行年宵＠維園

新年前除了要辦年貨，大掃除和吃團年飯外，又怎少得去行年宵呢，但要帶著燒腩仔去維園（舊年已經同佢去過花墟個年宵，但艾菲始終覺得維園先最有氣氛），一定不能選年廿八打後超逼人的日子，根據多年逛年宵的經驗所得，最好就是年廿八前的上班時間去，碰巧米高在這個星期一有一天補假，我們當然立即go go go﹗



在行年宵前，我們先帶了燒腩仔到維園玩，這個小朋友見到白鴿又是超興奮的想上前去追，然後在大草地上見到一群雀鳥飛過（個場面都幾震撼，係香港真係好少見），他先是有點被嚇倒的呆了，後來便不停拍手說好。



為遷就燒腩仔的午睡時間，我們已經特別提早出發，怎料明明在外邊玩得很hyper的他，到我們進場時便開始發呆，未知是場內嘈音太大還是睡魔急call呢，汽球，風車，毛公仔都一概沒興趣，好不容易讓他撐了三、四條wing不要睡，最終也是捱不住睡得像隻豬...



一場來到又甚麼也買不到（艾菲仲一心諗住買個波或者風車畀燒腩仔玩...），唯有將省回來的錢吃進肚吧，路過ClubONE的booth見到有$30雞煲翅便買了碗來試，哈...都幾足料的呀﹗如果大家會去維園逛的話可以一試，他們還有$30鮑魚和花膠呢﹗



因為維園那邊沒合心水的年花買，於是兩手空空的我們決定轉戰花墟（硬係覺得過年要擺D花係屋企先有氣氛），可能今年天氣不似預期，所以艾菲至愛的牡丹和洋牡丹不是已經全開就是有點燶，連第二愛的風信子都出現同樣情況，後來終於在繽紛被這盤燈籠花吸引住，價錢不便宜但勝在不用襯花又易插，最適合艾菲這種懶人﹗（左面盤水仙係燒腩仔公公種㗎，開得仲靚過維園賣緊嘅）



行年宵買不到東西給燒腩仔，艾菲始終有點死心不息，於是第二天回娘家跟燒腩仔公公婆婆食團年飯前，便拉了公公婆婆一起去逛大埔的年宵市場，雖然這裡又細又沒甚麼好逛的，艾菲最終都成功買到個風車給燒腩仔玩，YEAH！



由上星期開始忙忙忙到年廿八都未停過手，見四大長老的團年飯已經食了，連年宵都逛過了，揮春也全部貼好，艾菲便爭取時間在年三十晚收爐前做了黑糖年糕和甘香蔗汁糕來應節（其實屋企已經有三底分別由朋友同艾菲姑姐整嘅蘿蔔糕同馬蹄糕:P），然後極速入好全盒（今年專登放咗幾塊燒腩仔食得嘅餅仔落去等佢都有得一齊食），再扭個汽球桔出來做擺設（返娘家食團年飯時唔記得問燒腩仔婆婆拎對桔返來擺全盒面，唯有自己扭返個來擺啦），過年要忙的都大致完成了﹗