Music Wonderland@Tom Lee

一直都計劃等燒腩仔夠六歲，D手指仔發育好先開始教佢彈琴，但艾菲認同音樂感應該自小培養，所以前排都有留意過市面上一D音樂興趣班，其中Tom Lee個Yamaha紅蘋果課程，好似都幾似樣，所以都有去了解過，但同米高商量一輪後，覺得燒腩仔始終仲細，而且屋企附近都無開新班，決定睇定D再算，睇吓睇吓就過咗半年，艾菲都幾乎無咗件事，然後忽然有日收到email話有試堂優惠，見$50咁平就當去見識吓啦﹗



由於燒腩仔都接近三歲，所以我哋最終無同佢試到紅蘋果，而係試高一級嘅Music Wonderland，老師話呢個課程同紅蘋果最唔同之處係，小朋友可以坐喺電子琴前面，訓練佢哋坐定定守紀律，小朋友見到有琴彈當然好興奮咁不停拍啦（好彩部琴係無開power掣，唔係實嘈爆），不過張琴凳真係幾高，唔小心or坐唔定就會跌落來，所以一齊上堂嘅家長一定要小心睇實。

老師介紹完自己，又認識完同學仔後，就正式開始上堂，首先拎咗本圖書出來，叫小朋友睇入面有咩人物，再叫小朋友做動作同扮聲，例如扮獅子行路，扮小貓打鼓，除咗做動作，亦會畀小朋友拍琴鍵練節奏，而同一時間佢會播歌配合返。

兒童薄餅派對＠Pizza Express

多謝肚B媽嘅聯絡同安排，成就咗今次Pizza Making Party，一班blog blog BB一齊整pizza，真係超好玩同開心呀﹗



艾菲事前專登忍住口，直至活動前兩三日先同燒腩仔講有得同小朋友一齊整pizza，佢一聽到即刻勁興奮，仲話要落好多好多菠蘿同火腿，到當日朝早起身仲第一句就話「我一陣去整pizza呀」，不過到夠鐘出發時又有少少扭（呢排出親門口都要扭吓先安樂>.<）， 去到現場更加係扮怕醜，咩人叫佢都唔應...



好彩餐廳方面，一早就已經布置好成個party area，有小朋友至愛嘅氣球，同巨龍肚B佢哋拍吓波，逐漸回復正常mode。

試用：GIO PILLOW超透氣護頭型枕頭

小朋友瞓得好唔好，足以影響佢一日嘅表現，由細到大艾菲都好著重燒腩仔嘅睡眠質素，而要小朋友瞓得好，除咗要有舒服嘅入睡環境，一個好嘅枕頭都好重要，所以艾菲今次見到MyBB有GIO PILLOW試用，就即刻報名參加。



市面上好多嬰幼兒枕頭都係單一尺寸，不過GIO PILLOW就根據亞洲BB月齡同頭圍發展，設計咗三個尺碼，相對更加有效為小朋友管理頭型，而且個枕頭入面有「3D蜂巢立體透氣層」，涼爽透氣不流汗，枕心同枕袋又可清洗兼速乾，杜絕塵璊過敏源，真係好啱大汗又容易皮膚敏感嘅燒腩仔。



枕頭寫明Made in Korea，仲擁有專利認證，能夠預防同改善因為睡姿而引起嘅頭像變型情況，再加上Airmesh有空氣層能呼吸嘅枕心，有助降低嬰兒窒息嘅風險，就連未足六個月大嘅初生BB都可以安心使用。

感官花園＠觀塘海濱長廊

早就聽講觀塘海濱長廊完成咗擴建，範圍由觀塘延伸到牛頭角，上次帶燒腩仔踩scooter時已經想去，無奈當時米高堅持想去佐敦谷（其實佐敦谷全部斜路，唔太啱燒腩仔呢D初學者，而且佐敦谷好似係唔踩得單車），終於等到啱啱呢個星期日，想去MegaBox睇D嘢，就好順路咁去咗。



我哋坐巴士出發，去到觀塘碼頭落車，一落車就見到呢架載運油車過海嘅船，宜家呢D交通工具真係買少見少，難得見到當然即刻帶燒腩仔埋去見識吓，而本身係車迷嘅燒腩仔都好認真咁睇同聽我哋講解。



睇完船行咗五分鐘左右，我哋就到觀塘海濱長廊啦﹗擴建之後嘅海濱長廊，感覺係一望無際開揚咗好多，可以清楚望晒對面海嘅港島東，連每逢假日都逼爆草地嘅人群都分散咗。

夜遊迪士尼

燒腩仔姨媽一家，前排忽然話畀艾菲知佢哋上星期五會入迪士尼，難得有表妹一齊玩，艾菲就諗住湊完燒腩仔放學即帶佢入場，不過我哋開行turbo趕過去，遇著荔景站來架青衣車，再到欣澳站送車尾，終於都要六點先入到去，但呢日原來係迪士尼十周年慶祝，night parade無咗，煙花仲要七點三就放，即係得一個鐘唔夠嘅時間玩...



一知道有得去迪士尼，已經不停話要探米奇，高飛同Pluto，又話要玩揸車，但要喺一個鐘內完成所有嘢係無可能嘅事，唯有解釋佢知天黑米奇佢哋要休息，直接同佢排揸車就算。



等咗二十分鐘左右終於都玩到，而今次仲難得地有姨媽捱義氣陪佢玩，等艾菲可以舒舒服服咁喺出面等，Good!

I'm loving it!!!

自從燒腩仔兩歲後，艾菲對佢嘅飲食放寬咗好多，間中都會畀佢食麥當勞...嘅...粟米杯，皆因佢唔食佢爸爸米高都要食（有次同同學仔媽咪講開，原來好多爸爸都係麥當勞fans來），後期進展到畀佢食麥芝蛋漢堡，再到近呢兩三個月艾菲竟然連漢堡包都畀佢食埋，仲要一食就愛上成日提住，有次同佢行過超市，佢死命咁拎住包芝士喊晒口話要買，向來唔縱容扭買嘢嘅艾菲當然無就範，但就估到佢其實唔係想要芝士，只係想食芝士包裝上面個漢堡包，所以就提出唔扭買嘢就整漢堡包佢食呢個offer。



為食嘅燒腩仔聽到有漢堡包食，當然即刻合作無再扭啦，不過就輪到艾菲煩買料，如果自己食的話好簡單，求其買個嘉頓漢堡包加急凍漢堡扒，翻熱漢堡扒再夾塊芝士就OK，但畀小朋友食始終想健康D，有菜有肉同盡量避開醃製品，所以就好神心咁決定自己用急凍雞柳整雞肉漢堡，同漏夜走去屋企附近嘅日式超市搵日本產可即食嘅蕃茄。

雞肉漢堡嘅造法艾菲係參考OL醉愛廚房嘅食譜，無跟足份量，亦純粹憑感覺調味，所有材料撈勻先加蛋，如果太濕就加多D麵包糠，然後造型同拎去煎，煎完喺麵包到搽上茄汁，按次序加入芝士，雞肉漢堡同蕃茄就搞掂，另外怕唔夠菜仲特登整埋南瓜薯蓉（唔怕熱氣可以整薯角添）。

35個月

嘩﹗唔覺唔覺我就35個月大，仲有一個月就三歲啦﹗為咗隆重其事，媽媽仲專登買咗副超畀我去威戴，藍色撞黑色係我自己揀㗎，襯返我喺呢個夏天曬黑咗嘅膚色，大家覺得我型唔型呀？



呢個月我D腸胃又差咗，無端端喺一星期內嘔咗兩次，不過兩次都係嘔完就無事，唔使睇醫生食藥，但就畀媽媽勒令食兩日白粥清腸胃，結果我餓到半夜瞓唔著，喊住去隔離房求爸爸媽媽畀我食餅充饑呀陰公，自此以後我又變返大食怪，有咩都搶住食唔識停，食飯食得超快唔使媽媽勞氣（艾菲：今次又唔知keep到幾耐啦﹗）。

至於瞓覺就成日畀爸爸投訴，晚晚十點入房搞到十一點先瞓，但成日朝朝七點幾八點就起身，走過隔離房叫醒爸爸話去廁所（艾菲：通常凌晨五點前就係我負責嘅，但呢D鐘數我多數咩都聽唔到要米高搞:P），尤其爸爸放大假個星期，更加係日日準時叫醒佢，仲要去完廁所唔肯瞓返，搞到爸爸放假都無覺好瞓，要媽媽訓話一輪先好返少少肯上床瞓多陣，至於晏覺已經變得可瞓可不瞓，有時你叫我瞓我偏唔瞓，不過有時媽媽唔想畀我瞓，我行住街睇緊玩具都會扭爸爸抱我瞓。

知蘭而行＠賽馬會創意藝術中心

同米高講咗三次，終於喺上星期日最後一日，落雨無得去邊時，先肯同我哋去，本來諗住一早起身就出發，再落深水埗食好嘢同睇玩具，成個行程睇落好perfect，點知...先係艾菲瞓過龍，搞到遲出門口，要喺樓下商場食埋午餐先走到，然後...輪到燒腩仔食完成碗意粉嘔返晒出來，要急急腳上樓清潔休息一輪，確定佢無發燒只係食太飽，我哋先敢出發。



去到都成三點幾，大堂位置放咗D蘭花畀人欣賞，亦有個位係可以扮種蘭花，但怕污糟嘅燒腩仔係完全唔識欣賞。



行入室內諗住睇吓有咩玩，點知當日所有workshop已經full晒，包括燒腩仔最想玩個滑梯，一場來到又乜都無得玩，小朋友當然失望兼扭計，連艾菲都有D後悔來咗，然後講咗一大輪道理，先拉到佢行落下一層，見到呢個secert garden排隊就玩得，拿拿聲行埋去排。

K1適應日＋正式開學

兩日暑假轉眼就過，燒腩仔喺上星期三已經正式開學成為K1學生，而學校亦好好咁喺頭四日安排咗適應日，畀家長全程陪住，同埋只返個半鐘，對於錯過咗N班適應日嘅艾菲來講，實在係彌補心靈損失同了解學校&燒腩仔嘅好機會﹗



Day 1 26/8/2015 (Wed)

第一日返學專登預早出門，同上次來註冊時一樣，因為有直車到學校，我哋唔使半個鐘已經返到去，學校好貼心咁，喺禮堂放晒D滑梯，搖搖船之類嘅大型玩具出來畀小朋友任玩，一入門口燒腩仔就畀車陣引咗埋去，好彩我哋早到唔使排隊就玩得，之後都勸咗佢一陣先肯去玩其他嘢，然後就到燒腩仔嘅同班同學妹豬隆重出場﹗我哋兩個媽媽勁興奮，即刻拉佢哋握握手做個好朋友，以後你哋就要互相照應啦﹗kakaka...

玩咗陣見差唔多夠鐘，就帶燒腩仔去洗手間再坐低準備開學禮，而米高就喺正式開始前撤退（通告寫明只可以一個家長陪，但有D家長就帶埋姐姐一齊陪...），所謂開學禮其實都無咩特別，只係校長簡單介紹吓學校，之後就輪到分組參觀課室同玩遊戲，我哋組先去玩玩具，燒腩仔好乖全程肯排隊又無爭嘢玩，仲識撩同學仔玩（不過人哋唔睬佢囉:P），玩彩虹傘時玩到勁hyper，睇到艾菲都好開心同放心。

到夠鐘就輪到我哋入課室參觀啦，小朋友要自己搵返自己個位坐，而媽媽最開心嘅除咗係燒腩仔真係大個仔，識得自己坐定定聽老師講嘢，就係妹豬居然同佢同組兼坐隔一個位咋，嘩﹗你兩個有緣到呢﹗大家坐定後老師就簡單介紹返學要注意嘅事項，講完就逐個派書包同禮物，女仔有Minnie換衫公仔，男仔有Thomas電動火車，開心死燒腩仔呢個車迷，一出課室門口就好威威咁跑去show畀喺出面等我哋放學嘅米高睇啦﹗

Day 2 27/8/2015 (Thu)

第二日返學繼續由艾菲陪燒腩仔，呢日一返到學校，車迷又畀車陣引咗埋去，但見後面排隊條龍越來越長，艾菲就拉燒腩仔走，玩滑梯同爬蟲蟲都一樣開心，到夠鐘就全部人一齊入禮堂坐定，原來呢日係玩集體遊戲。

我哋先玩唱歌做動作，再玩音樂傳球，一停音樂拎住指定顏色波嘅小朋友要出去台前答老師問題，之前返N返到hea吓hea吓嘅燒腩仔，係估你唔到咁投入，一直等出去答問題嘅機會，試咗三round後終於畀佢等到，老師一宣布咩顏色波嘅小朋友出台前，佢第一時間跑咗出去，好勇猛咁答問題全無怯場，實在係睇到艾菲眼都突，呢個真係我個仔？？？

之後學校安排咗切蛋糕儀式，個個小朋友見到蛋糕都嘩嘩聲勁開心，燒腩仔當然都唔例外啦，影相時艾菲仲驚佢會手多多篤個蛋糕添呀﹗臨走時老師又一人派一把扇仔做禮物，呢間學校真係好識捉住小朋友嘅心，等個個都返學返得開開心心，返到屋企同燒腩仔傾偈，佢仲用慘慘豬嘅聲同艾菲講「我唔捨得學校呀」，真係浮誇到有D頂佢唔住...

遊山玩水＠海防博物館

來到暑假嘅第二日，亦即係最後一日，經過之前一日遊大澳熱到溶嘅體驗後，我哋呢日都唔敢去得太盡，畢竟第二日就要開學，玩到燒腩仔散咗病咗就大件事，所以決定輕鬆少少去海防博物館（實情都唔太輕鬆>.<）。



我哋坐地鐵出發，喺筲簧灣站行過去，大概十五分鐘左右就到，未入場買飛，已經見到門口擺咗枝大炮同幾部軍車，即刻帶車迷燒腩仔過去研究吓。



買完飛就坐電梯上咗八樓，其實艾菲想當年仲係學生時來過一次，知道呢到有分室內同室外展館，室內展覽廳就係有帳蓬嘅位置，其餘室外嘅展品就佈滿成個山頭。