15個月

我今日15個月大，不過都同時要同大家宣布我打敗仗同媽媽一齊病咗呀（宜家每次病都一定一齊，其實有無方法可以隔離吓呢？），好彩食咗藥之後都控制到無嚴重落去，只係胃口差D同好攰咁（艾菲：都好彩你咁鐘意食藥水啦﹗問你好唔好味仲會點頭呢吓真係笑死﹗），最近呢D天氣真係好容易病，每次經過診所都見到逼爆嘅情況，來緊好似又話轉冷啦，大家出街記得著多件衫唔好冷親呀﹗



今個月依然係一日五餐，早晚兩餐飲七安奶，午餐晚餐就食一個大人碗嘅飯仔（高峰期試過食到碗半），下午茶就食生果加其他零食同飲果汁（最鐘意飲乳酸），不過前排玩得癲所以無咩心機食嘢，每餐飯食到半碗已經唔想再食，成日含住啖飯唔吞落去等媽媽餵唔到落去，連早晚兩餐奶都顧住咬奶咀搞成半個鐘都飲唔晒枝奶，仲要見到大人食物就發晒狂咁扭食，食唔到我就喪叫喪喊發脾氣，激到媽媽彈吓彈吓每餐都要同我鬥智鬥力。

不過玩咗幾日之後，我都知媽媽係個唔容易對付嘅對手，佢先用硬功堅持我食唔完自己碗飯嘅話嗰餐就無大人嘢食，仲要限時半個鐘內食唔完就收碗唔准再食，再用軟功畀成碗飯我自己用匙羹畢同畀成盒屋仔奶我自己用飲管飲，所以我都投降唔敢再搞事啦﹗亦因為咁我宜家自己食嘢嘅能力有些少進步﹗十次都有兩三次係成功畢到食物，仲由之前完全唔肯用杯飲奶，到宜家簡中可以用飲管杯飲到成餐奶添﹗



我呢個月無出牙仔，依然keep住六隻牙咁大把，但因為其中一隻牙有黑邊（點解BB無食糖無飲茶日日抹口都會有蹟？有無人知可以點去蹟？），媽媽就開始日日同我刷牙（暫時只係用水），我so far都好like呢個活動（佢由細到大都好like抹口）﹗不過媽媽就投訴我口痕嘅情況嚴重咗好多，真係乜都會放入口試味，一得閒就伸晒成隻手入口，瞓覺時最鐘意咬衫袖或者衫領，仲會偷偷地想咬媽媽膝頭（艾菲：好彩每次都發現到縮得切），媽媽有專登拎返我細個時D牙膠出來畀我咬，但我對佢哋已經零興趣囉，佢宜家頭痕緊好唔好再畀我食牙仔餅（之前試過梗親）。

至於瞓覺呢方面，媽媽話我已經進入咗冬眠狀態，以前每晚十一點左右瞓，第二朝九點半起身，但天氣凍嗰排我可以同媽媽一齊瞓到十點半先起身﹗晏覺嘅次數就視乎嗰日有無街去，一般情況下都係一日瞓兩次，不過有時瞓一次都得，大概瞓到個半鐘至三個鐘不等，都係自己係BB床到碌一陣就瞓，係唔係好乖仔呢？嘻...



媽媽話我宜家已經行到好似跑咁，就快追得上大人嘅步伐，不過攰嘅時候就會行到飲醉酒咁，同左腳依然有少少向內，拖住上落樓梯都行到一兩級（太高嘅都仲未得），亦習慣咗要拖住大人行，唔會再好似之前咁一拖就發忟，但就輪到扭推車仔囉，爸爸媽媽帶親BB車出街我一落地都會搶住去推，去到超市見到D購物車我又會雙眼發光想衝埋去推，所以行IKEA同銅鑼灣AEON超市呢D有BB購物車就最啱我啦（艾菲：難為阿媽我要同你鬥力推等你唔好亂撞呢）﹗


 
我到宜家仲未學識晒眼耳口鼻係邊（只係識耳同鼻），不過媽媽又教咗我兩個新招數，就係扭耳仔同醜醜啦﹗（艾菲：硬係正正經經教嘅嘢就學極唔識﹗）佢一講我就會扭耳仔，或者拎隻手指係塊面到掃（不過整到好似happy face咁囉），另外仲學識疊高高（暫時最多三層），伸隻手指出來答幾多歲，做小明入面火車捐山窿個動作，主動同人玩bu...喳，叫我唱歌時會呀...呀...呀...咁唱幾聲，叫我跳舞又會自己扭吓個身，同埋大人問親好唔好味或者乖唔乖時會好肯定咁點頭。

自理能力都有明顯進步，除咗每次換片之後會自己拎去垃圾桶到丟，同飲完奶拎返奶樽去廚房畀爸爸外，每朝媽媽摺被我都會埋去幫手拍平張被，爸爸收咗信返來會幫手拎入房畀媽媽，行路跌低會自己起身拍拍手繼續行，去完公園媽媽噴D潔手液係手我會試吓自己捽，而媽媽話最抵讚就係坐potty無再扭計唔坐，次次坐低都會試吓出力便便（艾菲：最開心係已經有大半個月唔使同你丟屎片囉），有時未到potty time想去都會「唔」出聲等媽媽知我要便便，咁佢就會即刻拎個potty出來畀我坐落去痾（呢個仲係時得時唔得）。



隨住我嘅表達能力越來越強同情感越來越豐富，媽媽話我開始越來越難搞，一有唔順意嘅嘢就發脾氣，仲學識專登做D壞事出來引人注意，例如沖涼時會專登掟D沖涼玩具落地同大力拍D水搞到成個廁所濕晒，爸爸媽媽講嘢唔得閒理我時試過專登將個頭撞落門撞到呯呯聲，飲水時會一路偷笑一路lur返D水出來，如果爸爸抱住我時媽媽挨過來我會即刻將佢推開（調返轉艾菲抱時米高搭我膊頭佢都係咁嘅反應），有時玩得開心時又會專登輕輕力打爸爸或者媽媽（佢打到好似同我哋玩咁，搞到我除咗好似無嘢咁同佢講唔可以打人之外，都唔知仲可以點教佢咁係唔啱），總之你反應越大叫我唔好我就越要去做多幾次（所以艾菲暫時採取嘅反應就係盡量扮睇唔到等佢無癮唔再做）。



就連學講嘢都搞到媽媽唔知好嬲定好笑，明明識叫爸爸，媽媽，姐姐，嫲嫲同阿爺，但呢個月就忽然乜人都叫佢做阿ba，唯一係至愛婆婆依然叫阿婆，仲要叫親都唔停口咁不停嗌（冧到佢阿婆暈咁滯），而呢個自動分類情況亦出現係其他地方，宜家乜嘢生果我都叫佢做apple，咩交通工具包括船都叫車，所有動物都叫做wow wow，一切圓形物體都係波，而且我最近好鐘意扮聲，一聽到救護車經過我就會wee...咁叫（真係有高低音㗎﹗），媽媽同我影相我會學佢講叱咤，探熱時會跟住探熱針嘟一聲，自己放完屁或者聽到人放屁都會跟住呠一聲出來，見到人打乞痴或者呻鼻涕就會扮打乞痴。

上個月我好鐘意耍手擰頭咁講唔愛，今個月就輪到講唔得同唔好，有次媽媽問我係唔係曳時，我仲好肯定咁答佢唔係呀，至於新學識嘅單字就有切（每次係廚房門口見到大人切嘢就會講），畢（畢嘢食嘅意思），執，掟，打，拍，無，哎吔，曳，奶（佢一直唔肯講個奶字，我哋就以為佢學極唔識，直到上次佢飲咗半個鐘都未飲完，我落令收咗佢枝奶就忽然喊住叫咗個奶字出來），基本上全部都唔係爸爸媽媽特登教，而係跟佢哋口水尾講（艾菲：都係正經教就學極唔識，無謂嘢就一學就識囉），媽媽話宜家好似日日同個九唔搭八嘅人傾偈，個感覺都幾盞鬼喎﹗