九州東京之旅~Day10 鐵道博物館>上野>秋葉原part2

離開鐵道博物館後，我哋去咗上野尋寶，呢到係我哋每次去東京都必到之地，去多慶屋買吓手信，幫襯水果店食吓平靚正水果，慢慢行吓D鋪頭仔，搵吓D平價波鞋（當然唔會係新款）運動衫，陪米高睇吓golf用品，今次我哋都抱住同樣嘅心情過來，點知...遇著燒腩仔瞓未醒屎面一張，再加上突然其來嘅一場大雨，我哋團火即時被淋熄晒。



六年後重遊舊地，米高話呢到好多嘢都變咗，主要係覺得呢邊旅遊區味道重咗，遊客多咗連帶明搵遊客錢嘅鋪頭都多咗，反而以前幫襯開嘅地道小鋪所剩無幾，我哋冒住雨行咗一大條街後都無mood再行落去，米高求其買咗兩串水果氹返個仔開心就放棄。



然後我哋循例去多慶屋買咗D手信，平呢其實就唔算特別平，不過一場來到又勝在夠集中，點都掃返D零食，送禮自用都好。

九州東京之旅~Day10 鐵道博物館>上野>秋葉原part1

作為一個超級車迷，來到東京點可能唔去鐵道博物館，而為咗可以趕喺十點博物館開門時到，幫燒腩仔拎揸小火車張籌，我哋只好七點幾就爬起身出發（艾菲同米高真係廿四孝到呢...）。



我哋坐火車過去，沿路要轉兩程車，電車男當然把握機會霸個頭位睇司機叔叔揸車，而喺轉車時忽然見到好多途人向住對面月台架火車影相，我哋望過去見到有班記者之類嘅人不停喺車入面影相，車廂入面嘅設計亦好似好豪華咁，估計係新車落地要對外介紹，我哋都無執輪影返張相先。



匆匆忙忙咁趕到去大宮站，有個心急嘅爸爸因為怕遲到拎唔到籌，猛催我哋行快D，不過一見到鋪頭就分晒心嘅艾菲，再加上未瞓醒嘅燒腩仔，基本上係佢急我哋唔急，然後行到去轉車站附近，忽然見到有個姐姐拎住個宣傳牌介紹呢張紀念飛，雖然艾菲唔識日文但都feel到應該係著數嘢，及時叫停準備㩒飛嘅米高望一望，同樣價錢嘅紀念飛，坐完可以自己keep返，㩒飛仔就要交返入閘機，作為遊客梗係買紀念飛留念啦﹗

18 & 19個月

Hello！Hello！大家有無好掛住我呀﹗媽媽話要同大家講聲sorry喎，由於呢個月實在發生咗太多突發事（哥哥忽然跌穿頭，小一安排又有D意料之外嘅變動），再加上佢私務繁忙，兼夾我哋兩母女又齊齊打敗仗病咗，所以我歲半成長進度要同19個月嘅合拼一齊出。



未講進度前先講吓我歲半去健康院打針嘅威水史，話說呢日係媽媽第一次單拖同我去打針，咁我亦只係度高磅重時有D扭擰，其餘媽媽見姑娘傾偈時我都無搞搞震，體重高度繼續keep住自己條成長線，講嘢進度亦啱啱好追到標準，唔使兩歲再返來，然後就到媽媽事後狂讚我嘅打針部分，事前媽媽有brief過我「涼浸浸抹一抹再桔一吓」，但去到聽到其他小朋友爆喊聲都不其然整咗個衰樣出來，不過到我打針時我真係一聲都無喊過呀，只係望住姑娘枝針皺咗一皺眉咋，媽媽見我咁叻女咁合作，出來當然係奬我星星餅放題任食啦﹗YEAH！

九州東京之旅~Day9 宮崎>東京 part2

坐咗個半鐘飛機，話都無咁快我哋就到咗東京啦啦啦啦啦...數數手指原來已經有成六年無來，對於以前幾乎一年來一次嘅米高同艾菲來講，呢六年實在係好漫長，其實今次book機票前都猶豫咗陣，始終帶住兩個小朋友，東京太急趕嘅食買玩行程未必啱佢哋，不過米高一句「錯過咗今次唔知下次幾時」，唔...辛苦D就辛苦D啦﹗東京﹗我哋來啦﹗



推住兩個大行李（其中一個仲已經畀人落咗heavy tag）加一架BB車，再拖住兩個都未太懂性嘅小朋友，為咗避免拎住咁多嘢逼山手線咁狼狽，再喺JR站嘅樓梯搬行李搬到手殘，米高決定今次住喺濱松町站附近，羽田機場坐monorail可以直達兼有電梯到出口，一上車同燒腩仔講呢架係東京嘅機鐵，車迷燒腩仔即開心到V晒手任艾菲影。



出站後推住行李行咗十分鐘左右，就到我哋今次喺東京住嘅酒店濱松町Hotel Mystays，間房係就係細咗D，仲要無twin bed同BB床，要一家四口逼埋一齊瞓，不過勝在呢間房有東京鐵塔景，而且拍埋張床埋牆後，都夠位畀我哋開行李執吓D戰利品，以東京標準來講都算係咁㗎啦。

九州東京之旅~Day9 宮崎>東京 part1

話都無咁快就來到九州最後一日，呢日嘅行程只得兩個，第一個係去食燒肉，第二個就係飛東京，我哋一早起身check out酒店，行晒宮崎站嘅手信鋪都未夠鐘去開餐，無無聊聊就去咗燒肉店附近一間超市停低架車，見BB豆豬瞓咗艾菲就自己同燒腩仔落車逛，漫無目的嘅兩母子喺間超市到亂行，唔覺唔覺又行到去薯片蝦條陣前面，忽然叮一聲畀艾菲見到包卡樂B春夏限定嘅櫻花蝦蝦條，記憶中來咗咁多日行咗咁多間超市都未見過，即刻拎包去收銀畀錢，直至返來香港開來食即後悔買得一包咁少，因為佢真係好香櫻花蝦味好好味呀﹗



等到人哋夠鐘開鋪我哋即殺入去開餐﹗最近睇《森美旅行團》，聽到佢講去日本一家大細又想食好嘢，要揀午餐時段皆因價錢平晚餐一大截又唔使點等位，艾菲聽完即刻會心微笑，皆因米高一向都係咁嘅作風，呢餐佢話要帶艾菲食好嘢，去咗呢間喺宮崎好多分店好出名嘅夾竹園燒肉店。



嘩嘩嘩﹗宮崎牛呀﹗終於都畀我哋食到你啦﹗D牛肉嘅雪花靚到呢...睇見都流口水呀﹗

九州東京之旅~Day8 宮崎 part2

開車後BB豆豬同燒腩仔都好快瞓著，艾菲好自然都跟住一齊瞓，然後經過九曲十三彎嘅山路，飄移咗個幾鐘後我哋就到都井岬，來呢到最主要目的係睇馬，呢到係大概有300年歷史嘅御騎馬嘅保護區，佢哋全部都係野生馬無人養要自行覓食，一入場都會有職員提醒遊客唔可以餵飼。



唔知係唔係天氣太曬太熱嘅關係，D馬都要暱埋避暑呢，所以好靚嘅馬群食草情景我哋無緣見到，但有出來嘅馬就係咁樣企喺路邊，同我哋遊客D車嘅距離係超級近，而且都唔係好怕人。



BB豆豬呢一覺瞓得好甜，我哋就無打擾佢由佢繼續瞓，而燒腩仔喺我哋到咗無耐就醒，但佢都掙扎咗好一段時間先肯落車，畢竟睇電視睇書同睇實物係唔同，真係識郁嘅個心點都會有D怯，我哋都明嘅。

九州東京之旅~Day8 宮崎 part1

呢朝喺酒店樓下便利店買個早餐，我哋就開車出發去日南海岸啦﹗呢日天氣好到你驚，超級熱加超級曬，一離開冷氣地方完全覺得自己喺個蒸爐入面咁，而好可惜嘅係咁好天霧霾依然強勁，藍天白雲依舊欠奉。



來咗九州八日，睇住BB豆豬D膚色一日比一日黑（艾菲同燒腩仔都易曬黑，但我哋轉頭會自然白返，BB豆豬呢應該係似米高就難白D），呢日一聽到米高話戶外地方多，仲話黃昏時份會去沙灘玩，點都同佢落重防曬同帶帽，前一晚Daiso買條Hello Kitty夾帽帶更加係即買即用。



千里迢迢咁走來日南Sun Messe為咗乜？之唔係為咗相後面七舊彷復活島摩艾石像，睇返資料就話呢到係世界上唯一一個地方擺放咗呢七個完整嘅彷摩艾石像，都算係好珍貴同難得一見，但呢D石像對小朋友來講...堅係零興趣同有D得人驚囉...

九州東京之旅~Day7 鹿兒島>宮崎 part2

一落船，我哋就向住足湯嘅地方進發，雖然呢日天氣唔好keep住天陰陰，不過呢到環境真係好唔錯好relax，有一望無際嘅無敵大海景。



可以睇返頭先坐過來嘅汽車渡輪，又有D奇形怪狀嘅火山溶岩睇。



講返個足湯，由於帶住小朋友嘅關係，米高今次無特別安排我哋浸溫泉，但原來燒腩仔係好期待㗎，應該係同學仔同佢講過掛，當我哋話帶佢去浸腳時，佢係異常咁興奮，仲話要剝衫剝褲乜都除晒咁浸，幾乎笑到艾菲標眼水，然後一坐低即伸隻腳入水，不過就嫌D水熱縮返上來，後尾適應咗就開始勁踢勁玩，叫極都唔識停咁，實在失禮死人﹗

九州東京之旅~Day7 鹿兒島>宮崎 part1

呢日我哋雖然要移動去宮崎，不過日間大部分時間都係繼續喺鹿兒島玩，喺酒店check out後就向住指宿方向進發，期間路過呢個錦江台展望公園，當時唔知行入去就可以睇到成個櫻島火山嘅靚景，只見有條橋幾靚幾特別，求其同燒腩仔睇吓橋底下D繡球花就走（好啦...艾菲認自己出發前係完全無做過功課，連每日會去邊做乜都唔知，仲要導遊米高當時留咗喺車睇住瞓咗嘅BB豆豬，所以miss咗個超靚影相位啦）。




之後我哋沿住指宿Skyline上山落山，沿路見到有靚景又停低影吓相，不過睇相都睇到呢日霧霾極嚴重，基本上D相係點影都唔會靚，可惜可惜...



跟住我哋路過池田湖，真係好大好清好靚，D山嘅倒影好似照鏡咁。

九州東京之旅~Day6 鹿兒島 part2

離開牧場後，我哋就起程去對面山，有成個山頭咁大嘅霧島高原遊樂場，但上到山頂只見一大片滑草場同餐廳，燒腩爸話想玩嘅電動車同高卡車完全唔見影，睇返遊樂場地圖先發現呢D設施喺山腰位置，所以即刻揸返車落山搵，然後一落車就見到呢個龍貓巴士站，好靚好真呀﹗



講好呢日行程係專為燒腩仔而設，揸高卡車係少不免嘅，出發啦﹗



好欣賞佢呢個雙軚盤嘅設計，燒腩仔真係以為自己有份揸㗎，開心到震﹗

九州東京之旅~Day6 鹿兒島 part1

呢日我哋終於可以遠離煩囂去郊野玩，但好可惜嘅係天氣keep住麻麻地，時晴時雨咁好估佢唔到，不過都無損我哋去玩嘅雅慶，我哋呢朝起身喺酒店房食D嘢就出發去霧島，話咁快就到咗第一個目的地高千穗牧場，一到埗泊好架車米高居然話呢到環境咁靚，放燒腩仔上車頭影相留念，艾菲仲以為佢講笑，點知佢堅認真兼即刻抱咗個仔上車，難得燒腩仔又唔抗拒喎，艾菲唯有滴住汗咁配合影相交差。



未行入牧場，燒腩仔已經指住側邊D羊話要餵小動物，所以入去前先捉住狀態仍然OK嘅兩個小朋友喺大門口影返張到此一遊。



入口側邊就係餵羊餵牛嘅地方，入去前有人勁興奮，V晒手畀艾菲影相，搶住要我哋畀佢去餵動物。

17個月

O...YEAH!!!雖然媽媽D遊記追到氣咳都未寫完，不過唔覺唔覺我又大一個月，佢話要讓一讓路畀我出場先呀﹗聽到呢個消息真係開心到我不得了，大家就暫且畀我不顧儀態笑一陣啦﹗kakaka...



先講我強項食，宜家一日三餐固體食得非常好，午餐晚餐座底一大碗有菜有肉嘅飯，大人一話開餐就會自動埋位上high chair，搶住自己拎起枝匙起勢咁食，有時媽媽唔得閒理我，真係放低碗飯我就自己搞掂， 有時會筆到枱面同口水肩都係飯（艾菲：佢每匙都對準目標放入口，基本上係無乜跌落地），但我好企理會出手執返晒，到最後媽媽埋來清理時一定係佢可以接受嘅污糟程度。

食飽自己碗飯到大人開餐，我又會用好誠懇嘅眼神不停叫大人畀D我食，有時都成功呃多成碗飯返來，尤其有麵或烏冬我多多都食得落，個個同過我一齊食飯嘅大人都讚我好食得㗎﹗亦之所以我宜家個肚腩越來越圓碌碌，同得返排骨嘅哥哥真係好大對比﹗

九州東京之旅~Day5 福岡>鹿兒島 part2

來到鹿兒島已經天黑，所以匆匆喺酒店放低行李，準備好BB豆豬嘅晚餐，我哋就出去搵食，來到城市地方，我哋習慣唔揸車（怕塞車），順便畀燒腩仔試吓坐鹿兒島電車，電車男對我哋呢個安排當然係相當滿意。



電車來到鹿兒島站我哋就落車，沿住一條暗黑長街行去黒かつ亭，呢到係專門食吉列薩摩黑豚嘅餐廳，米高係睇Yahoo Japan介紹搵到呢到，來到發現都幾多香港人，餐廳地方唔大但當晚至少有兩枱係講緊廣東話，我哋被安排坐喺tatami位，自成一角唔使怕燒腩仔同BB豆豬嘈到其他人。



快手餵飽BB豆豬就到我哋開餐啦﹗左邊係米高嘅吉列黑豚定食，右邊係艾菲嘅吉列海鮮定食，除咗超級好味艾菲都唔識點形容佢哋啦，尤其係個吉列帶子，第一啖唔識就咁食覺得平平無奇，第二啖試吓點D鹽個鮮味即刻走晒出來﹗推介推介呀﹗

九州東京之旅~Day5 福岡>鹿兒島 part1

好一個一波三折嘅遊記，千辛萬苦忙完燒腩仔開學同小一自行D嘢，以為終於有時間可以快手寫埋佢，連相都一早執好晒，點知就到電腦忽然死機，單係新舊機交接搞back up又通宵搞咗好幾晚，跟住又到燒腩仔生日，終於拖到今日同燒腩仔慶祝完，吊頸都要抖吓氣快手埋位先。



呢一朝起身我哋去酒店餐廳食埋早餐先慢慢check out，雖然前一日BB豆豬都已經無乜嘢好正常，但始終仲係觀察期間，睇見佢個呆樣艾菲始終有D擔心，直至呢朝起身見佢開始識笑，開始不停問我哋拎嘢食，又開始四圍走無時停，我哋估佢應該回復正常，艾菲個心總算定返D。



由於我哋之前同BB豆豬入醫院時係星期六凌晨，所以走嘅時候醫生同護士就提我哋星期一下午打電話返醫院找數，雖然佢哋話會計部嘅人識講英文，不過為免喺電話到雞同鴨講找唔到數拎唔到單claim唔到保險，米高都係決定改行程，返福岡走一轉親身去醫院找數，於是成朝無嘢好做我哋就去咗行醫院隔離間AEON Mall。



有得shopping，艾菲當然努力地尋寶，依然主攻童裝同玩具文具，一忍唔住手就跌錢，不過又買得好開心喎，個麵包超人夾可以寫名，可以用來夾佢兩個D學校通告文件之類，亦終於幫燒腩仔買到件casual得來都見得吓人嘅裇衫，來緊面試總算有件戰衣傍身。

九州東京之旅~Day4 佐賀>鳥棲 part2

食飽飽我哋就出發去鳥棲行Tosu Premium Outlet﹗其實出發前都問過啱啱來完嘅朋友，話呢到D嘢唔算好平，所以入去前真係無乜期望﹗



不過無乜期望還無乜期望，個天似乎點都要艾菲放低D銀兩先得，好日都唔著涼鞋一次，點解次次都係去旅行先來爛涼鞋呢？今次仲要行到甩底，即唔買唔得﹗唯有求其殺入Gap，又求其揀一對稍為似樣，即買即剪牌即著...



搞掂對鞋之後以為可以專心shopping，點知...米高忽然好驚嚇咁話唔見咗張信用卡﹗吓﹗又搞D咁嘅驚喜？然後佢自己返去車到搵，艾菲一拖二行住Gap等佢，好彩佢返來後話張卡原來放咗喺褲袋，又就喺呢短短嘅十幾分鐘入面，艾菲睇中咗件童裝牛仔裙畀自己，價錢唔係好抵但著上身都幾修身，重點係BB line都有條類似款，可以買埋畀BB豆豬一齊母女裝，所以完全無理香港有無都照買。