小幫手備年篇

每年農曆新年前艾菲都係忙到一頭煙，今年早過年情況就更加嚴重，就連大掃除都無乜點掃過（唔...其實平時都有keep住執屋嘅），好彩我家小幫手燒腩仔尚算合作，叫佢幫手做呢樣做嗰樣都即時埋位，認真完成我哋畀佢嘅每一樣小任務。



今年無正式大掃除，不過年三十晚點都要執吓屋吸吓塵，燒腩仔今年無再搶住幫手，但就主動跳咗入BB豆豬張床同妹妹玩，難得一見嘅相親相愛仲笑到咔咔聲，又等有黐媽症嘅BB豆豬可以放過艾菲一陣，抵錫﹗



等艾菲做完基本清潔，就到燒腩仔出場入全盒啦﹗今年我哋連瓜子都無買（無乜人食年年都剩好多好浪費），全個全盒都係放燒腩仔至愛嘅糖同朱古力，佢梗係出盡全力塞晒落去，話咁快已經放到蓋到閂唔埋咁滯。

行年宵＠維園

一如往年，艾菲唔去一去維園年宵係唔安樂㗎，原先想好似上年咁第一日入場，但今年第一日原來係星期日，預計都會多人就無揀呢日去，改喺星期二燒腩仔學校親子年宵嘉年華之後去，貪平日夜晚又未到年廿八應該無咁多人，而且第二日燒腩仔放假玩夜D都唔怕嘛。



學校年宵嘉年華去到四點，見未有耐到米高放工，艾菲就一早plan定去中央圖書館餵奶，仲預先book好玩具圖書館，畀兩個小朋友好好消磨時間，玩完啱啱好米高就來接我哋，為免我哋行來行去，米高仲建議我哋喺中央圖書館樓下嘅Delifrance到食晚餐，實行一站式吃喝玩樂，大人細路都對呢個安排相當滿意呢﹗

自家揮春2017

一年一度自家揮春又來啦﹗上年大住肚都整到，今年BB豆豬出咗世，更加無理由唔整，而今年艾菲更加係決心來個大革新，轉過個底色又轉埋字款，又另外自己𠝹咗D新圖來做配圖（原來宜家已經無乜free PSD圖download），感覺叫做無咁悶囉﹗



唔覺唔覺已經係第四年自己整揮春，小model一埋位大概都知要影D咩，原先諗住快快手手搞掂收工去玩，點知...呢兩兄妹好似食錯藥咁，平日笑點其低嘅BB豆豬居然點氹都唔笑，而燒腩仔就故意搞搞震唔合作，唔係整D騎呢樣出來就係唔望鏡頭，兩兄妹合照永遠一個笑一個唔笑，搞到艾菲同助手米高都無晒癮，最終連衫都懶換（本來一人有三套衫）求其影夠收工，反而上年超唔合作嘅表妹仔今年又超合作喎，一個鐘內極速完成，所以話呢...小朋友永遠都係估你唔到，同佢哋影相分分鐘難過中六合彩﹗

卡通毛巾＠淘寶

上一篇blog講過，為咗整咬咬巾艾菲喺淘寶到搵咗幾日毛巾，但睇來睇去價錢都係偏貴，雖則以呢個價買扮有牌子嘅毛巾係抵，但艾菲要嘅唔係牌子嘛，終於皇天不負有心人，畀艾菲搵到呢間外貿卡通毛巾浴巾制品嘅鋪頭，under兩蚊人仔買到一條卡通毛巾， 仲要個公仔係靚靚仔仔無走樣，質地又OK㗎喎，大大大推介呀﹗



首先出場嘅有燒腩仔至愛McQueen，16x16cm大，盛惠一蚊人仔一條﹗平到你唔信﹗艾菲睇晒商品介紹同評價先敢買，收貨前都擔心係會有咩瑕疵，結果唯一搵到嘅瑕疵就係唔夠四四方方囉，完全不影響日常使用﹗



除咗McQueen之外，仲有Toy Story同Minion，同樣係一蚊人仔一條﹗

DIY咬咬巾

自從BB豆豬出世後，燒腩仔姨媽就畀咗條舊hip seat艾菲用，雖則係淘寶貨，但用落都OK舒服，唯獨係條咬咬巾，口腔期嘅BB豆豬時不時會舐條咬咬巾，所以一直想同佢換過條新（始終表姐仔咬過嘛），但原來唔係周圍有得買，睇FB代購日本款甚至淘寶搵，價錢都係偏貴感覺唔多值，終於把心一橫決定自己DIY。



要整咬咬巾，首先要準備好同款毛巾仔兩條，20cmx20cm呢個size就啱啱好，放落條帶到唔太長又唔太短，花款最好揀碎花，因為就算有靚靚大公仔，摺咗三摺後都唔會睇到，艾菲呢四條係淘寶淘返來，純棉之餘面料仲要係紗布料來，啱晒畀BB豆豬用，而最最最重要一點係盛惠1.6人仔一條﹗﹗﹗（同店仲有好多靚靚卡通毛巾，下篇blog介紹）



除咗毛巾，另一樣要準備嘅就係啪鈕，原先艾菲瘋狂到想淘部啪鈕機返來（整連芯被D膠啪鈕），諗住成日DIY總會有用，不過後尾路過AEON十二蚊店先醒起有呢種用針線聯嘅啪鈕，反正咬咬巾唔會成日除落來，用呢種啪鈕都已經夠。

周日行山團~鰂魚涌>大潭水塘

終於清晒2016年嘅blog，可以講返2017年嘅嘢，話說今年嘅新年願望係行多D山，keep住郁動吓健康D，順便訓練吓燒腩仔嘅耐力，所以上次去完南丫島，艾菲同米高已經plan定去大潭，然後前一個星期日，明明熱到艾菲都想偷吓懶，點知燒腩仔唔知挑起邊條筋，喺星期六晚同我哋講想去行山，見佢都幾堅持就決定gogogo啦﹗



呢段路其實四年前我哋已經帶燒腩仔來過，當時全靠米高推住BB車推只得四個月大嘅燒腩仔行，今次再來燒腩仔已經識行識走，真係大個仔啦﹗



我哋一如四年前一樣，由鰂魚涌出發上栢架山，經大風坳再去大潭水塘，雖然沿路都係石屎路兼無樓梯，不過呢日大太陽仲要無風，其實都幾惡頂，好彩我哋一早帶定冰水，芭蕉扇同大量零食旁身。

自家頭飾

想寫自家頭飾呢篇blog好耐，不過拖吓又一個月拖吓又一個月，都係時候趁清blog出埋去，幫自己2016年下半年嘅小手作來個總結先。

眾所周知，生女嘅好處係可以幫個女扮靚，喺衫褲鞋襪方面基本上唔到艾菲操心，表姐仔一袋又一袋嘅靚衫塞爆晒屋企嘅衣櫃，所以艾菲轉而專注喺頭飾方面，尤其BB豆豬唔算多頭髮，唔帶頭飾出街就會畀人問係唔係弟弟，然後有日收到朋友嘅朋友親手整嘅小髮夾，再上網睇片研究咗一輪，發現自己整一D都唔難，自此開始沉淪喺呢門小手作嘅毒海裡...



呢個深藍色千島格嘅母女頭飾係艾菲第一個整畀BB豆豬同自己嘅頭飾，專門襯返我哋嘅母女裙，艾菲向來都唔係點打扮自己（實情係唔識啦），但帶上頭箍後感覺都OK唔會太浮誇喎。



BB豆豬個headband係由一個深藍色大蝴蝶托起個千島格孖蝴蝶，簡簡單單又不失高貴，用來襯裙仔最好，而且條橡筋帶好襟用，由三個月帶到宜家八個月都仲啱帶呢﹗

草地相@啟德跑道公園

望住BB豆豬一日一日大，眼見佢越坐越好，艾菲就記掛住要同佢影返張草地相，皆因燒腩仔當年有張好sharp醒嘅草地相，公平起見艾菲好想BB豆豬都影返張，但要艾菲宜家嘅身世帶住佢哋去老遠嘅數碼港影，未免係太搵自己笨嘅idea，記得上次去啟德跑道公園參加Red Bull飛行日，用iphone hea影個大草地出來嘅效果都幾靚，所以燒腩仔同學約除夕gathering時，艾菲就有D私心地推介咗啟德跑道公園呢個地方。



好開心呢日唔太凍又有大太陽，加上呢到只得大草地無遊樂設施，一定唔會好似佐敦谷咁旺場，自己一班小朋友坐埋一個角落瘋狂地亂跑亂叫都得。



為食嘅燒腩仔一去到，最記掛嘅竟然係艾菲買畀佢嘅巨型棉花糖，食完先捨得同同學仔去玩，不過又好快已經玩到進入瘋狂狀態。

開蓬巴士初體驗

燒腩仔係個典型交通工具迷，咁多種交通工具入面，尤其鐘意巴士同火車（即東鐵），唔知由幾時開始佢發現咗呢個世界除咗有開蓬跑車，仲有樣嘢叫開蓬巴士，於是每次路過中環碼頭同油尖旺，見到開蓬巴士就話想坐，眼見個仔咁恨坐艾菲當然想成全（慈母...），但畀幾百蚊一位坐的話米高實話唔值，好彩後來發現新巴嘅開蓬巴士有單程坐，盛惠$33一位（小童$16.5），呢個價夠晒合理啦﹗



呢日我哋去完香港公園，就行過纜車站坐巴士落中環天星碼頭準備坐六點鐘車出發（半個鐘一班），燒腩仔知道之後一直滿心歡喜，沿路見到Big Bus嘅車就問我哋「一陣係唔係坐呢架」，路過Big Bus嘅車站仲傻瓜到唔肯行以為我哋行錯，解釋一輪佢先明我哋係坐新巴車，跟住企喺車站唔夠兩分鐘已經問「架車點解咁耐仲未到㗎」，心急得佢呢...



等咗陣架車終於來，司機叔叔話上得車我哋即上去揀個靚位坐，趁未開車又未天黑前影返張相先，不過...BB豆豬飲完下午茶奶一直唔肯瞓，直至我哋上車佢先來瞓囉。

長滑梯＠香港公園

知道香港公園條長滑梯開咗之後，艾菲一直想帶燒腩仔去朝聖，但知道新嘢實大把人去，又喺FB見過星期日排長龍玩滑梯嘅相，所以一再押後靜待時機，咁啱燒腩仔聖誕假期間有事要同佢出中環走轉，於是約定米高搞掂就一齊去玩﹗



順應燒腩仔要求，一家四口齊齊由中環逼叮叮落金鐘，一落車就見到Pacific Place呢棵大聖誕樹，今年好似無乜邊個商場有咁大又咁傳統嘅聖誕樹，難得見到當然要影返張相，然後就陪放半日仲未食lunch嘅米高去買D嘢食。



搞掂就坐扶手電梯上香港公園，見仲有幾日就係聖誕，艾菲呢日特別同BB豆豬帶咗自家製聖誕headband，至於燒腩仔都帶咗個聖誕老人閃燈心口針，又艾菲事後睇返相先發現自己當日同BB豆豬原來係同色系間條襯到絕，嘻...

八個月

Hi! Hi! 我八個月大啦﹗媽媽又遲咗成個星期先畀我出場，不過佢話呢排好忙好多嘢排住隊要做，所以畀我插隊出呢篇blog已經好好喎﹗



宜家我每日都會食兩餐粥仔，由於媽媽無以前餵哥哥咁緊張，所以呢個月只係加咗節瓜，蕃薯，粟米，蛋黃，洋蔥，魚肉，奇異果同士多啤梨呢幾樣新食物，而我就因為忽然感冒胃口變得好差，由之前廿分鐘食到一大碗粥，進展到最近半個鐘都食唔到三分一碗，搞到媽媽都餵到無晒心機，好彩呢排鼻水停咗又食返好D。

不吐不快

又消失咗好幾日，除咗因為鼻敏感到勁唔舒服之外，亦因為畀兩個高需求小朋友搞到身心俱疲，排住好多篇blog想寫，但呢一刻真係想幫自己嘅情緒搵個出口。

有睇開艾菲blog嘅朋友仔應該都知道，燒腩仔一向係個情感上比較敏感嘅小朋友，由兩歲開始就日扭夜扭無無謂謂乜都可以扭一大餐，起初以為只係trouble 2同terrible 3，眼見佢升K2後明顯有改善，仲老懷安慰以為終於捱完，點知放假前一排開始佢D情緒又忽然來料，放假後更加係變本加厲日日大玩不合作運動，呢幾日單係處理佢嘅問題艾菲大概嘔咗一噸血都有，有日甚至同佢嘈到失聲添（想像到有激動嗎...）﹗

一直以為佢只係屋企或見到艾菲先係咁，但原來呢個問題都有延續到返學校，今日去接放學時就畀燒腩仔班主任捉住傾咗陣，當然老師講嘅除咗情緒外仲有其他嘢（都係唔好嘢，但詳情唔講啦），然後有個傻瓜媽媽一個人湊住兩個細返娘家，坐喺巴士到望住一臉稚氣嘅燒腩仔，揹住扭緊眼瞓嘈咗半程車嘅BB豆豬，堅係想咩都唔理爆喊出來，可惜嘅係艾菲任性唔來唔想嚇親燒腩仔，於是眼淚只好通通往心裡流。

其實老師講嘅都唔係D咩大問題，雖然要跟進但大家都覺得情況唔算嚴重，只係忽然有個外來嘅第三者叫你去面對一D問題，作為當事人嘅心裡總係唔多好受，而且對於燒腩仔兩年幾來反反覆覆嘅情緒問題，艾菲實在係受夠啦，再加上BB豆豬最近黐媽症超級嚴重，艾菲困身無氣抖之餘亦明知燒腩仔嘅情緒有大部分係來自妹妹，就更覺無奈同無助...

Happy 2017!

Happy New Year! 雖然仲有好多聖誕假嘅嘢未blog，但作為2017年第一篇blog，先送上2016年最後一日影到嘅開心兄妹相畀大家，祝大家來緊一年多D歡樂少D煩惱，一家人齊齊整整身體健康，繼續過住sweet sweet嘅幸福生活﹗

回顧剛過去嘅2016年，絕對係幸福滿滿嘅一年，BB豆豬順利平安地來到我哋屋企，令我哋呢個家更加圓滿，呢一切對我哋來講絕對係得來不易，所以艾菲不時都會提醒自己要珍惜眼前人，盡心守護呢個家，愛錫呢三個至愛。

當然有開心亦有唔開心嘅事，一年入面有起總會有跌，老實講一湊二嘅生活係可以好癲，尤其大小BB一齊用喊聲來合唱時，堅係想咩都唔理喊埋一份，但艾菲感恩每次難過失意之時，背後總有米高同燒腩仔婆婆撐住，而燒腩仔亦開始懂性，雖然扭擰鬧事跳掣仍時有發生，不過相對之前兩年來講算係易搞咗好多。

展望2017年，最重要一定係身體健康，其次就係一家人和和氣氣，彼此之間嘅溝通要再做得好D，燒腩仔多D配合我哋少D扭擰搗蛋，BB豆豬瞓多D食多D再長多D肉，米高工作順利賺多D錢養我哋兼再體諒艾菲多D，艾菲就要努力一湊二之餘亦要多D關心米高，同時兼顧好媽媽同太太嘅角色﹗