BB豆豬來了（13W）

終於都捱到13W，艾菲D私務亦總算忙完，可以正式同大家報喜，本來艾菲今次想低調處理，一直打算照埋結構先公布，但其實好多聰明嘅blog媽已經估到，甚至比艾菲自己仲緊張，所以艾菲都決定唔瞞大家，係...燒腩仔終於有機會做哥哥啦﹗

點解艾菲話呢段日子係捱過來呢？皆因今次陀住BB豆豬，真係無想當年陀燒腩仔咁舒服，想當日陀住燒腩仔，除咗大食咗好多之外，基本上係食得瞓得玩得行得走得，今次呢...由初期尿頻，成日突然斷電同腸胃敏感，到後期反胃作嘔同堅嘔，平日用開嘅沐浴露同lotion都嫌臭，入唔到街市煮唔到飯（聞到生肉味就反胃），連青菜同魚都食唔到（好彩仲食到水果），簡單如食粒Materna都食到飲苦茶咁嘅樣，甚至晚晚瞓唔好不停醒，真係無諗過兩次嘅分別可以咁大﹗

再加上今次湊住燒腩仔，佢又正值最難搞嘅terrible 3，永無合作扭擰鬥氣已成每日嘅指定動作，所以早期不適嘅日子就更加難捱，最記得有次手軟腳軟咁去接佢校車，同佢講「媽媽唔舒服要快D返上樓」，佢嘅反應係即時企喺到扭唔行，嗰一刻真係十萬個唔開心，但艾菲都明佢始終仲細，亦的確係個粗心大意嘅男仔，都無得要求佢咁多，所以早有準備帶定粒糖等佢跟住返屋企就算。

好彩嘅係燒腩仔對於BB豆豬都好接受，由於艾菲每日都會長時間對住燒腩仔，燒腩仔又最鐘意喺間屋到橫衝直撞，為免有意外發生，艾菲一驗到bingo就即時同燒腩仔講，佢都好期待又不停問艾菲BB豆豬幾時出來同會點樣出來，仲四圍同人講自己有個妹妹（妹妹呢樣嘢純粹佢自己亂估>.<），叫佢錫錫BB豆豬都會埋來錫艾菲個肚皮。

就連BB豆豬呢個名其實都係燒腩仔改嘅，原先艾菲仲諗緊今次應該叫伍花茶定伍香肉丁（燒腩仔原本嘅乳名其實係伍花腩，kakaka...），然後有晚燒腩仔臨瞓前拎住自己隻小布豬，慣性瞓落床仲不停講嘢嘅佢，忽然好正經咁同艾菲講隻小布豬叫BB豆豬，艾菲下意識就問佢係唔係講緊肚入面個BB，之後我哋就有共識叫佢做BB豆豬啦﹗

而經歷過上次嘅事，艾菲早期嘅心理陰影都幾重，不停喺到計住數，然後到想當日出事嘅6W6D，去洗手間時真係抹到D血絲，雖然有過經驗都知唔係好大問題，但心裡面始終會擔心，所以就即日約咗Dr Wong做檢查，然後一照就已經見到BB豆豬嘅閃閃，艾菲即刻忍唔住喊咗出來，對於一個千辛萬苦先生到個仔出來都可以眼淚無滴嘅人來講，真係無諗過自己今次會咁激動，有D嘢或者係要經歷過先會明。

亦可能有過之前嘅經驗，艾菲明白到要生個健健康康嘅BB出來本來就唔係一件易事，所以未照Oscar前一直覺得好唔踏實，每日稍有啲咩嘢風吹草動就喺到亂諗，煩到米高都無艾菲咁好氣，但上星期喺QE照完Oscar後（成個星期都無收到電話即pass啦...），見到佢無咩動靜都可以健康成長，由一粒豆變成一個人型物體，感覺又好似好返啲，期待今次可以早少少感覺到胎動，等自己可以再安心D啦﹗

So far來到呢個moment，早期嘅不適明顯開始減退，反胃作嘔間中仍會出現，但已經無之前出現得咁頻密，之前食唔到嘅菜同魚都已經食得返，雖然今次明顯特別鐘意食垃圾食物，而艾菲亦本著唔戒口嘅精神，不過可能今次唔算好大食（唔大食都一日要食四至五餐...），體重無好次上次咁急升，已經見肚不過仲著得落本身著開嘅牛仔褲，唔著緊身衫應該無人會發現個肚（所以唔使旨意坐車有人讓座）。

至於去邊到生方面，如無意外都會同燒腩仔一樣，搵返Dr Wong返仁安生，但就一定唔再試順產直接開刀（Dr Wong講明試要四個鐘內搞掂兼唔落得催生藥，否則都係要轉返緊急開刀），只係平日覆診會轉去佢TST診所，而政府就轉咗去排QE，雖然無咗雙非但只係俾到Oscar同飲糖水期（因艾菲係高危），見醫生仲要等到31W（仲遲過當年喺威爾斯...），不過反正有Dr Wong跟住，去健康院都係無乜意思咁，有基本嘢艾菲都好滿足㗎啦（想當年陀燒腩仔係連Oscar都無），另外一知道pass咗Oscar後都即時約咗私家醫生做結構（原來宜家照結構都幾full同貴咗好多﹗），亦順利搞掂埋陪月事宜（又係full得勁誇張，未足三個月搵之前個陪月已經無期，佢話佢接個case係有咗個幾月已經落訂），來緊應該可以安心去學習享受中孕期啦掛﹗