開學日@大埔海濱公園

經過一個漫長嘅暑假後，終於都來到九月一日開學日，正當個個都喺facebook出開學相，我哋偏偏出去公園玩嘅相，皆因燒腩仔學校今年有工程，延遲到四號先開學，雖然天氣又熱又焗，但唔趁呢日公園無乜人去玩幾時去呀，艾菲一朝早執齊嘢就一拖二出門，堅係好有決心㗎﹗



由於想順手同佢兩個影吓靚相，呢日又約咗燒腩仔公公婆婆飲下午茶，所以好勇咁挑戰大埔海濱公園，點知...BB豆豬一踩入草地就爆喊，唯有食吓星星餅定驚先。



一直食呀食食呀食食唔停口， 妹妹嘅情況都係無好轉，就算燒腩仔哥哥好心幫手氹一樣無用，眼見時間無多（約咗婆婆就夠鐘）又應承咗同哥哥去遊樂場玩，唯有影兩張就收隊走人，好失望呀...

三點式妹妹@清水灣

繼續回到八月時，去完十幾日旅行返來，米高D大假仲未清完，所以放多個星期陪我哋，艾菲當然要抓緊暑假嘅尾巴，叫佢再帶我哋去沙灘玩，皆因上次喺日本沙灘實在玩得唔夠喉，重點係妹妹套三點式水著仲未有機會出場，上次去泳池怕佢凍所以著一件頭泳衣，去日本又怕麻煩懶得換無著到，今次再唔著分分鐘要等多年㗎啦﹗



本身有諗過再去半月灣，但諗起入到西貢仲要轉船，帶住兩個細又大包細包咁，都係唔好咁辛苦，近近地去清水灣算，食飽午餐再慢慢執嘢出發，去到都係兩點幾三點仲有大把時間玩，然後我哋set好帳蓬開好地蓆就放BB豆豬出來，以為佢有過上次日本沙灘嘅經驗應該OK，點知都係要D時間warm up。



花咗D時間終於適應咗個質感，但都係keep住呆呆豬樣。

Sens Studio家庭相

寫完遊記就係時候清blog，緊接出場嘅係上年八月影嘅家庭相，話說BB豆豬未出世前，燒腩仔婆婆就同艾菲講，要等BB豆豬出世後全家人再去影一次家庭相，婆婆話燒腩仔出世時影咗一次，到表妹仔出世時又影咗一次，宜家第三粒孫唔可以無，影埋佢就「死而無憾」咁話，嘩﹗你講到咁大，艾菲唔敢唔做嘢啦...

由於有過燒腩仔當年太早影嘅經驗，BB太細一舊飯咁唔太好睇，艾菲啱啱生完未去水腫又影到好肥，大家都同意等BB豆豬足一歲，識行識走最好玩時先去影，然後一拖就拖到上年八月，我哋一家去完旅行返來先得閒影，咁啱Sens又做團購於是打去問價，跟住就join咗另一個唔係團購嘅十人plan，加多一位錢全家總動員11人影足90分鐘。

由於知道燒腩仔婆婆同姨媽都唔鐘意揀相，實係好豪咁加錢全部相買走，所以事前都有考慮過其他有得全包嘅studio，不過有過上年燒腩仔超失控嘅經驗，艾菲覺得studio環境同攝影師質素真係好緊要，加上我哋人太多，真係唔敢隨便試其他studio， 結果我哋今次拍攝基本上可以用一片混亂來形容，三個小朋友完全係你有你講佢有佢搞事，但出來嘅相又出奇地好OK喎，唔信？去相睇吓啦﹗



一埋位大家先同攝影師哥哥自我介紹，艾菲都未同攝影師哥哥講老人家想要咩，影慣影熟嘅佢已經好醒目，自動波叫公公婆婆同三個孫影咗先（上次去另一間無同攝影師講明，公公婆婆影唔到同孫仔孫女嘅單獨合照囉），跟住就係我哋各自嘅全家福，佢哋總有辦法令小朋友笑得開心，唔講唔知影呢張四萬咁口嘅相前，BB豆豬係零表情呆呆豬緊㗎囉﹗



等埋燒腩仔姨媽一家同燒腩仔舅父影，我哋就換第二套衫繼續，又係先影公公婆婆，再影公公婆婆同三個孫，跟住就各自小家庭影全家福，最後單獨影三個小朋友。

20個月

太好啦﹗媽媽終於寫完遊記，又到我出場嘅時候啦﹗話晒都係新一年，同大家講返句Happy New Year先﹗呢個聖誕新年，我同哥哥玩得好開心呀，仲收咗唔少聖誕禮物，媽媽話又係時候準備過農曆年，到時我哋可以著靚靚四圍去拜年逗利是，等我練定講恭喜恭喜先﹗



講返成長進度，食方面媽媽話完全唔擔心我，一日三奶四固無走雞，早餐下午茶食餅乾水果乳酪之類食物，午餐晚餐就一大碗有菜有肉嘅飯仔，最愛食烏冬粉麵同菜，食完自己碗飯會示意大人畀大人食物我一齊食，全程自己食唔使人餵，就算出街食飯爸爸媽媽都可以食得好輕鬆， 至於媽媽奶其實已經進入可飲可唔飲嘅階段，不過奶痴如我一夠鐘就會攬住媽媽錫，所以畀我搞到好冧豬嘅媽媽都無好強硬話唔畀同我戒。



瞓依然係我最難搞嘅嘢，開始唔願瞓兼越瞓越少，晏覺瞓超過一個鐘，夜晚就好大機會飲完奶仲眼光光，由夜晚十一點幾碌到凌晨一點要媽媽發火先瞓，然後一覺瞓到第二朝十點幾跟哥哥一齊起身，至於晏覺都係繼續無得逼，平日喺屋企就兩點左右飲完下午茶奶開始瞓，出街就玩到完全無電先肯瞓。

九州東京之旅~後記

呼~用咗五個月時間，終於成功喺出發去下次旅行前完成呢個遊記，無錯...喺去完呢個旅行之後無耐，我哋已經plan定2018年嘅旅行，亦已經一早買定機票，如無意外頂多四個月，艾菲又有得飛啦...啦...啦...（最近湊仔又湊到好低潮，把聲長期處於性感mode沙晒，幾乎發唔到高音咁滯，絕對需要D正能量頂住）



出發前同朋友講去旅行，大家嘅反應都話做咩咁勇，覺得我哋湊兩個去旅行係攞苦來辛，之但係我哋一向無老人家無工人姐姐幫手，唔通為咗自己舒服就無端端丟低BB豆豬或燒腩仔是但一個喺香港畀其他人湊咁自私咩，就算有長老肯捱義氣幫手，艾菲同米高都玩得唔放心啦，反正我哋都長期二打二四圍去，宜家不過係將個地點由香港轉移咗去日本之嘛，對我哋來講真係無乜分別，艾菲完全無攞苦來辛嘅感覺呀﹗



咁問心今次旅行辛唔辛苦，艾菲絕對唔會話唔辛苦，以前帶燒腩仔一個去旅行，佢仲細食咩玩咩我哋全權話事，宜家佢開始大開始有自己主見，有D位佢都會有意見，亦會玩到失晒控，更加會特登搞事唔配合，旅途上不停教仔基本上都已經係指定動作，如果同時間有另一個小朋友喺側邊扭眼瞓扭食嘢之類，都咪話唔惡啃。

九州東京之旅~Day13 東京>HK

來到旅程嘅最後一日，起身梳洗完執好晒嘢，check out前點都捉兩個小朋友同我哋房個東京鐵塔景影返張相留念，到底佢兩個點解咁合作笑得咁開心呢？艾菲已經唔係好記得，估係難得我哋畀佢哋坐喺個喼上面掛，kakaka...

今次去東京，本來仲有個地方好想去，就係參觀日本皇宮，不過艾菲一個月前唔記得上網book，結果當然係無緣去見識，反正最後一日都唔走得遠，於是近近地帶燒腩仔去築地睇吓，順便食飽D先上機。



壽司大，唔食都要路過望吓條人龍有幾長，想當年艾菲同米高第一次拍拖來東京，天未光就來排隊等食好嘢，宜家真係有心無力啦，派燒腩仔影返張相當食咗算。

九州東京之旅~Day12 藤子F不二雄博物館>自由之丘>秋葉原part2

離開藤子F不二雄博物館後，我哋去咗好多年前艾菲一去即愛上嘅自由之丘，唔知由幾時開始去東京，唔再鐘意喺新宿涉谷流連同人逼，反而鐘意來呢邊行小店慢慢尋寶，今次帶住小朋友來就更加，雖然燒腩仔極唔鐘意陪艾菲shopping，不過有踏切睇佢即超級興奮。



喺香港無機會睇到踏切，所以路過時點都捉住佢停低影張相，但身為超級車迷嘅燒腩仔竟然表現得扭扭擰擰，到第二次再經過時佢忽然叫我唔好再影，艾菲先意會到佢應該係怕我哋過唔切去對面而火車又開會有危險，好窩心又好傻瓜呢﹗



要令燒腩仔心甘情願陪艾菲shopping，單靠睇踏切係唔夠嘅，食物同飲品攻勢都好緊要，一場來到點都跟杜如風去食返件人氣芝士撻先。

九州東京之旅~Day12 藤子F不二雄博物館>自由之丘>秋葉原part1

作為前叮噹粉絲，艾菲今次去東京其中一個好想去嘅地方就係藤子F不二雄博物館，我哋第一晚到福岡米高已經去Lawson買飛，但由於佢相當受歡迎又限人數限時間入場，我哋早十日買都只可以買到星期一朝早十點嘅飛，唯有捱眼瞓早D起身趕車過去（個地點其實都幾唔方便），又我哋準時十點前到門口，眼前出現嘅係一條長長嘅人龍，大家嘅熱情真係超乎艾菲想像﹗



一入場職員會一人畀一部機你聽展品導賞（有日文，英文同普通話揀），同再三提醒展覽廳入面係唔可以影相，好多展出嘅藤子F不二雄手稿都係相當珍貴，當然燒腩仔呢個年紀係未識欣賞，但我哋喺側邊簡單講介吓佢都似明非明咁，睇完展覽就可以憑入場時派嘅飛仔出去睇套小電影，內容簡單易明，唔使識日文都OK，至少燒腩仔今次無喊驚仲識笑。



睇完展覽同小電影，大家可以好似BB豆豬咁同叮噹一齊坐低慢慢睇漫畫，或者去後面Kids area玩吓（for小BBonly）。

九州東京之旅~Day11 SkyTree>親水公園>錦系町>涉谷part2

出發前無意中發現Sky Tree對面馬路有個大橫川親水公園好正，見燒腩仔都算合作畀艾菲shop咗咁耐，就放棄原定嘅Akachan加插個行程帶佢去玩，點知去到門口叔叔話仲有五分鐘閂門﹗﹗﹗艾菲聽完堅係晴天pig pig囉﹗﹗﹗乜公園都會閂門㗎咩﹗﹗﹗（香港公園24小時㗎嘛...真係無諗過日本公園會閂五點...）真心諗住黃昏時間無咁熱可以慢慢玩㗎喎﹗﹗﹗



一場來到，乜都唔理啦﹗應咗叔叔知道後就直衝入去，玩到一分鐘得一分鐘﹗好彩公園唔算好大，即叫燒腩仔跑上去玩呢條超長滾輪滑梯，快快手我哋都成功玩到兩次呀﹗又可能呢到已經揚咗，眼見都唔少遊客帶小朋友來玩，日本小朋友反而唔多。



除咗超長滾輪滑梯，仲有條低階版嘅超斜滑梯同搖搖馬，燒腩仔自動波玩完長滑梯就衝去玩直至畀叔叔趕走，本來艾菲都想放BB豆豬出來一齊玩，相入面位日本媽媽仲喺艾菲手忙腳亂時幫艾菲手抱佢上去添，不過佢應該係驚唔肯玩。

九州東京之旅~Day11 SkyTree>親水公園>錦系町>涉谷part1

Happy 2018﹗完全無諗過寫個遊記，艾菲居然都拖過年，仲有緊接住由上年八月到宜家嘅blog未寫，來緊真係要快手D清blog先得﹗加油﹗加油﹗一定會追到㗎﹗



入返正題先，來到旅程嘅第11日，終於抽到時間去Sky Tree，本來想揀黃昏時間上來順便睇埋夜景，不過上網check咗呢晚會有花火大會暫停開放，咁唯有改朝早上來睇，又我哋無預先訂飛，來到walk in買，好彩都唔使點等，跟住人龍行大概十至十五分鐘已經上到去。



不過可惜嘅係，呢日一直天陰陰，由Sky Tree望返過去我哋住嘅東京鐵塔都仲望到，但只有好天先見到嘅富士山我哋就無緣見到，唔知點解每次來東京，見到富士山都會好開心，到宜家帶兩個小朋友來東京，都好有情意結想畀佢哋見識吓，或者...遲D...我哋再安排來多次東京啦...嘻...



唔知係唔係人多嘅關係，兩個小朋友呢朝都有D失控，燒腩仔未上去前猛話驚又呢又路咁，上到去就搞搞震亂咁走，就連平日緊跟大人嘅BB豆豬呢日都忽然唔要揹唔畀抱亦唔肯拖實大人，好彩喺混亂一片下艾菲仲記得捉實佢兩個影張相，亦記得攝影師朋友教呢D位要用閃燈，又全靠個閃燈成功引到BB豆豬笑。