寒假一天＠青衣公園

星期一，特如其來嘅一天寒假，其實前一晚臨瞓前，屋企個天文台長米高已經話氣溫會回升，亦唔會好似早一日咁落雨，果然第二朝一覺瞓醒，雖然仍然係凍但陽光普照，感覺係溫暖咗好多，然後有個小朋友瞓醒一覺，見到爸爸竟然仲喺屋企（佢為咗陪艾菲覆診同唔想咁凍爬起身返工，一早已經拎咗全日假），係興奮到爬上我哋床尾勁歌熱舞自我放電，就連艾菲都唔多頂得住佢嘅瘋狂，所以話教署宣布停課，對家長來講未必係件好事，不過實際情況係有需要時，都要學會接受現實，返少日學為保小朋友健康安全，艾菲覺得自己湊得辛苦D都值嘅﹗



見到個仔充滿電力，米高就建議趁呢個難得嘅假期，去青衣公園走一趟以完艾菲一年一度之約，真心艾菲都掙扎咗一輪先肯出門口，教署宣布停課，唔係畀小朋友四圍玩，而係怕佢哋有危險所以叫佢哋留喺屋企，但眼見燒腩仔嘅hyper，唔帶佢出去跑吓跳吓，呢日我哋肯定好難過，而且天氣的確比預期中好，又有米高喺到幫手睇實應該安全，所以最終都決定出發去玩，先喺青衣城食個lunch，專登叫個兒童餐畀佢，罕有地掃清光唔使勞氣，Good﹗

DIY生日卡

記得細個時，艾菲嫲嫲每年生日，燒腩仔婆婆都會提醒我哋買生日禮物送畀老人家，艾菲覺得呢個都係一個好嘅教育來，尊敬同關愛長輩嘅message係要自小灌輸，來緊個星期五係燒腩仔婆婆六十大壽嘅大日子，我哋三個做仔女嘅就喺啱啱個星期日，請燒腩仔婆婆去食自助餐慶祝，咁做孫嘅燒腩仔都三歲大，係時候要做返D嘢啦﹗



同燒腩仔商量咗陣之後，佢都同意整張生日卡畀婆婆（梗係啦，婆婆平時咁錫佢），仲好興奮咁追咗艾菲幾日「有得整婆婆張聖誕卡未」:P，對於真係無乜美術底嘅艾菲來講，買現成嘅生日卡畀燒腩仔吸個名印貼吓貼紙就最方便，但諗吓諗吓又覺得無乜誠意咁，反正之前淘咗D大卡紙返來，正好係呢D時候用啦﹗

要畀一個只得三歲未識寫字嘅小朋友DIY生日卡，艾菲都諗咗成晚先諗到點搞，終於決定簡簡單單只畫一面，先將張卡紙用狗牙剪剪成所需size，然後簡單地喺上面畫個雙層蛋糕嘅圖案，之後就交畀燒腩仔負責填色，平時佢放學返來做功課都有時做到無心機hea做，難得今次佢係異常地興奮同用心喎，雖然都係油到出晒界，但艾菲覺得可以接受啦﹗



填好色就叫佢幫手用貼紙貼返Happy Birthday字樣，另外再貼一個6同一個0喺蛋糕頂扮蠟燭，貼好艾菲就用marker幫佢喺60字樣上畫蠟燭芯，再捉住佢手仔用手指畫印兩點燭光落去。

大肚媽媽也shopping@淘寶

原來對上一次寫淘物誌已經係上年六月嘅事，對於淘寶癮唔係好大嘅艾菲來講，呢大半年來都只係淘咗兩次嘢咁大把，對上一次因為啱啱有咗BB豆豬唔太舒服無寫，咁今次又來個大雜燴啦﹗



艾菲個肚一直都唔係好大，到宜家都仲未過34寸（應該仲細過燒腩仔同期），平日條牛仔褲當然一早就著唔落，但普通legging還可以嘅，再加埋之前陀燒腩仔時淘咗條大肚褲仲啱著，勉強都叫做夠著，但講到襯衫就點都好似買返條牛仔褲好，所以就淘咗條托腹牛仔褲返來，順手淘多兩條大肚legging，十幾廿蚊條legging，真心唔敢有咩期望，但著上身又OK舒服喎，而且最近天氣凍，落街包返實個肚係暖D，至於條牛仔褲亦的確係顯瘦款，著上身有返個腳型，都算唔錯。



淘開褲，反正搞集運就睇埋有無嘢啱BB豆豬，預產期係五月嘅BB豆豬，好肯定會係個馬騮妹，記得想當年都淘咗個手鈴同恐龍帽套裝返來親手整畀燒腩仔，為公平計都想整返D手作嘢畀妹妹，艾菲今次就揀咗整馬騮口水肩同馬騮妹鞋仔，睇圖好似幾靚咁，唔知艾菲幾時先會的起心肝整，又唔知整唔整到圖入面咁靚呢，嘻...

Lego寶盒

講完腳仔就輪到講手仔啦，燒腩仔嘅小手肌發展一向麻麻，加上個人都幾懶成日出口術要人幫，好多精細動作，連未足兩歲嘅表妹都做得比佢好，所以前年年尾睇BBG blog介紹呢個lego寶盒，艾菲第一時間準備一個畀佢玩。

呢個寶盒到底係咩來呢？詳情可以參考呢個台灣blog， 其實只需要喺個外國網站donwload同print D Lego 圖出來，剪開細細張，再準備相應數量同顏色嘅lego，畀小朋友跟住圖砌，既可以kill time，鍛練小手肌之餘亦可以訓練空間感，對燒腩仔來講相當適合，而且BBG媽媽教艾菲去皆旺商場地庫某間鋪仔到買lego，呢到廿幾舊lego按重量計只需廿幾蚊咋（唯一唔好係唔夠白色細lego，艾菲要用其他色代替，再自行喺圖到加工），成本極低呢﹗



前年年尾已經一早準備好嘅lego寶盒，因為燒腩仔D小手肌未OK拆唔到D細lego，所以一直拖到上年九月，燒腩仔姨媽問燒腩仔想要咩生日禮物，我哋先再拎出來畀佢試玩（當時掙扎緊要Lego Juniors定搖控車），終於喺接近三歲時玩到啦，教一次已經明點玩，仲話咁快跟圖砌好完全無錯，開心到佢呢﹗

行路問題＠聯合兒科

由燒腩仔識行開始，艾菲一直留意住佢嘅入字腳問題，到接近兩歲情況其實改善咗好多，但每次個人一攰就會好易跌，行商場又會經常啜地板行到就跌就跌咁，以前返N日日行長命樓梯返學放學，更加係一星期跌三四次，跌到膝頭長期有疤連老師都留意到問題，終於有次提議我哋返健康院跟進，於是艾菲就喺上年七八月，自己打去健康院約期見醫生同姑娘，評估一輪之後就寫咗一封轉介信畀我哋去聯合兒科。

事隔四個月之後，十二月中終於第一次去見醫生，而米高都好好咁請咗日假一齊陪診，去慣政府醫院覆診嘅艾菲都早有準備，預咗會勁多人同等勁耐，所以一早就同米高講早D出門口，早D去博早D睇完早D走，但有個小朋友係慣性出門前扭扭擰擰，結果我哋都唔早得幾多到...

去到艾菲即叫米高睇實燒腩仔，自己就拎齊文件排隊登記同俾錢，然後職員畀咗個紙杯燒腩仔留小便，再入檢查室度高磅重驗小便量血壓，之後就係無了期嘅等等等同等，最終我哋等咗差唔多一個鐘先有得見醫生，期間小朋友當然有D失控，亦唔知係唔係空氣唔太流通，燒腩仔塊面明顯敏感起晒一撻撻紅印。

入到房醫生同幫手嘅嬸嬸都好nice，醫生先問我哋屋企背景資料，再了解燒腩仔情況，然後就叫燒腩仔行一次畀佢睇，最後先除褲上床檢查，醫生一望都望到燒腩仔有輕微入字腳，而初步檢查腳仔後就話佢應該係膝頭嘅肌肉比較弱，所以成日行路會有所謂嘅「輪盡」情況，但安全計都建議抽血檢查有無一D肌肉酵素問題，另外安排我哋做物理治療，教燒腩仔用力用得好D。

弟弟？妹妹？

到底BB豆豬係男仔定女仔呢？一知道有咗無耐，艾菲已經不停問燒腩仔，艾菲一直相信小朋友對呢D嘢係最有感覺，而燒腩仔亦出奇地好堅定咁同艾菲講「BB豆豬係妹妹」，仲誇張到都未confirm，就一早同校車嘅姐姐講自己有個妹妹就來出世，聽到艾菲滴晒汗咁滯。

對上一次去Dr Wong到覆診前，艾菲又再問燒腩仔同樣嘅問題，但今次嘅答案就有D驚嚇啦...

艾菲：你估BB豆豬係妹妺定弟弟？
燒腩仔：妹妹﹗（超堅定嘅語氣）
艾菲：你好想要個妹妹？咁如果佢係弟弟點算？
燒腩仔：咁你咪再生過個囉﹗
艾菲：吓？（完全無諗過佢識咁講）爸爸媽媽唔會再生㗎啦喎﹗
燒腩仔：咁我會打死佢﹗﹗﹗
艾菲：打死佢？你點可以打死佢？你知唔知咩叫打死佢？你打死佢嘅話媽媽會好傷心㗎﹗就算BB豆豬係弟弟，你都要好錫佢先得㗎﹗（下刪幾百字輔導）

其實事後艾菲都有同燒腩仔傾過，佢應該係唔知咩叫「打死佢」，可能只係唔知邊到聽到人咁講，佢又照跟人咁講，所以大家唔使太擔心佢有暴力傾向。

講完燒腩仔嘅睇法，又輪到講吓艾菲自己嘅睇法，作為一子之母再有第二個，心當然係想要多個女湊個好字啦，始終女嘅感覺真係孝順D細心D識氹人D，而女人嘅直覺都話畀艾菲知BB豆豬應該係女仔來（同當年陀燒腩仔時一早覺得佢係男仔一樣），但諗深一層如果係男仔其實都好，我哋唔使煩大個分房瞓嘅事，佢亦可以用返晒燒腩仔D嘢慳返一筆， 照顧上其實係相對容易，所以對艾菲來講仔同女都OK，最緊要佢健康就夠。

至於米高呢，由於一直怕艾菲生個女出來，會發晒狂咁買衫同佢扮靚搞到佢破產，再加上怕結果真係仔嘅話艾菲會失望（乜艾菲個樣真係咁恨女咩？），所以佢把口一直都話唔信BB豆豬會係女，等艾菲唔好抱太大期望，但實情呢艾菲都同佢傾過，如果BB豆豬係女仔，佢呢個做爸爸嘅一定會變得好溫柔，至少唔會好似宜家對燒腩仔咁惡，兼受唔住BB豆豬嘅嗲功乜都應承囉﹗>.<

照結構（21W）

終於清晒聖誕新年假D blog，又係時候講返BB豆豬，上星期二我哋就同咗佢去照結構，記得對上一次燒腩仔係喺鄧悅翹醫生到照，無4D睇但收費只需$1700，估唔到事隔三年所有醫生都加晒價兼加得幾甘，本來艾菲今次係想去燒腩仔姨媽推介嘅林勇行醫生到照（燒腩仔婆婆猛讚醫生好細心，發現到表妹有早膊），但林醫生已經由上年年頭$2800加到$3500，米高聽到即問有無第二個選擇，咁艾菲唯有上網搵搵，終於揀咗婦健嘅王紹宏醫生，同樣有4D亦都係母胎醫學專家，收費只需$2600，相對較合理啦﹗

為咗遷就之前話可能聖誕節出trip嘅米高，艾菲將照結構嘅日子推遲到一月頭，一早約咗3:15pm，仲諗住可以將燒腩仔交畀燒腩仔爺爺嫲嫲，照完同米高拍個拖食埋飯先返去，點知早一星期收到診所姑娘電話，話部機壞咗要改遲到6:30pm，再加上些少意外嘅出現，最終我哋決定湊埋燒腩仔一齊去，當畀多個機會佢見吓BB豆豬啦﹗



平時我哋約Dr Wong檢查都係5:30pm，接完燒腩仔放學出去時間係啱啱好，但今次多咗成個鐘出來，為怕燒腩仔扭眼瞓，我哋都唔敢帶佢四圍走，所以接完佢放學就去咗九龍城食澳牛二代開嘅聯發，果然個炒蛋同澳牛一樣水準，仲有好味沙嗲牛揀兼可以免費轉一丁，最重要係環境無澳牛咁窄，唔會有粗魯伙計催你走，更加係唔使大排長龍先有得食啦﹗

食飽我哋就坐車出發去婦健，期間燒腩仔已經開始眼瞓蟲發作變得好失控，但我哋叫極佢瞓都唔肯瞓，終於捱到差唔多落車佢先話瞓，又焗米高抱住佢瞓，所以我哋一落車就急急腳上婦健登記，等米高有得坐吓唔使咁辛苦，然後六點三左右登記，等到七點幾先有姑娘叫我哋入房準備，但入到房原來仲要等，終於連燒腩仔都醒埋王醫生先出現，好彩啱啱瞓醒嘅燒腩仔知道有得見BB豆豬即好合作無嘈無扭（佢一見完BB豆豬出房即發作，唉...），否則場面就慘不忍睹啦...

最後一次＠迪士尼

明明星期三先來完迪士尼，點知唔夠三日我哋又再入來，講真艾菲都覺得自己有D瘋狂，但邊個叫艾菲自己大頭蝦，之前迪士尼寄咗張2-3/1嘅2 days pass來，話補返我哋少咗一個星期嘅特選周末，艾菲就一直懶理以為係月中嘅事，經米高嚇一嚇之後艾菲先捨得拎張飛出來睇，都有同米高傾過想放棄唔來㗎，不過呢次將會係我哋短期內最後一次入來（銀卡到月頭就到期），上次又睇唔到魔法書房同煙花，所以就同燒腩仔癲埋今次啦﹗



呢一朝米高又要返工，得艾菲同燒腩仔拍拖入場，但為咗可以睇得成魔法書房，艾菲都唔敢怠慢，一早同佢喺樓下食個late breakfast就坐地鐵出發，入到來差唔多一點，即刻直衝去魔法書房排兩點場，講真要燒腩仔企喺到呆等一個鐘，艾菲都有D怯怕佢唔合作，點知佢睇吓地圖撩吓前面兩個女仔玩，時間好快就過咗。

迷人的笑臉＠九龍公園

自從有咗BB豆豬之後，艾菲真係越來越無心機同燒腩仔影相，再加上佢前排成日跳掣，艾菲就更加無mood拎機，但每次見到佢個笑樣艾菲又後悔自己無拎相機出街，終於等到元旦日米高話帶佢去九龍公園玩，重就重辛苦就辛苦啦，趁仲行得走得影到幾多得幾多﹗



今次係我哋第二次帶佢來九龍公園玩，同上次weekend來時一樣，遊樂場地方雖然大同好玩但超級多人，幾乎每個角落都企滿人，再加上燒腩仔勁鐘意喺設施底捐來捐去，艾菲同米高都覺得得一個大人真係唔可以帶佢來，因為有幾次我哋都追唔切（個遊樂設施太大，地面又無位穿過另一邊）兼走漏眼（太多人所以太多盲點），畀佢喺人群之中消失咗，要米高四圍跑去搵返佢出來，雖然燒腩仔都已經有意識唔會自己走咗去，會識得返來搵返我哋，但安全計艾菲同米高最後係要一人企一邊，確保佢無走失。



跑呀﹗地方大可以任跑，啱晒燒腩仔放電，今次行A呢條路，下次行B呢條路，再下次行C路，鐘意點走就點走，超級free﹗

忽然迪士尼

聖誕節前忽然收到迪士尼sms，話十周年驚喜所有會員可以喺28-30/12入園（本身銀卡會員唔可以喺呢段時間入園）兼買嘢有七折，經歷過上次有人入到去發脾氣扭計之後，艾菲講過唔再一個人帶佢入去玩，本身真係無諗住同佢去，但米高忽然話要清假放咗30/12嘅下午，見好快有人來接更就畀多次機會佢啦﹗



我哋呢朝求其食咗D嘢就出門口，但搞吓東搞吓西再等吓車，入到去已經一點幾，兩母子都超肚餓要即刻搵嘢食，本來想搵間餐廳坐低慢慢食住等米高來，點知燒腩仔話想食返之前食過間火箭餐廳，咁艾菲見呢間最容易搵位同平D，就一於食豪D同佢一人一個餐唔使爭。

聖誕老人來了＠Boxing Day

艾菲細個時燒腩仔公公婆婆會同我哋睇燈飾同自己喺屋企食大餐，但唔會花錢送聖誕禮物畀我哋，更加唔會同我哋講聖誕老人嘅故事，到艾菲有意識咩係聖誕老人嘅時候，已經知聖誕老人係假，聖誕襪入面D禮物十居其九都係最錫艾菲嘅燒腩仔姨婆送。

到燒腩仔呢個年紀，其實佢都唔太知聖誕老人係乜水，不過艾菲就決定畀返D童真佢，趁同佢一齊聽《Santa Claus is coming to town》時，剩機同佢洗腦話佢知只要小朋友乖，日頭唔扭計夜晚又肯乖乖上床瞓，咁到平安夜當晚聖誕老人就會來放禮物入佢隻聖誕襪到，如是者一連幾晚成功呃到燒腩仔早D上床瞓（佢前排幾乎晚晚都話唔瞓，成日搞到十一點幾十二點先肯瞓）。

米高一直唔係好buy呢D玩意，但俾艾菲話得多都好努力投入聖誕老人呢個角色，真係有四圍搵吓有咩糖果零食可以放落燒腩仔隻聖誕襪到，但眼見佢D同學嘅禮物包入面實在太多糖，艾菲逼不得意下都要stop佢，至於零食以外嘅禮物，我哋就一早有共識，喺屋企堆車海中搵兩架新車畀佢就算，亦咁啱燒腩仔真係同艾菲講想聖誕老人送車畀佢，呵呵呵...



終於等到聖誕節朝早瞓醒，燒腩仔一出房就衝埋聖誕樹，想睇吓聖誕老人送咗咩禮物畀佢，經艾菲提醒後先識去搵隻聖誕襪出來。

燒腩仔：唔...等我搵吓入面有D咩先﹗

慢遊元朗＠聖誕節

難得聖誕節正日無party，咁一覺瞓醒解開咗燒腩仔呢個世界上有無聖誕老人嘅謎團後，我哋點都要搵D嘢做，忽然米高話想入元朗行吓，well...自從上年年頭路過發現條條街都係人之後，艾菲實在有D怕怕，但佢似乎好想去搵好嘢食咁，就姑且陪佢癲吓啦﹗



入到去都差唔多兩點，第一時間衝去成記茶寮搵食，好彩仲搵到位坐，艾菲本來想叫豉油皇豬扒飯，但阿姐話一定要雙拼（應該係豬扒就賣晒，所以一定要雙拼），咁就拼雞球啦，而米高就叫咗粟米汁雞球飯，來到係比想像中還要大碟同足料，艾菲要同燒腩仔share先食得晒，連米高一個大男人都KO唔到一碟， 至於味道方面，豬扒無想像中好味，反而雞球真係啖啖肉兼入味。



雖然呢到係大排檔無冷氣又坐得唔舒服，但真係坐無虛席D客一個接一個入來，到兩點阿姐已經話賣晒雞球，基本上係佢話有咩賣你就食咩，我哋好彩食到水尾一轉嘅瑞士雞翼，但明顯師傅係即製唔太夠入味，不過燒腩仔就食到舔舔脷好欣賞咁，食完成碗飯仲自己拆到一隻。

睇燈飾＠平安夜

燒腩仔嘅聖誕假期終於都完，我哋呢對一放假就唔䅻家嘅母子，又要回復返正常生活啦，而艾菲亦係時候回顧呢個假期嘅點滴，首先就由平安夜講起啦﹗



呢日米高放半日，艾菲一早就諗好帶燒腩仔過海去接爸爸放工，所以一起身食完早餐，就換衫執袋出發，咁一場來到灣仔呢邊，艾菲個心當然係想去蘭杜街食蝦麵（嘻...其實米高唔係灣仔返工，係艾菲屈佢由老遠行過來），點知去到餐廳門口有個小朋友大叫「我要食飯」，艾菲呢個為食大肚婆慘被強頑嘅小朋友KO，只好乖乖行過隔離鋪食越南嘢，然後食得半碟飯嘅米高出來大叫要再搵嘢食，艾菲就帶佢哋去快樂餅店買包食，明明燒腩仔自己揀咗個菠蘿包做下午茶㗎，但見米高個沙翁又雙眼發光咁搶食咗大半個，米高最終都係餵唔飽自己㗎，噢...



之後我哋沿路行返出地鐵站附近，米高一早已經話想食公利蔗汁糕做甜品，佢一心以為呢個色呢個樣，燒腩仔應該會無興趣，可惜事實證明佢太天真啦﹗為食燒腩仔又出動搶食﹗連賣蔗汁嘅阿姐都忍唔住話「乜你咁細個都識食呢D嘢」，其實佢喺艾菲肚入面已經食唔少，以前放工間中會走去買個返屋企雪凍做飯後甜品，嘻...

Happy 2016﹗

Happy New Year! 2016年第一日，先送個大笑燒腩仔畀大家，祝大家來緊一年開開心心，日子過得幸福又美滿﹗

回顧剛過去嘅2015年，應該算係艾菲從黑暗中走出光明嘅一年，當中嘅經歷有喜有悲有開心興奮亦有失望傷心，好充實兼富有挑戰嘅一年，同時係載滿豐碩成果嘅一年，先係燒腩仔喺最後關頭入到艾菲超心儀學校，再來就係BB豆豬嘅來臨，足以為呢一年畫上完滿嘅句號。

凡事有得有失，艾菲從來都相信否極泰來呢四個字，2014年尾嘅痛，換來嘅係米高滿滿嘅愛，我哋關係明顯比之前更好，艾菲亦變得無之前咁執著，就算面對住trouble 3嘅燒腩仔，好多時都會不自覺地被負能量纏身，但好快又會重拾鬥志繼續努力打怪獸，唔會再好似以前咁易鑽牛角尖，經歷總係令人成長。

展望2016年，最重要嘅事當然係BB豆豬嘅出世啦，希望到時一切順利平安，一家四口齊齊整整開開心心過以後嘅每一日，雖然艾菲對一湊二仍然有D怯，但無人幫就只好爭氣靠自己，船到橋頭自然直，艾菲嘅字典入面只有為與不為呢四隻字，D嘢要做嘅話無話搞唔掂嘅，最好當然係燒腩仔配合吓跳少D掣，等我哋母子關係再和諧D，米高工作順利賺多D錢兼可以再錫我哋多D，艾菲亦要健健康康努力撐住成頭家，繼續學做個好媽媽同好太太﹗