試食：Gerber鮮果乳酪乾

一直都想畀燒腩仔食BB乳酪糖，感覺比星星餅更有益嘛，但乳酪糖唔係周圍有得買，雖然大大包不過價錢唔係平，如果買咗返來佢唔食都幾浪費，所以就拖咗好耐都無買到，然後早排行萬寧見Gerber出咗鮮果乳酪乾，大大包賣三十幾蚊已經心思思想買，後來上網見到有試食就梗係參加來玩吓啦，估唔到又抽得中有得食喎，呵呵呵﹗



乳酪乾有蜜桃味同雜莓味兩款，係用真正乳酪同鮮果製造，而且不含防腐劑，人造甜味同香料，媽媽絕對可以放心畀BB食。



倒出來睇，好似一粒粒迷你肚劑餅咁嘅樣，適合十個月大以上小朋友食用，食嘅時候仲可以順便訓練小朋友用手指拎細小物品嘅能力添﹗



第一時間開咗包蜜桃味乳酪乾畀燒腩仔食，起初見到佢雙眼發光笑得勁開心，艾菲畀佢時仲第一時間伸手拎，唔使教已經知道食得九秒九放入口，不過...一秒之後...就食到面容扭曲咁嘅樣...起初...艾菲以為呢個只係佢平日試新食物嘅指定動作...點知...再畀第二粒佢已經吐返出來唔肯食（平日畀乜佢都食，吐返出來真係第一次）﹗隔咗幾日之後艾菲再試吓畀佢食，佢直情放都唔肯放入口添﹗睇來佢係好認真咁唔like呢個乳酪乾囉﹗

見燒腩仔竟然對乳酪乾咁抗拒，艾菲都即刻食返粒來試吓味，其實個乳酪乾真係無問題喎，味道比星星餅濃，有D似啫哩糖咁嘅味，估計佢唔like嘅可能係粒乳酪乾接觸到口水後會慢慢溶化，跟住就會黐住個口令佢覺得唔舒服掛﹗



艾菲都明白口味呢D真係無得逼，唔鐘意就係唔鐘意唔會改變，不過開咗成包乳酪乾唔食真係好浪費，都要諗吓有咩辦法可以氹燒腩仔食咗佢，跟住忽然醒起平日食麥皮都可以加乳酪，於是就係佢下午茶時間整咗碗牛奶麥皮畀佢食，再好隨意咁加幾粒乳酪乾落去，即管試吓咁樣佢肯唔肯食啦﹗



第一次食牛奶麥皮嘅燒腩仔，試食第一啖新嘢後例必樣衰衰，不過好快佢就覺得好味追住來食，仲連埋D乳酪乾全部掃清添，YEAH！我哋終於唔使做大嘥鬼啦﹗