13個月

話都無咁快，我就13個月大啦﹗本來呢篇blog應該準時出街㗎，點知媽媽就係我13個月大嗰日病咗，結果我就要遲兩日先見到大家啦﹗大家有無掛住我呢？嘻...相信唔少眼利嘅姨姨都發現我最近剪咗個新髮型，事源媽媽話我D頭髮長得太快，一長咗就好似成頭雜草咁見到都覺煩，所以叫公公幫我剪短D（自從第一次艾菲係公公協助吓剪完之後，每次同燒腩仔剪頭髮公公都搶住剪，咁艾菲梗係Q埋手由佢慢慢剪啦，呵呵呵...），咁公公剪吓剪吓就剪咗呢個花家姐頭出來啦，媽媽見到話好cute好襯我，但姨媽就話我好薯仔，你哋又覺得點呀？

 

自從上個月中去健康院打完針之後，媽媽就聽姑娘建議幫我減一餐奶，宜家我只係早晚兩餐奶飲七安，其餘三餐都係食固體食物，午餐晚餐都食一個大人碗嘅飯仔，下午茶就食吓生果，餅乾，麵包，蕃薯，麥皮或者pancake咁，但就唔係食得好多，一夠我就會推開D食物唔肯食㗎啦﹗至於新食物都無再好似之前咁要專登逐樣試幾日，媽媽宜家無論食正餐定零食都會畀D我試吓，唔...原來大人食嘅嘢係寧捨好味㗎﹗

今個月除咗繼續學用BB匙羹「畢」嘢食之外（暫時仲係要捉住手先識畢，仲未成功自己畢到），媽媽話要開始戒奶樽，佢有時都會試吓倒D奶落個飲管杯到畀我飲，但我通常飲兩安左右就顧住咬飲筒唔願再啜，要媽媽倒返落奶樽到先肯乖乖地飲埋去。另外佢都專登買咗個Avent學習杯畀我學用杯飲水，但我就學極都唔識囉，佢唯有拎返個新幹線鴨咀杯畀我學吓舉高手飲水先，練咗半個月之後都叫做有少少進步㗎啦﹗



瞓覺方面都係keep住一日瞓兩次晏覺，加埋大概三至四個鐘，如果出街就只係肯瞓兩個鐘左右，呢個月我無再半夜醒咗係到喊，不過就早咗起身，以前夜晚一覺瞓到九點半都唔起身，宜家未九點已經醒（有時未八點就醒），搞到媽媽話佢唔多適應喎（艾菲：仔...媽媽瞓少半個鐘都會好眼瞓㗎）﹗而媽媽宜家都無再好似之前咁氹我瞓，佢話大個仔要自己瞓，所以只會放我落床然後佢又一齊（扮）瞓，通常我係張床到碌半個鐘至一個鐘左右都會瞓。



呢個月我終於學識行路啦，宜家唔使人扶唔使用學步帶都可以四圍走（左腳仍然有D向內彎），不過識行之後就輪到學識扭抱唔行，好多時係街到行一陣就會攬實爸爸對腳跪低唔行要佢抱，搞到媽媽一個人同我出街的話都一定要帶定hip seat以防我跪低扭抱...

媽媽話我一歲生日之後好似醒咗好多，有D之前教極唔識嘅都終於學識，例如飛吻同聽電話啦，宜家佢哋話唔可以時，我會舉起一隻手指做nonono嘅手勢，有時會跟埋佢哋一齊搖頭添，不過點頭就未識，聽到歌會自己扭個身（超搞笑），我有時仲會捉住佢哋隻手示意叫佢哋拍手畀我睇，或者幫我入咗個形狀㗎，而媽媽就話大個仔要學多D自理，所以玩完玩具後佢要我幫手放返好，換完片又會帶我去廚房將條臭片掉落垃圾桶。


 
隨住我嘅活動能力越來越強，我體內粒百厭星亦開始發揮小宇宙，日日係屋企搞搞震嚇到媽媽死，就算跌到成面瘀傷都無有怕﹗除咗媽媽成朝顧住做家務唔理我就扭計喪喊發脾氣外，我已經識得自己係BB床到擒出來去爸爸媽媽張床搗亂，又會企上玩具箱搞電視機，洗手間或者廚房道門欄無閂實我就會自己開門入去玩水/垃圾桶，爸爸飲完杯貢茶放咗係我張highchair到我即刻九秒九埋去拎來試吓味添，嘻...係唔係好勁呢﹗不過幾強嘅人都會有弱點嘅，做完壞事之後只要畀媽媽「哦......」我，我就會即刻好驚咁扁咀喊（真係有眼淚㗎﹗超好戲﹗），不過喊完又好快繼續搞事，呵呵呵﹗

至於語言能力方面都叫做有些少進步，除咗爸爸，媽媽同mum mum之外，我宜家識得叫姐姐，阿婆同嫲嫲，不過唔係你叫我講我就會講，要我心情好想叫先會叫，其他疑似發音就有包包，蒲（apple個尾音）同bye，雖然媽媽好努力咁教我講好多嘢，但我好似學其他嘢咁唔講就係唔講。



呢個月仲有一樣嘢令我好開心，就係媽媽真係等我打完一歲針出關後，開始日日帶我去屋企附近嘅公園玩呀，有次爸爸返夜唔返來食飯，佢仲一個人長征帶咗我去鯉魚門拍拖添﹗去公園可以玩我最愛嘅軚盤，又可以見到好多哥哥姐姐，真係超好玩㗎，但我仲係好怕D上咗年紀嘅女人囉，有次個掃地嬸嬸埋來摸我腳仔，我即刻嚇到喊呀，之後佢一行埋來我就會撲去媽媽到避，姨媽話如果遲D interview時遇著呢D嬸嬸我就大獲，嘩﹗乜interview會見到嬸嬸㗎？咁我唔in啦﹗（艾菲：你就想﹗）