馬上行運﹗

恭喜發財﹗

我燒腩仔係到祝大家身體健康﹗心想事成﹗大吉大利﹗財源廣進﹗馬上行運﹗

嘻...今年係我第二年過嘅農曆新年，爸爸媽媽話來緊一星期會好忙，要四圍去同D親戚朋友拜年同逗利是，仲由上星期開始密密同我練習做恭喜嘅手勢，唔...希望我呢幾日嘅表現好D唔會失禮佢哋啦﹗

而我亦想係到祝爸爸今年繼續畀心機搵錢養我同媽媽﹗媽媽就青春美麗對我溫柔D同煮多D好嘢我食﹗自己就聰明伶俐快高長大兼唔好成日激嬲媽媽﹗恭喜恭喜﹗

行年宵＠維園

新年前除了要辦年貨，大掃除和吃團年飯外，又怎少得去行年宵呢，但要帶著燒腩仔去維園（舊年已經同佢去過花墟個年宵，但艾菲始終覺得維園先最有氣氛），一定不能選年廿八打後超逼人的日子，根據多年逛年宵的經驗所得，最好就是年廿八前的上班時間去，碰巧米高在這個星期一有一天補假，我們當然立即go go go﹗



在行年宵前，我們先帶了燒腩仔到維園玩，這個小朋友見到白鴿又是超興奮的想上前去追，然後在大草地上見到一群雀鳥飛過（個場面都幾震撼，係香港真係好少見），他先是有點被嚇倒的呆了，後來便不停拍手說好。



為遷就燒腩仔的午睡時間，我們已經特別提早出發，怎料明明在外邊玩得很hyper的他，到我們進場時便開始發呆，未知是場內嘈音太大還是睡魔急call呢，汽球，風車，毛公仔都一概沒興趣，好不容易讓他撐了三、四條wing不要睡，最終也是捱不住睡得像隻豬...

燒腩仔揮春

為咗燒腩仔，艾菲到底可以去到幾盡呢？事實一次又一次證明，艾菲都可以幾癲吓，繼之前嘅紙廚房之後，艾菲又通咗幾晚頂密密趕工整咗D燒腩仔揮春出來送禮自用，仲要明明唔識用photoshop，之前返工有得學都懶得學，最後居然係為咗個仔而自學成功...

話說12月尾一月初嘅某日係facebook見到個studio廣告，promote影新年相加揮春制作嘅package，睇咗D sample覺得幾得意同幾靚，但睇埋價錢就知艾菲一定唔會幫襯，本來都唔記得咗呢件事，不過後來路過快圖美見到有得印相片揮春又勾返起條根，其實$28兩張揮春都頗吸引的，不過艾菲始終覺得佢D款唔係咁啱feel，重點係佢不過就咁key張相落去然後印出來，連底都唔會幫你去感覺有D hea，於是pat pat痕決定試吓自己整。

年廿八洗邋遢﹗

又到一年一度大掃除的時間，但艾菲當然不止年廿八這天才來大掃除啦﹗今年多了時間待在家，平日很多時都忍不住出手收拾，所以今年大掃除相對之前幾年輕鬆，而在忙於大掃除和辦年貨的同時，艾菲也不忘要為燒腩仔的牙仔「洗邋遢」，頗注重儀容的艾菲實在接受不到他那隻綑了黑邊的牙呢﹗



之前都有提過燒腩仔的牙仔有綑黑邊的問題，就算每天勤力跟他刷牙（用清水）都完全沒改善的跡像，又沒理由只得六隻牙仔就去看牙醫洗牙，燒腩仔婆婆說可能是他吃過中藥的原故（佢只係食過保嬰丹），亦有些媽媽說可能跟他吃酸性食物太多有關（佢又真係好鐘意食酸嘢），姑勿論原因是甚麼都好，眼見他連上面的門牙都開始出現黑點，艾菲也是時候研究一下有甚麼方法處理才行﹗



經妹豬媽提醒，說有些媽媽去藥房買些中藥回來跟小朋友刷牙就可以解決，艾菲也立即上網搜尋相關資料，後來見到不少Baby Kingdom媽媽推介一種叫木刷草的東西，艾菲便跟著去藥房買了$2木刷草回來試試看﹗$2就有這麼多枝，抵呀﹗

紅葉＠青衣公園

十二月尾至一月初，是香港賞紅葉的最佳時間，不知由何時開始大家都會一窩風湊熱鬧去賞紅葉，艾菲當然沒興趣去大棠跟人逼啦，記得上年去過青衣公園賞紅葉，雖然遲了些少紅葉開始枯黃，但拍照出來的效果還是不俗的，再加上那裡交通方便，又不太多人逛得相當舒服，於是今年打算提早帶燒腩仔去拍照，怎料一月初的某個星期日，正當我們興高采列地出發，未進公園門口已經看見大批龍友，看見插針都插不入的公園，艾菲即時雅興盡失調頭就走，後來米高發現《蘋果日報》當天有報導介紹讀者去青衣公園賞紅葉，原來這裡已經「揚咗」，O...NO!!!




拍不到紅葉照，艾菲心裡始終有些不甘，幸好米高願意在月尾放一天補假陪我們再去，然後上星期四終於成行，雖然紅葉已經接近尾聲開始變黃，不過能夠輕輕鬆鬆在公園裡遊走，才會有好心情拍出好照片的嘛﹗

試用：Sense Organics有機棉衫

之前睇新聞見到大陸做嘅童裝有致癌物，又有話某大品牌嘅童裝有殘餘有毒化學物會影響免疫同生殖系統，艾菲聽到都有少少擔心，雖然話周街都係大陸衫避無可避，但始終係著係小朋友身上咁貼身嘅嘢，點講都係小心D好，而早排見到Sense Organics有機棉衫有試用，艾菲就報名拎咗件來畀燒腩仔試吓。



今次試用有兩款衫揀，因為燒腩仔最近勁鐘意車，所以艾菲特登揀咗有車仔圖案呢件畀佢，佢係連車仔圖案都係棉來（新聞話熨印圖案容易出事），86碼適合12-18個月大嘅小朋友著，另外仲有兩枝Derma Eco有機嬰兒潤膚霜送。



拎衫時個姐姐介紹話Sense Organics D衫係100%有機棉，出面好少有機棉衫係用100%有機棉，返來上網再睇資料先知佢哋一直提倡使用生態棉花已經接近二十年，仲拎到「全球有機紡織品標準 Global Organic Testile Standard, GOTS」認證，出品嘅衫係選用天然、無毒、舒適嘅有機棉料製成，就算有敏感皮膚嘅BB都可以著，絕對係媽媽嘅信心之選﹗

燒腩仔廚房

登...凳...這個就是艾菲之前賣關子那個DIY玩具——燒腩仔廚房了，花了兩個多月的時間籌備，好不容易終於順利完工﹗

由於艾菲實在太喜歡玩煮飯仔，又由於艾菲一直覺得廚房是煮飯仔的必須品，所以一直很想替同樣喜歡玩煮飯仔的燒腩仔添個廚房，一圓兒時未能擁有一個私家煮飯仔廚房的夢，但淘寶所見的煮飯仔廚房又貴又大件，不用問都知米高一定反對，無意間見到有台灣媽媽用Ikea紙盒做了一個紙廚房給小朋友玩，艾菲見難度好像不太高，而且自家製size能夠由自己控制，於是膽粗粗選了爐頭，鋅盤和焗爐這三個items來做。

跟米高提起這個idea，他總認為艾菲太瘋狂，覺得是mission impossible的事，但實情是整個製作過程中，最難只是搜尋合適的紙盒和配件這部分，其他都不過是簡單的剪剪貼貼，連艾菲這個Art最高分只有D的人都做得到，就足以證明這個紙廚房絕對不是甚麼複雜東西。

順產定開刀？

大家唔好誤會，絕對唔係艾菲要同大家宣佈有咗燒腩弟/妹，只係作為一個曾經食全餐，陣痛咗十二個鐘再去開刀生燒腩仔出來嘅媽媽，最近睇完有線電視兩集《至fit男女》，直擊開刀同順產生BB嘅真實情況之後，忽然有感而發姐...

陀住燒腩仔時，因為深信順產對媽媽同BB先係最好，所以艾菲一直諗住順產完全無諗過開刀，亦專登搵幫過朋友兩次接生嘅黃醫生跟自己嘅case（因為朋友第一次係痛到凌晨三四點先生得，黃醫生都肯慢慢等佢無叫佢開刀等自己可以收工返屋企瞓），就算最後一次產檢同黃醫生講開如果燒腩仔唔肯出來要約期催生嘅問題，佢都係叫艾菲試吓生先再考慮開刀，點知痛咗十二個鐘之後燒腩仔竟然心跳減慢，搞到艾菲要緊急開刀拎佢出來...

由於一切來得實在太突然，生完燒腩仔之後艾菲驚同唔開心咗幾個星期，一直耿耿於懷點解自己唔可以順產生燒腩仔出來，甚至黃醫生同艾菲拆膠布時讚艾菲都幾忍得痛時，艾菲都忍唔住講咗句「忍得痛但唔可以自己生就唔抵啦」，要黃醫生調轉頭來安慰返艾菲，亦好彩老死Ice係艾菲坐月期間勸艾菲睇開D又時不時打電話來陪艾菲傾偈（呢D嘢真係同老公講佢都唔會明），如果唔係連埋餵人奶嘅問題屈埋屈埋，艾菲應該會有產後抑鬱。

P仔好煮意1

自上次在這裡提及P仔麵包機進駐艾菲家後，不經不覺又過了兩個月時間，雖然前陣子聖誕新年假期少了開機，但艾菲還是做了不少麵包出來，更完成了之前給自己訂下的兩個目標做了Jam和烏冬，而為免日後想再做時失憶還是想在這裡記錄一下。

 跟《百變麵包機》食譜做了這個香蕉蛋糕，但因為給燒腩仔食而沒有下酒，出來一點蕉味也沒有，超失望﹗

柚子蜜軟包，又甜又香就像塗了Jam一樣，燒腩仔一個吃了大半塊做下午茶呢﹗

DIY玩具

雖然市面上有各式其式的玩具出售，父母們只要肯花錢定必買到心頭好，然而艾菲就覺得小朋友玩具不一定要花錢買，有時簡單地將一些廢物DIY，都可以變成一件不俗的玩具，除了夠環保之外，最重要是玩爛了也完全不用「肉赤」嘛，而在不知不覺間，艾菲便做了下面幾件玩具給燒腩仔玩了。



DIY 1：沙槌

這個是燒腩仔半歲大時做而又最簡單的，只要留一個飲完的水樽，將它洗淨再徹底吹乾，然後放一些豆或米進去即成一個沙槌，可以刺激他對聲音的敏感度，又可以學用手去抓物件。



DIY 2：紙巾盒

又是超簡單的DIY習作，留一個用完的紙巾盒，再將幾條紗巾或汗巾一塊卡著一塊的摺好，然後整疊放進去，留一端在盒外吸引小朋友去抓就是了。這個零感來自朋友特意在日本買回來給兒子玩的紙巾盒玩具，一個布紙巾盒跟一堆會發聲連著的布紙巾，可以吸引小朋友伸手去拉緞練小肌肉，亦同時滿足小朋友想拉紙巾的慾望。

艾菲在燒腩仔約十個月大時做給他玩，起初他完全零興趣，慢慢便懂得伸手去拉，亦越拉越順暢，發展至今已經可以極速將全部汗巾拉出來，甚至平日跟他用濕紙巾抹pat pat後都要鬥快將紙巾盒關好，以防他將全部濕紙巾拉出來﹗

血拼Baby Gap

燒腩仔是個集萬千寵愛在一身和非常幸福的小朋友，因為他由出世至今的衣服全部由我們的親友包辦，不是婆婆，姨媽，嫲嫲和姑姐買的漂亮衣服，就是姑姐和朋友們大量供應的二手衣服，由於他那堆積如山的衣服幾乎逼爆衣櫃，所以艾菲這季一直很忍手，除了之前interview那件戰衣外便沒買過衣服給他，但今天經過Gap便終於「打爛齋砵」﹗

早幾天已經收到Gap的SMS說9-18日期間做特價，還要買滿三件全單有七折，買滿五件更全單有六折，基於艾菲和燒腩仔都不缺衣服而沒特別理會，但碰巧今天有事要出中環走一轉，路過GAP門口望到櫥窗貼著那大大個SALE，又實在很難忍得住不走進去看（實情係之前幾次知道佢大減價艾菲都唔敢路過），然後在米高相當罕有地任由艾菲慢慢在特價堆中尋寶的情況下（一減價真係亂到垃圾崗咁要逐件搵），單是行Baby Gap一層已經掃了六件，幸好樓下Gap Kids的女童款不OK（Gap Kids女童款係for艾菲自己嘅），否則艾菲一定大出血都似﹗

 

雖說血拼，艾菲還是相當克制的，主打都是買一些燒腩仔本身沒有的款式，而且只挑選有特價的才買，就像上面兩件已經減到$68一件，再全單六折之後只需$40.8，這個價錢就算在深水埗或花園街都未必買到類似款式，紅色裇衫可以留待新年時穿去拜年，右邊的褲仔就可以襯回姑姐之前買給他的同款上衣（之前一直覺得件衫好難襯得靚，所以見到同款嘅褲仔有減價就即買），全部選18-24m，估計明年秋天仍然合穿。

15個月

我今日15個月大，不過都同時要同大家宣布我打敗仗同媽媽一齊病咗呀（宜家每次病都一定一齊，其實有無方法可以隔離吓呢？），好彩食咗藥之後都控制到無嚴重落去，只係胃口差D同好攰咁（艾菲：都好彩你咁鐘意食藥水啦﹗問你好唔好味仲會點頭呢吓真係笑死﹗），最近呢D天氣真係好容易病，每次經過診所都見到逼爆嘅情況，來緊好似又話轉冷啦，大家出街記得著多件衫唔好冷親呀﹗



今個月依然係一日五餐，早晚兩餐飲七安奶，午餐晚餐就食一個大人碗嘅飯仔（高峰期試過食到碗半），下午茶就食生果加其他零食同飲果汁（最鐘意飲乳酸），不過前排玩得癲所以無咩心機食嘢，每餐飯食到半碗已經唔想再食，成日含住啖飯唔吞落去等媽媽餵唔到落去，連早晚兩餐奶都顧住咬奶咀搞成半個鐘都飲唔晒枝奶，仲要見到大人食物就發晒狂咁扭食，食唔到我就喪叫喪喊發脾氣，激到媽媽彈吓彈吓每餐都要同我鬥智鬥力。

不過玩咗幾日之後，我都知媽媽係個唔容易對付嘅對手，佢先用硬功堅持我食唔完自己碗飯嘅話嗰餐就無大人嘢食，仲要限時半個鐘內食唔完就收碗唔准再食，再用軟功畀成碗飯我自己用匙羹畢同畀成盒屋仔奶我自己用飲管飲，所以我都投降唔敢再搞事啦﹗亦因為咁我宜家自己食嘢嘅能力有些少進步﹗十次都有兩三次係成功畢到食物，仲由之前完全唔肯用杯飲奶，到宜家簡中可以用飲管杯飲到成餐奶添﹗



我呢個月無出牙仔，依然keep住六隻牙咁大把，但因為其中一隻牙有黑邊（點解BB無食糖無飲茶日日抹口都會有蹟？有無人知可以點去蹟？），媽媽就開始日日同我刷牙（暫時只係用水），我so far都好like呢個活動（佢由細到大都好like抹口）﹗不過媽媽就投訴我口痕嘅情況嚴重咗好多，真係乜都會放入口試味，一得閒就伸晒成隻手入口，瞓覺時最鐘意咬衫袖或者衫領，仲會偷偷地想咬媽媽膝頭（艾菲：好彩每次都發現到縮得切），媽媽有專登拎返我細個時D牙膠出來畀我咬，但我對佢哋已經零興趣囉，佢宜家頭痕緊好唔好再畀我食牙仔餅（之前試過梗親）。

至於瞓覺呢方面，媽媽話我已經進入咗冬眠狀態，以前每晚十一點左右瞓，第二朝九點半起身，但天氣凍嗰排我可以同媽媽一齊瞓到十點半先起身﹗晏覺嘅次數就視乎嗰日有無街去，一般情況下都係一日瞓兩次，不過有時瞓一次都得，大概瞓到個半鐘至三個鐘不等，都係自己係BB床到碌一陣就瞓，係唔係好乖仔呢？嘻...



媽媽話我宜家已經行到好似跑咁，就快追得上大人嘅步伐，不過攰嘅時候就會行到飲醉酒咁，同左腳依然有少少向內，拖住上落樓梯都行到一兩級（太高嘅都仲未得），亦習慣咗要拖住大人行，唔會再好似之前咁一拖就發忟，但就輪到扭推車仔囉，爸爸媽媽帶親BB車出街我一落地都會搶住去推，去到超市見到D購物車我又會雙眼發光想衝埋去推，所以行IKEA同銅鑼灣AEON超市呢D有BB購物車就最啱我啦（艾菲：難為阿媽我要同你鬥力推等你唔好亂撞呢）﹗


 
我到宜家仲未學識晒眼耳口鼻係邊（只係識耳同鼻），不過媽媽又教咗我兩個新招數，就係扭耳仔同醜醜啦﹗（艾菲：硬係正正經經教嘅嘢就學極唔識﹗）佢一講我就會扭耳仔，或者拎隻手指係塊面到掃（不過整到好似happy face咁囉），另外仲學識疊高高（暫時最多三層），伸隻手指出來答幾多歲，做小明入面火車捐山窿個動作，主動同人玩bu...喳，叫我唱歌時會呀...呀...呀...咁唱幾聲，叫我跳舞又會自己扭吓個身，同埋大人問親好唔好味或者乖唔乖時會好肯定咁點頭。

自理能力都有明顯進步，除咗每次換片之後會自己拎去垃圾桶到丟，同飲完奶拎返奶樽去廚房畀爸爸外，每朝媽媽摺被我都會埋去幫手拍平張被，爸爸收咗信返來會幫手拎入房畀媽媽，行路跌低會自己起身拍拍手繼續行，去完公園媽媽噴D潔手液係手我會試吓自己捽，而媽媽話最抵讚就係坐potty無再扭計唔坐，次次坐低都會試吓出力便便（艾菲：最開心係已經有大半個月唔使同你丟屎片囉），有時未到potty time想去都會「唔」出聲等媽媽知我要便便，咁佢就會即刻拎個potty出來畀我坐落去痾（呢個仲係時得時唔得）。



隨住我嘅表達能力越來越強同情感越來越豐富，媽媽話我開始越來越難搞，一有唔順意嘅嘢就發脾氣，仲學識專登做D壞事出來引人注意，例如沖涼時會專登掟D沖涼玩具落地同大力拍D水搞到成個廁所濕晒，爸爸媽媽講嘢唔得閒理我時試過專登將個頭撞落門撞到呯呯聲，飲水時會一路偷笑一路lur返D水出來，如果爸爸抱住我時媽媽挨過來我會即刻將佢推開（調返轉艾菲抱時米高搭我膊頭佢都係咁嘅反應），有時玩得開心時又會專登輕輕力打爸爸或者媽媽（佢打到好似同我哋玩咁，搞到我除咗好似無嘢咁同佢講唔可以打人之外，都唔知仲可以點教佢咁係唔啱），總之你反應越大叫我唔好我就越要去做多幾次（所以艾菲暫時採取嘅反應就係盡量扮睇唔到等佢無癮唔再做）。



就連學講嘢都搞到媽媽唔知好嬲定好笑，明明識叫爸爸，媽媽，姐姐，嫲嫲同阿爺，但呢個月就忽然乜人都叫佢做阿ba，唯一係至愛婆婆依然叫阿婆，仲要叫親都唔停口咁不停嗌（冧到佢阿婆暈咁滯），而呢個自動分類情況亦出現係其他地方，宜家乜嘢生果我都叫佢做apple，咩交通工具包括船都叫車，所有動物都叫做wow wow，一切圓形物體都係波，而且我最近好鐘意扮聲，一聽到救護車經過我就會wee...咁叫（真係有高低音㗎﹗），媽媽同我影相我會學佢講叱咤，探熱時會跟住探熱針嘟一聲，自己放完屁或者聽到人放屁都會跟住呠一聲出來，見到人打乞痴或者呻鼻涕就會扮打乞痴。

上個月我好鐘意耍手擰頭咁講唔愛，今個月就輪到講唔得同唔好，有次媽媽問我係唔係曳時，我仲好肯定咁答佢唔係呀，至於新學識嘅單字就有切（每次係廚房門口見到大人切嘢就會講），畢（畢嘢食嘅意思），執，掟，打，拍，無，哎吔，曳，奶（佢一直唔肯講個奶字，我哋就以為佢學極唔識，直到上次佢飲咗半個鐘都未飲完，我落令收咗佢枝奶就忽然喊住叫咗個奶字出來），基本上全部都唔係爸爸媽媽特登教，而係跟佢哋口水尾講（艾菲：都係正經教就學極唔識，無謂嘢就一學就識囉），媽媽話宜家好似日日同個九唔搭八嘅人傾偈，個感覺都幾盞鬼喎﹗

我家有個大醋呈﹗

雖則艾菲每天廿四小時全天候對著燒腩仔，不過這個小朋友實則是跟爸爸，婆婆or公公多於媽媽的，每次只要這三個人出現在他面前，艾菲便立即被打進冷宮變得可有可無，對於這個大後備的角色，艾菲都曾經失落過，甚至懷疑是否平日對他太惡所至，後來轉個角度去想，難得他肯跟其他人讓艾菲鬆一鬆，艾菲何不好好享受這種難得的自由呢。

艾菲和米高一直都有談論要不要生第二個小朋友的問題，主要都是想燒腩仔老來有個弟弟or妹妹相依，就算我倆百年歸老，他仍有一個親人在世，不至於孤伶伶一個那麼可憐嘛，但每次艾菲抱著家裡的BB公仔跟他玩，他總是一手便將它狠狠推開，再問他「生個弟弟或者妹妹畀你好唔好」的話，他例必搖頭加相當肯定地說「唔好」。

我們一直當他這句「唔好」是戲言，因為正在學說話的他基本上十問十「唔好」，沒想過除夕那天我們去朋友家開party，其中一個朋友的BB有點怕生（細燒腩仔兩星期），一直不肯離開爸爸媽媽，為吸引他跟其他小朋友一起玩，艾菲便抱起他嘗試跟他玩，怎料一直專心地在遠處玩車的燒腩仔，居然第一時間撲過來，拉著我的褲腳哭著投訴，就算米高將他抱起都不肯罷休，O...真的沒想過他會有醋意，還要是呷艾菲的醋而不是米高的醋，呵呵呵...



然後星期五晚我們一家出席表弟兒子的百日宴，事前都有跟燒腩仔說過今晚要去見人，亦以為兩個小朋友都是同月同日生理應有點緣份，但平日絕不怕生兼外出甚少扭計的燒腩仔，到達現場即事事不滿，每次跟小表弟影相都不肯笑兼不望鏡頭，開席前又不停扭落地不肯坐定，後來我們帶他出外走走冷靜一下才好一點。

溫暖牌蝴蝶頸巾

記得小時候曾經有條由菲媽織，粉紅色的溫暖牌蝴蝶頸巾，每到冬天她便拿出來給艾菲帶，襯在艾菲的幼稚園校服上特別sharp醒，到現在艾菲有了燒腩仔，也想親手織一條給他帶，就算明知他很大機會喪扯不肯帶，還是想試一試才心息。



因為是織給燒腩仔的，所以要特意去冷鋪買BB冷來織，蝴蝶頸巾用的冷不多，一個BB冷已經足夠有餘，雖然很簡單很易織，艾菲也花了一星期才完成（最主要係要等燒腩仔夜晚瞓咗艾菲先有時間織），後來見剩下來的冷多的是，於是便再織一條打算作替換之用。



艾菲在十一月尾開工，十二月初天氣轉冷前剛好織完，立即給燒腩仔試帶，他果然是勁不喜歡尖叫喪扯，那一刻真是超肉痛，幸好毛冷有一定彈力沒給他扯斷（艾菲完全唔係擔心佢會唔會整親，只係擔心條頸巾畀佢整爛:P），後來艾菲用堤子乾利誘他將頸巾帶上，習慣了以後他又OK肯帶足全晚，抵錫﹗

Happy 2014!

Happy New Year!

緊接著聖誕節後面的就是新年，由聖誕節開始我們幾乎天天有節目，未知是否出街太頻密玩得太開心，燒腩仔這幾天開始有點反常，不太聽從指令之餘很容易便發脾氣，最死是平日勁為食的他忽然節食，每餐食半碗飯便收工，連早晚七安奶都可以飲剩，所以2014年第一天也不敢再帶他四處走，只是平平靜靜地在家吃個外賣Good Morning早晨全餐慶祝算。

回顧2013年，最大的轉變是做了FTM，一手一腳照顧燒腩仔的起居飲食，說不辛苦不覺悶一定是假話，但最重要是自己要懂得調節心情，亦要感激米高一直在身後毫無怨言地默默支持，除了每晚放工回家幫忙做家務，還要陪艾菲傾訴忍受艾菲的臭脾氣，難得放假都要早起照顧燒腩仔好讓艾菲睡多一會兒，調換角色的話相信艾菲一定做不到他如此包容。

雖然湊著個小豆丁，所有生活都變成圍著他來轉，連私人時間都少得可憐，但能夠見證著他由一個只懂哇哇叫的手抱嬰兒，到現在開始能夠跟我們互動的小朋友，有事的時候又懂得哭著來找媽媽，已足以令艾菲覺得做FTM的選擇是正確的。