生日前一日嘅星期日，理應一家人去好好慶祝，但艾菲實在畀BB豆豬搞到無乜電，於是呢朝米高照舊做湊仔公，畀艾菲瞓到十一點幾先起身，等艾菲瞓醒後佢就建議過海行吓同燒腩仔遊吓車河，其實艾菲攰到唔係好願郁，但主角興致勃勃，艾菲都唔敢掃慶，唯有撐起身陪呢兩父子去玩。
過海喺銅鑼灣食完飯後，以為米高會話去行商場，點知...佢居然好神心咁話帶個仔去維園玩﹗仲帶咗燒腩仔去水池睇人玩船添﹗睇住D船片來片去，燒腩仔係勁興奮，仲好浮誇咁笑到咔咔聲添﹗
之後當然有帶佢去遊樂場玩至愛滑梯啦，玩完滑梯艾菲仲好衰咁呃佢除鞋去行石春路添，行到佢叫晒救命﹗kakaka...
之後有人扭計唔肯行，我哋就搵個位坐低休息一陣，想氹佢瞓一陣晏覺，然後艾菲不自覺咁抬頭望天，原來呢日天氣咁好，萬里無雲真係好有秋天嘅氣息。
明明攰到震，但又慌死我哋會賣甩佢咁，點都唔肯瞓一陣，唯有繼續下一站，坐電車去灣仔玩具街食tea順便睇車仔，今次艾菲講明乜都唔會買，而呢個小朋友都算合作，只係不停重覆「下次我乖你買呢個俾我啦，好唔好？」
睇完玩具再行去碼頭坐船，行吓行吓原來已經日落西山，一日時間就咁就過咗，我哋返過海落九龍城求其食個晚飯，再去AEON掃貨後就閃人啦﹗
特登去九龍城AEON掃咩呢？之唔係蟹王米高特選嘅北海道毛蟹，長腳蟹，同麵包蟹囉，艾菲雖然陪唔到佢食大閘蟹宴，但都唔可以剝奪米高生日正日食蟹嘅權利嘅﹗
除咗外賣三隻蟹返來，艾菲點都要有D嘢交差，簡簡單單嘅sukiyaki艾菲都仲整到，餵飽一家三口無難度﹗
咁話晒都係生日，蛋糕就當然係唔少得啦，一早已經放棄自己整嘅念頭，米高為怕艾菲破費，已經千叮萬囑叫艾菲去東海堂買個細蛋糕算，點知燒腩仔點都唔肯就範，硬要去樓下新開嘅Cake Lab買士多啤梨蛋糕（上次佢生日都係喺到買，試過就唔肯轉，不過老實講，艾菲都寧願食呢個正正常常嘅士多啤梨蛋糕，多過東海堂嘅哈蜜瓜蛋糕），然後當然係包埋唱生日歌，吹蠟燭同食到舔舔脷嘅服務啦﹗
雖然呢個生日，真係hea到連艾菲都有D唔好意思，但真心艾菲已經盡咗力㗎啦，都好彩米高唔係好介意（好似係...），不過希望到下個月艾菲生日時，佢唔會雙倍奉還畀艾菲啦﹗hehe...
沒有留言:
張貼留言