北海道名古屋之旅～Day 5 網走>美瑛>富良野 part 2

由於天氣實在太好，我哋離開四季彩之丘時已經熱到溶咗，全部人嘅飲品包括燒腩仔每日必備嘅一大枝水都飲晒，呢個時候當然要去食返個雪糕降吓溫啦﹗專登開車去返呢間三年前來過，專食夕張蜜瓜雪糕嘅POPURA FARM，去到先知佢原來搬咗鋪去對面（真係賣雪糕賣到發咗達），新鋪大咗闊落咗仲多人咗，而且多咗冷氣室內位，Good!

起初落車時，燒腩仔完全唔知發生咩事（其實艾菲已經解釋咗佢知係去食雪糕），艾菲要佢同個鋪頭標誌大夕張蜜瓜雪糕影相仲樣衰衰咁，入到去見到有雪糕食，即刻雙眼發出bling bling嘅閃光，食完一啖又一啖咁同我哋搶食，食到咳都仲未肯收口呀﹗



食完雪糕見時間尚早就去埋富良野嘅富田農場，呢個花田絕大部分都係薰衣草，去到你只會見到一大片紫海，就連賣嘅手信都係以薰衣草做主題，但呢到感覺無四季彩之丘咁大，而且超多香港旅行團，我哋喺呢到聽廣東話應該係多過聽日文囉﹗



來到花田，燒腩仔又係失晒控咁狂奔，呢個樣好似好開心，但佢心底入面到底諗緊咩？真係仲難摸過女人心呀﹗

北海道名古屋之旅～Day 5 網走>美瑛>富良野 part 1

偷懶咗幾日無寫遊記，又係時候努力吓啦，不過宜家先寫到Day 5嘅part 1，仲有成8日呀...真係寫極都仲未見家鄉﹗不過寫遊記其實都幾開心，睇返當日嘅相回味返當時嘅感覺，就好似仲去緊旅行咁，嘻...艾菲都知發夢未咁早㗎啦﹗



日本嘅民宿一般都係一泊兩食，指定時間去食堂就自然有得食，一般都係日式飯，魚同麵豉湯無咩特別，不過船長之家嘅早餐就竟然好似晚餐咁一貫嘅豐富，一朝早就有刺身同炸帶子食，好記得第一次來時食到嘩嘩聲㗎﹗



食飽就準備出發啦﹗呢日嘅天氣係我哋來北海道咁多日以來最好嘅一日﹗亦好好彩我哋咁啱安排咗呢日去花田﹗真係天公造美呀﹗我哋由網走出發，經旭川去美瑛，就來到美瑛時見到公路隔離有條火車路，艾菲呢個電車女已經覺得好好feel，後來見到有火車經過仲超hyper添﹗米高見艾菲勁想影火車，唯有開快D架車幫艾菲追（因為呢條路太多車唔可以話停就停），終於喺其中一個燈位可以停到一陣車，艾菲超興奮咁叫米高拉埋燒腩仔落車睇，自己就專心影靚相，一心諗住燒腩仔咁鐘意車實會好開心，點知火車極速駛過之後，燒腩仔居然話「唔使驚」（即係驚）﹗O...艾菲事後花咗好多口水先令到佢唔再驚咋...



去到美瑛已經十二點，第一時間走去搵食啦，可能因為餐廳入面同時坐咗兩個中國同台灣小朋友，佢哋都邊食邊扭嘈到拆天，相對燒腩仔呢餐喺艾菲嘅打氣同貼紙引誘下，總算好乖好靜咁食咗大半碗飯（但最後一啖唔知點解係要摞出來>.<），食飽就去美瑛駅吸印仔，點知又撞正成團中國遊客嘈到爆炸，所以吸完印影張到此一遊相就即閃啦﹗

挑戰成功＠葵芳新都會廣場天台公園

返咗香港都成幾星期，好似一直都無帶燒腩仔去過公園玩，主要原因當然係天氣太熱，熱到艾菲都唔願出門口，同好怕去到公園又中招畀蚊咬啦（今年已經畀D衰蚊咬到對腳花晒，都唔知D疤到出年退晒未>.<）﹗不過艾菲都知道小朋友係屬於公園嘅，尤其係燒腩仔呢D感觀特別敏感嘅小朋友，就更加應該多D去公園，多D接觸唔同嘅嘢去特訓吓，於是星期日行街路過葵芳新都會天台個公園，見無太陽直射又有D風唔太熱，就帶咗佢上去玩啦﹗



來咗呢個商場行街咁多年，艾菲都係第一次專登行上來公園，之前一直以為只係個普通小公園，點知來到先發現地方都幾大，同埋都叫做幾多嘢玩，基本樓梯，滑梯同轉轉轉玩意都有，只係小朋友入面有唔少數係講普通話呢一點扣咗分（唉...自由人家陣連葵芳都攻陷埋，我哋就來唔使出街啦）。



經過多次嘅特訓之後，宜家已經愛上咗滑梯，仲要只揀呢條最高難度嘅旋轉滑梯玩。

學踩單車＠九龍灣公園

燒腩仔已經就快23個月大，見佢最近都高咗少少，艾菲一直想佢正式學踩單車，無謂浪費咁大咁靚嘅單車來擺吖﹗於是啱啱過去嘅星期六，襯米高下晝有時間就即刻take action，原先艾菲諗住求其喺樓下平台踩吓就算，點知米高就雄心壯志咁話帶燒腩仔去九龍灣公園個單車公園踩，貪心嘅艾菲一廂情願地以為踩完單車，可以畀燒腩仔去埋隔離遊樂場玩吓都好，所以就好開心咁跟住出發啦﹗



上年差唔多時候我哋都來過呢個單車公園，知道呢到唔多人，亦有兒童及初學者專區，帶燒腩仔來都唔怕會阻到人，而帶佢來呢到嘅另一個好處係，多D小朋友一齊踩有氣氛之餘，等佢可以觀察吓D哥哥姐姐點踩，從中領悟吓對腳點郁先啱。



老實講，艾菲同米高都已經唔記得自己想當日係點樣學識踩單車，只係識教燒腩仔邊個腳踏高就踩落去，兩隻腳要好似行路咁輪流郁，再加用手幫佢隻腳郁等佢感受吓道力，但呢D咁抽像嘅理論燒腩仔又點會明吖，佢識得將兩隻腳放喺腳踏上面已經好叻，要佢用啱力踩落去仍然係好有難度囉。

Trouble 2事件簿～延續篇

去完旅行返來之後，執屋做家務陪燒腩仔上playgroup同游水班，忙到艾菲無停手咁滯，終於游水班上完可以多返少少時間同燒腩仔玩，但就輪到佢嘅trouble 2情況喺不經不覺間升咗呢，搞到艾菲呢幾日都好唔開心，幾乎有放棄湊仔出返來做嘢嘅念頭添﹗唉...

之前一篇《 Trouble 2事件簿》都講過燒腩仔極愛摞地，但隨住佢識講嘅嘢越來越多，表達能力都越來越強，喺艾菲多次同佢溝通同堅持底下，摞地呢個情況係一度緩和過，點知就喺我哋去旅行期間，佢忽然又開始摞返地，有咩唔啱心水即刻坐低唔起身亦唔出聲，你叫佢起身佢就好得戚咁望住你，反而你夾硬捉走佢知道事敗先會嘈，由於去旅行時生活唔規律，小朋友難習慣同佢明顯表現無安全感，所以我哋當時都無好嚴厲咁罰佢，只係抱起佢行埋一邊講道理，佢肯道歉就算，點知佢返到香港都仲係咁，艾菲就決定要嚴懲，每次摞地都會即刻捉佢罰企，加事後好惡咁話佢，明顯話咗佢一星期之後係好咗少少，無再郁D就摞地。

點知佢原來唔係從此就範，而只係將佢嘅行動升級用另一個方式表達，就係直接用把口來鬧艾菲﹗有咩佢唔啱聽嘅，又或者佢知自己理虧咗嘅嘢，佢就會先下手為強「唔」一聲來話艾菲，例如佢食餅食到跌咗落地，艾菲話跌咗污糟唔食得，佢就會即刻「唔」加用對眼啤艾菲一下，如果艾菲堅持再講佢會再「唔」多聲，繼而就開始發癲大叫，艾菲stop佢叫佢冷靜，佢會用更加大聲叫來反駁艾菲，最終艾菲只得一個選擇，就係的佢去naughty corner到企，直至佢冷靜落來為止。

北海道名古屋之旅～Day 4 知床>網走 part 2

離開知床之後，我哋就向住網走嘅方向走，期間路過斜里超長超直嘅國道334同244號線，全長大約有18km，係日本旅遊書推介嘅影相位來，可惜當日一直落雨天陰陰，影唔到個震撼效果出來。




而來到網走嘅第一站就去咗北浜駅，呢個站係個對住鄂霍次克海嘅無人木造車站，亦係《非誠勿擾》入面笑笑佢哋來到北海道落車嘅車站，只可惜燒腩仔午睡中畀我哋整醒，keep住屎面無mood欣賞。

呢到因為《非誠勿擾》而出名，吸引咗好多中國人來，睇車站入面遊客留低嘅卡片同字條就知，當然都有唔少香港人即我哋慕名而來啦﹗

北海道名古屋之旅～Day 4 知床>網走 part 1

喺香港出發前睇天氣都知呢幾日北海道會落雨，呢日瞓醒一覺見到天陰陰就知避唔過，即刻放定燒腩仔件雨褸落袋，果然出車無耐就開始落雨，不過旅行嘅嘢就係咁，邊有次次大晴天好風景，好彩上次艾菲同米高來過，要玩嘅出海睇岩石同睇熊人，仲有上山睇瀑布都去晒，今次帶住燒腩仔只係想簡簡單單，hea吓回味吓呢個被列為世界自然遺產嘅地方。



呢日行程嘅第一站係去知床五湖，睇五湖有兩個方法，第一個係畀錢申請入湖行山（只開放部份月份，同有機會撞到熊人），咁就可以慢慢行慢慢欣賞晒五個湖，第二個就係行呢D輪椅同BB車都推到入去嘅高架橋，不過只係會睇到一湖同多人，因為我哋上次已經行過晒五湖，今次又帶住燒腩仔，所以就揀咗後者簡單D，但就超好彩咁一落車就撞到個強國團，嘈到呢...



為咗避開班強國人，我哋唯有摩打腳唔停咁向前行，終於早過佢哋到達一湖，原先以為可以靜靜地欣賞吓風景一陣，點知有幾個先頭部隊嘅強國阿叔到咗，仲堅到對住個山扮雀仔大叫，真係咩事呀？有病唔該睇醫生啦﹗

北海道名古屋之旅～Day 3 阿寒湖>知床 part 2

離開摩周湖之後我哋就全速趕去知床民宿，由於呢朝實在太早起身焗飯畀燒腩仔，所以一上車就同燒腩仔雙雙瞓到隻豬咁，瞓咗好一段時間之後忽然畀米高拍醒問艾菲使唔使落車影相，艾菲用未瞓醒mode望一望出面，心諗都無咩特別姐，跟住求其影咗幾影就叫米高開車走，點知佢將架車調頭艾菲先見到對面原來有一大塊麥田，喺日落嘅太陽照耀下變咗金黃色超級靚，米高先話頭先見到有兩個龍友專登停車走落田影相（艾菲：咁你又唔早D講清楚...），艾菲即刻跟隊跳車影咗陣相，嘻...呢個就係自駕遊嘅好處，鐘意喺邊停就喺邊停。



啱啱好傍晚六點前到達是晚民宿航燈，呢間民宿出名咩呢？就係海邊睇日落，米高話佢有間三人房係有個對住海嘅露台好正，但我哋今次就book唔到，不過間房都係全海景嘅。

北海道名古屋之旅～Day 3 阿寒湖>知床 part 1

呢日酒店唔包早餐，所以我哋一早check out去咗附近餐廳食牛丼，之後就出發去阿寒湖，有D人會喺阿寒湖住一日浸吓溫泉，不過我哋就只係路過性質。

坐咗半日車接近中午時份先到，一落車就見到呢D愛奴族嘅幸運之神公仔，都係嗰句啦...人哋連個沆渠蓋都靚過人...



呢到有條愛奴村同溫泉街，不過實在太遊客區feel，完全唔係艾菲杯茶，唯一係呢間龍貓專門店比較吸引，但行咗陣都無買到嘢。

阿茂整餅？﹗

寫咗幾日遊記，忍唔住要插返篇燒腩仔整蛋糕嘅blog，因為艾菲實在覺得專心整蛋糕嘅燒腩仔太太太太太吸引啦﹗﹗﹗

之前佢篇22個月成長日誌都有提過，燒腩仔本身係超鐘意食蛋糕，跟我哋去完日本食咗咁多好味蛋糕之後，就更加係無蛋糕不歡，鐘意程度係佢上咗成個幾月嘅游水堂，無論教練同艾菲點氹佢都唔肯試吓潛落水，不過上一堂艾菲只係講一句「你肯潛落水媽媽請你食蛋糕」，佢終於勉為其難咁畀艾菲將佢個頭潛落水，仲要一共潛咗三次添，雖則每次上返水都鬼殺咁嘈，但都已經好叻仔有突破啦﹗

而為咗履行承諾，艾菲襯早幾日有時間又有精神，就決定整蛋糕畀佢食，然後唔知邊到來嘅勇氣，居然夠膽問燒腩仔想唔想一齊整蛋糕，蛋糕怪燒腩仔梗係即刻好興奮咁答「想」啦﹗艾菲聽完佢嘅答案先知死，即刻頭痕到底有咩可以畀佢幫手...＞.<



諗咗陣之後艾菲決定豁出去啦， 雖則自己一個整一定快靚正好多，但畀燒腩仔一齊玩佢又肯定會好開心同滿足感大D，於是執好材料就成堆工具搬出廳啦，D工具都無咩特別，只係畀小朋友一齊玩，就盡量揀D打唔爛同大D嘅碗來用，不過都要讚吓燒腩仔真係好乖，知道有份幫手整蛋糕之後，即刻坐喺廚房門口等艾菲慢慢準備，仲無手多多咁將全部嘢拉落地，艾菲叫佢做咩就做咩超合作。



燒腩仔：好開心呀﹗媽媽話畀我幫手整蛋糕呀﹗

北海道名古屋之旅～Day 2 札幌>帶廣 part 2

離開靜內坐咗兩個鐘車，差唔多五點先終於來到十勝附近嘅道之駅，本來過來係一心諗住買新鮮粟米食，點知D檔攤已經開始收，得返呢D賣蛋機同汽水機，雖然燒腩仔好鐘意佢哋不停狂㩒狂扭，不過就完全填唔飽我哋嘅肚，最後艾菲連水尾軟雪糕都照殺，即人哋一個普通街邊軟雪糕都真係好香好好味喎﹗



搞咗日幾，終於來到第一個正式景點，幸福駅﹗其實艾菲同米高三年前已經來過，呢到係一個停用咗嘅火車站來，由前一個站愛國（即愛之國度）來到幸福站，一聽就知係sell浪漫啦，不過我哋今次就帶埋個強力電燈膽燒腩仔來，成件事即刻變得一D都唔浪漫囉﹗>.<



呢到好似火車博物館咁，放咗兩架舊式火車係到畀人上去參觀，燒腩仔上到車即刻周圍跑周圍擒，追到米高氣到咳呢...

北海道名古屋之旅～Day 2 札幌>帶廣 part 1

既然起咗團火就唔好畀佢熄，繼續努力寫遊記先，由於執相時發現實在太多相，又由於艾菲想寫得仔細D，所以呢日開始已經要分兩part寫，well...咁寫法分分鐘成個月都未寫完，不過艾菲應該唔會畀自己爛尾，希望大家唔會睇到覺得悶啦﹗



由於呢次旅程，負責book酒店嘅米高話日本D酒店唔興加BB床（好似話關消防條例事喎），所以我哋呢十二晚都要同燒腩仔一齊瞓，向來都係同燒腩仔分床瞓嘅艾菲當然好唔慣，而呢一朝起身只係去個洗手間出來，就見到呢個小朋友已經瞓到大字型碌咗出來床中間，大家可以想像平日夜晚佢有幾反瞓，畀佢踢醒都已經係小事，最經典係有一晚矇矇朧朧間呯一聲畀佢個鐵頭撞咗落艾菲隻眼到，痛到艾菲叫晒救命﹗第二朝眼角仲明顯瘀咗一撻添呀﹗自此以後艾菲打死唔瞓佢隔離﹗一見佢轉身已經驚到即刻醒﹗



大人準備好先叫燒腩仔起身，每朝先係房畀盒奶佢飲再帶佢出去食早餐，第一日飲日本奶嘅佢仲開心到不停話「好飲」，但到最後幾日已經飲到唔願飲囉，而呢日酒店有包早餐buffet，D食物都好豐富同好味，最欣賞就係佢放咗一大棟麵包超人碟同杯畀小朋友任用，讚﹗

北海道名古屋之旅～Day 1 HK>札幌

雖然D相仲未執完，不過唔想拖吓拖吓無件事，都係快手寫返低個遊記先...



旅程嘅第一日主要都係飛機中度過，因為asia miles換飛基本上都無可能換到直航機去北海道，所以我哋今次揀咗去名古屋轉機順便stay over玩吓，亦由於要就轉機時間而揀咗十點三早機出發，坐早機對艾菲同米高來講當然無問題，但就擔心平日慣咗瞓到九點幾先起身嘅燒腩仔會唔會扭計，好彩事前都同佢做定輔導，當日六點幾叫醒佢都好合作，仲第一句就同我哋話「坐飛機啦」，乖乖地飲完杯奶就跟我哋出門口。



甚少暑假peak season出門嘅我哋，去到機場先知呢D月份原來係咁多人， 就連落的士都要排隊等位，寄行李條隊更加係打晒蛇餅，不過我哋架機delay咗成個鐘，所以搞完一輪仲有大把時間剩，過完關食埋早餐去埋gate 23玩，埋到閘口仲有時間同燒腩仔慢慢影相，佢見到架飛機即刻超興奮咁撲埋塊玻璃到，叫咗好耐先叫到佢擰轉身畀艾菲影吓相呀﹗

22個月

「ABCDEFG...」嘻...我去完旅行返咗來差唔多成個星期啦﹗不過媽媽話旅行返來好忙，要爭取時間休息又要執屋來個大清潔，D相仲未得閒揀，遊記未咁快出得街住，咁就準時出咗我篇22個月成長日誌先啦﹗



先講飲食狀況啦，都係一日四餐早午晚加下午茶，只係朝早會飲奶，係屋企的話主打食BB餐，但出街都多咗食大人食物，尤其係之前去旅行，只得兩餐係媽媽自己煮（艾菲：仲要煮完唔食添），不過去旅行時胃口好差， 幾乎絕食咁滯每餐只肯食1/4碗飯（平時胃口好時可以食到碗半飯㗎﹗），唔肯自己食之餘，仲好鐘意摞返D食物出來，而且會揀飲擇食話唔食菜唔食粟米唔食飯只食肉，搞到肥肚腩都縮晒，直至返到香港第二日去婆婆到走一轉先慢慢回復返正常。

後來爸爸同我刷牙時終於發現我右上顎爆咗一角仔大牙出來，另外都見到下顎兩舊牙骨開始現出來，佢哋先明點解我呢排成日唔願食飯又成日咬人，媽媽話念在我22個月仲係得八隻牙，難得有牙肯生出來就姑且包容吓我喎。