順產定開刀？

大家唔好誤會，絕對唔係艾菲要同大家宣佈有咗燒腩弟/妹，只係作為一個曾經食全餐，陣痛咗十二個鐘再去開刀生燒腩仔出來嘅媽媽，最近睇完有線電視兩集《至fit男女》，直擊開刀同順產生BB嘅真實情況之後，忽然有感而發姐...

陀住燒腩仔時，因為深信順產對媽媽同BB先係最好，所以艾菲一直諗住順產完全無諗過開刀，亦專登搵幫過朋友兩次接生嘅黃醫生跟自己嘅case（因為朋友第一次係痛到凌晨三四點先生得，黃醫生都肯慢慢等佢無叫佢開刀等自己可以收工返屋企瞓），就算最後一次產檢同黃醫生講開如果燒腩仔唔肯出來要約期催生嘅問題，佢都係叫艾菲試吓生先再考慮開刀，點知痛咗十二個鐘之後燒腩仔竟然心跳減慢，搞到艾菲要緊急開刀拎佢出來...

由於一切來得實在太突然，生完燒腩仔之後艾菲驚同唔開心咗幾個星期，一直耿耿於懷點解自己唔可以順產生燒腩仔出來，甚至黃醫生同艾菲拆膠布時讚艾菲都幾忍得痛時，艾菲都忍唔住講咗句「忍得痛但唔可以自己生就唔抵啦」，要黃醫生調轉頭來安慰返艾菲，亦好彩老死Ice係艾菲坐月期間勸艾菲睇開D又時不時打電話來陪艾菲傾偈（呢D嘢真係同老公講佢都唔會明），如果唔係連埋餵人奶嘅問題屈埋屈埋，艾菲應該會有產後抑鬱。

事隔一年幾之後，艾菲當然無再為呢件事唔開心啦，親身感受過陣痛有幾痛同開刀可以有幾舒服嘅經歴之後（其實都只係最初一兩度嘅痛，但叫做忍得痛嘅艾菲已經覺得好痛），一心諗住再有第二個BB的話一定揀開刀唔試自己生（真係無勇氣再試自己生，而且覺得順產風險都唔低，感覺開刀可以係掌握之內安全D），不過睇到自然分娩那集入面個媽媽順利生咗BB出來一幕，艾菲個心始終有少少戚戚然，艾菲即刻諗返自己生燒腩仔出來嘅時候完全無喊過（艾菲出名眼淺㗎﹗），但如果換轉係自己生佢出來嘅話艾菲肯定喊到收唔到聲都似，而且艾菲硬係覺得開刀只係媽媽捱一刀，做爸爸嘅就算陪產都唔會感受到媽媽有幾辛苦，自己生嘅話陪產爸爸就可以感受到媽媽有幾偉大，會自動覺覺對老婆好D嘛﹗:P

相對於TVB那套《守護生命的故事》，艾菲覺得《至fit男女》呢個走進婦產科嘅series講得更詳盡同深入，至少可以畀艾菲睇返當日開刀生燒腩仔嘅情況到底係點（燒腩仔亦正正係醫生講臍帶纏頸導致作動時心跳慢嘅「少有情況」），亦講解咗好多生BB時會遇到嘅問題，例如胎盤前置係咩，BB唔調頭開刀個位有咩唔同，唔同止痛方法有咩唔同，同埋順產後30分鐘胎盤仲唔甩出來要點搞等等，如果大家有興趣嘅話，特別係陀緊BB嘅媽媽，可以上佢哋網頁睇返呀﹗

走進婦產科之剖腹生產
走進婦產科之自然分娩