第一次見面（6W）

一直都唔諗住Day back返BB豆豬嘅嘢，但諗吓諗吓又怕自己好快老人痴呆唔記得個感覺，所以就趁呢排得閒D精神D，記得幾多就寫幾多啦﹗

23/10/2015

自從月初驗到Bingo之後，艾菲個心一直蘿蘿攣咁，你話唔開心咩又唔係，但好興奮又無乜，畢竟衰過一次，都怕今次又食詐糊，而且我哋都有共識，再有意外嘅話就放棄，反正我哋一家三口都過得好開心，只係多一個小朋友又真係圓滿D咁囉。

沉殿咗幾日之後，先捨得話畀燒腩仔婆婆知同搵Dr Wong約期（今次係低調到連艾菲嘅好姊妹，到宜家都仲未知），然後大家都千叮萬囑艾菲要小心，就連一向崇尚唔戒口嘅米高都竟然叫艾菲唔好飲茶，最重要嘅係要艾菲唔好隨便動氣，well...大家都太了解艾菲嘅臭脾氣啦 >.<。

奈何燒腩仔，一如過往咁，專揀呢D重要關頭來搞事，一連幾日艾菲真係畀佢逼到癲咁滯，雖然每次艾菲都好快叫自己冷靜，又會事後摸住BB豆豬來纖悔，但動咗氣就係動咗氣，終於到6W6D呢日，一早起身個肚就拿住痛，然後去洗手間竟然抹到少少血絲。

嗰一刻，真係有D欲哭無淚嘅感覺，雖然理智都話畀自己知好小事，只要乖乖地唔好再操勞同動氣就OK，但情感上仍然難免會擔心，掙扎咗好耐決定即日約Dr Wong做個檢查先（本身約咗7W先見順便聽心跳），安排好燒腩仔爺爺過來接放學，艾菲就同米高飛出去TST搵Dr Wong。

由於係臨時約嘅booking，所以都等咗OK耐先有得見醫生，Dr Wong循例都先問情況，聽到艾菲到下午已經無再肚痛，佢就話唔太膽心（其實艾菲都估到肚痛應該係因為腸胃敏感），至於有血絲嘅情況，都係例牌幾句安慰說話同開安胎藥嘗試幫幫忙。

之後就埋位照超聲波，今次終於唔使再照陰超（其實上年一連照咗幾次後艾菲對陰超有D陰影），當吓嘅感覺係原來佢健康嘅話，個signal係可以好強，一照已經搵到個好靚嘅胎囊，只係size相對細咗少少，艾菲當然即時問埋Dr Wong有心跳未啦，Dr Wong話如果要聽嘅話會放咗D energy落去，影響到BB豆豬所以唔建議，但都好努力咁搵個影像畀艾菲睇，然後睇住佢個心喺螢幕到一吓一吓咁閃，艾菲係感動到忍唔住喊咗出來（唔知姑娘係唔係畀艾菲嚇親，佢見到艾菲喊好似唔係好識反應咁:P）。

照完超聲波，艾菲真係如Dr Wong所講安樂晒，而Dr Wong亦終於第一次主動同我哋講「恭喜晒」（上次陀燒腩仔佢都無咁同我哋講過㗎，所以艾菲事後都問米高自己有無聽錯，嘻...），計埋預產期開埋懷孕證明同約定下次覆診期，我哋就閃人拿拿聲返老爺奶奶屋企接返燒腩仔啦﹗

事隔兩日，趁米高難得平日放半日，艾菲就約埋佢一齊去QE排期，其實按所住地區嘅話，艾菲係應該去排聯合嘅，不過經過兩次不快嘅住院經歷後，艾菲實在唔想再有咩事要入去住，所以就揀咗QE，初初姑娘都唔想收艾菲呢個症㗎，但講吓講吓佢又OK畀個位艾菲喎，Good﹗

其實宜家艾菲無收入，得米高一個獨力撐起頭家，反正政府都好大機會肯同艾菲開刀，艾菲係應該慳家D考慮去政府生嘅，而且喺餵母乳方面政府醫院點都好過私家醫院，同時亦有人聽到艾菲排到QE後好開心（唔係米高囉），成日想遊說艾菲去政府生話慳返D錢買奶粉咁啦（艾菲一直主張餵母乳，根本無諗過要買奶粉喎﹗﹗﹗）﹗

不過艾菲實在太清楚自己嘅情況，喺政府醫院根本唔會休息到，返屋企後除咗陪月同米高亦唔會有其他人幫到手，如果生完頭幾日喺醫院仲唔好好休息嘅話，返到屋企再晚晚同BB豆豬搏鬥到無覺好瞓，艾菲實發癲殺人都似，所以同米高商量過後，都係覺得去仁安生比較適合我哋，當然都要感激米高，每逢呢D大是大非位，總係以艾菲嘅感受行先，幫艾菲擋風擋雨，所以艾菲今次會盡量慳家，努力忍手唔亂買嘢俾BB豆豬來報答佢㗎啦﹗