，聖誕樹同聖誕裝飾即刻出場，雖然年年都係呢D裝飾，但又真係好靚喎。
影完相本來想入美國小鎮大街D shop睇吓㗎，但又係好似上次減價咁人多到嚇死人，而且好多貨架都已經被掃清，所以艾菲逛咗半個圈都無就走人，直接去Tomorrowland嘅shop行，無咁多人又齊貨嘛，不過艾菲其實無咩嘢想買，主打只係想買返上次買唔到嘅Tsum Tsum碗，另外買多套《Cars》餐具畀燒腩仔，同買咗set紥頭橡根，諗住有緣就留畀BB豆豬用，唔係就送畀表妹。
shop完佢哋兩父子都仲未玩完，無無聊聊就向住Fantasyland方向走，行吓行吓見到有個哥哥扭波喎，心諗燒腩仔應該鐘意，雖然艾菲道氣仲未落，都係慈母上身咁幫佢排住先，然後差唔多排到佢哋兩父子先施施然出現，哥哥問佢想要狗仔定米奇頭，燒腩仔即答米奇頭，哈哈...又幾靚喎，等艾菲得閒研究吓點扭先。
之後行咗入Fantasyland，燒腩仔不停話要玩咖啡杯，但眼見條隊長到排咗出來，我哋唯有出盡口術勸佢改玩木馬，而喺佢哋兩父子排隊期間，艾菲又入shop行咗轉涼吓冷氣，出來就啱啱好到佢哋上馬啦，see...玩木馬都一樣開心㗎姐﹗
基於艾菲真係咩都唔玩得，所以諗住不如帶燒腩仔去行吓泰山樹屋，點知燒腩仔一踏入Adventureland嘅範圍又黑面神上身，乜都話唔玩唔好，我哋唯有話穿過呢到去搵胡迪佢先肯繼續行，最終艾菲唔忿氣拉咗佢哋上灰熊山谷，要米高夾手夾腳幫佢影咗呢張相，呵呵呵...
影完相，黑面神繼續乜都話唔好，但艾菲叫佢去玩水，佢又居然話好喎（上次明明驚到走夾唔抖㗎喎﹗），然後有人又要驚又要玩，真係睇見都好笑。
基於當日天氣實在太熱，灰熊山谷仲要西斜俾太陽射住，艾菲曬到唔多頂得住，眼見人哋拎住條雪條食就流晒口水，結果都跟大隊買咗條來食，不過大家放心，食雪條呢D粗重功夫總有人搶住來做，所以艾菲實際都唔知有無食到半條...>.<
以為黑面神食完雪條會好D啦，但食完又繼續十問九唔好，艾菲話入去迷離莊園歎冷氣又唔好，叫佢同爸爸玩彈弓狗都話唔好，直至入到反斗奇兵間shop，遇著坐佢隔離位個同學仔一家，心情先叫做好返D，為免夜長夢多攞苦來辛，所以我哋快手同佢影埋呢架搖控車就閃啦﹗
沒有留言:
張貼留言