初三行大運＠濕地公園

難得米高今年農暦新年可以連放七日，重點係初三終於唔使被徵召返工，艾菲都覺得特別輕鬆，至少朝早可以瞓多一陣，等佢負責搞掂燒腩仔起身刷牙洗面食早餐嘅嘢，就算只係叉多半個鐘電，心情都寧捨好D㗎﹗kakaka...



見年初三米高得閒又唔使拜年，我哋就決定善用港鐵半價優惠，勇闖大西北行個大運，先坐港鐵轉西鐵到天水圍站，再轉輕鐵去濕地公園，其實唔難去㗎，但車程就OK長囉，我哋食飽一點出發，去到都兩點半啦。



唔知係唔係好多人同我哋有一樣諗法呢，呢日嘅濕地公園係超旺場，排隊買飛都要等半個鐘，好彩正門出面有個水池可以畀燒腩仔消磨吓時間，佢不停話要學D哥哥姐姐衝過水柱，跑到完全唔肯停，艾菲幾乎想叫米高慳返$60唔好買飛，就咁喺到玩一個下午算。

羊年大吉﹗

新年快樂﹗

我燒腩仔喺到祝大家身體健康﹗心想事成﹗大吉大利﹗一團和氣﹗財源廣進﹗最重要就係要咩有咩﹗

今年已經係我第三年過嘅農暦新年，爸爸媽媽會一如往年咁帶我四圍去拜年逗利是，而我亦由上個月開始學定點講恭賀說話，媽媽話瞓醒一覺就係我嘅show time啦﹗希望我唔會發台瘟唔記得對白或者太興奮要暱埋扮怕醜啦﹗

而我亦想喺到祝爸爸今年繼續畀心機搵錢養我同媽媽﹗媽媽就一定要身體健康，將舊年D霉氣全部掃走﹗自己呢就聰明伶俐快高長大發少D脾氣同收多幾架車仔啦﹗恭喜恭喜﹗

行年宵＠維園

難得執好屋，食晒團年飯，整好年糕，貼好揮春，入好全盒，仲要撞正米高年廿九放到下午，我哋就選擇咗今日同燒腩仔逃學去行年宵（佢間學校係返學返到年三十晚㗎，不過好多同學呢個星期都請假無返啦，尋日接放學都冷冷清清咁），等佢同人逼吓感受吓節日嘅氣氛。



其實星期日返燒腩仔爺爺嫲嫲屋企食團年飯前，我哋都已經帶咗佢去行觀塘嘅年宵市場，不過唔知係唔係時間太早，定撞啱落雨呢，成個年宵除咗花之外，乾貨真係無乜嘢睇，仲要冷冷清清咁無乜氣氛。



艾菲始終覺得維園先係最有氣氛嘅年宵市場，但要帶小朋友去真係要揀平日下午，就算今日已經係年廿九，人多極都有個譜，見其他家長就算推住BB車，都輕輕鬆鬆咁行到，唔似往年年廿八夜晚已經逼到人貼人。

小幫手入全盒

年廿八洗邋遢，艾菲都有應節執吓屋（其實平時有執開，所以都好輕鬆就搞掂），咁執完屋就可以整埋D濕星嘢準備過年啦，而其中一樣過年一定唔少得嘅入全盒嘅工序，今年終於可以交托畀小幫手燒腩仔做啦﹗

燒腩仔學校呢排都有教咩係農暦新年，上星期亦開咗個以農暦新年為主題嘅生日會，仲有迷你年宵玩添，佢有日放學返來就同艾菲話老師教「過新年要吃糖果」（除咗食糖果同食年糕之外，其他關於新年嘅嘢又唔記得㗎喎），艾菲今朝拎個全盒出來洗，佢已經識得偷偷地走去打開個蓋，未教都識講「全盒」呢兩個字，唔...食糖嘅威力果然係特別大。



見佢都知乜嘢係全盒，我哋夜晚食飽飯就畀佢試吓自己入，但佢又好似唔多明點入咁，我哋唯有每格都放少少落去先，再同佢講要做配對，放返D食物去相應嘅位，咁佢二話不說就開始筆開心果落去，都筆得有板有眼㗎。



不過呢...筆咗一半左右，有人就詐詐諦諦想放落口偷食啦﹗即刻畀我哋叫住，佢好尷尬咁笑咗笑之後，都肯乖乖地繼續入。

燒腩仔揮春

一年一度燒腩仔揮春又來啦，上年pat pat痕試整之後，燒腩仔婆婆同嫲嫲都勁like，就連燒腩仔姨媽都真係將D揮春貼足一年，咁今年基本上都無藉口唔整啦﹗

今年已經特登提早同燒腩仔剪定頭髮，亦學咗簡單執相可以唔理佢額頭道血痕，但拖吓拖吓都係拖到2月頭先得閒影相，最終等埋佢另一個partner表妹D相，搞到上星期通咗一晚頂先整完total 15張揮春﹗



一心以為今年燒腩仔識聽又識講，影相呢part會smooth D啦，點知...一切都只係艾菲太天真嘅諗法，實情係呢個小毛豆超唔合作，一係唔畀表情叫極唔笑或者唔望鏡頭，一係勁hyper不停跳不停搖，一係就做恭喜動作做到手抽筋咁，再唔係就搵D道具遮住自己個樣，點講點氹都唔太work，出動埋巧虎都不為所動，就連喺側邊幫手嘅米高都就來頂唔住想發火，最後艾菲只係每款相影到一張稍為滿意嘅就收工啦。

燒腩茂又來啦﹗

雖然燒腩仔微燒咗一晚之後已經無再燒，但D鼻水就一直未清，唯有同佢請多幾日病假喺屋企休息，農暦新年前席都係小心D好，廢事返學校再同同學交叉感染啦，但成日流流長又唔落得街放電，總要畀D嘢燒腩仔做㗎嘛，終於的起心肝擠D時間出來同佢玩吓親子烘焙，而我哋今次就整咗日式蒸蛋糕，貪佢用蒸嘅方法無咁熱氣，仲可以順便試吓艾菲新配畀個Staub嘅美亞蒸架。



燒腩仔：Hi! 我燒腩茂又來啦﹗等我幫手介紹吓D材料先﹗

材料：（食譜係艾菲喺網上討論區copy返來嘅）
雞蛋  2隻
糖  75g
牛油  40g
牛奶  180ml
低筋麵粉  200g
泡打粉  4茶匙
雲呢拿油  幾滴



燒腩仔：嘻...整蛋糕梗係要有蛋啦﹗媽媽今次仲教咗我點打蛋添呀，打完蛋就話我知透明嘅係蛋白，黃色嘅波波原來叫做蛋黃喎﹗

28個月

Hello! Hello! 兩個月無見，大家有無掛住我呀？上個月媽媽返咗婆婆到休養，唔得閒寫我嘅27個月成長紀錄，佢話今個月一次過寫返，不過...都係遲咗幾日先出到街，唔...媽媽你下次可唔可以準時交功課呀？好多姨姨會掛住我㗎﹗（艾菲：REALLY？？？）

呢兩個月嘅飲食習慣都係同之前差唔多，除咗唔食豆同有皮有渣嘅嘢食之外咩都肯食，但就餐餐都食到誓願咁搞到媽媽好勞氣，尤其係返學前嘅一餐，媽媽就會特別煩燥不安， 不過我係唔會理佢，貫徹始終過我嘅慢活人生（艾菲：又唔係唔食㗎喎，但食到一半左右就停晒手發呆，要三催四請甚至話佢先繼續食，已經試過計時收碗但都完全無用，只係收碗時喊幾聲，下一餐又係咁...）。

宜家我終於出齊牙，D食物可以整返大粒D自己咬，而我亦學識咗用筷子，係食得慢D但都完成到成碗麵㗎，仲有一樣嘢都係呢個月先學識嘅，就係自己用手拎住食物來食，之前我成日嫌D pizza雞翼春卷污糟唔肯用手拎，家陣已經克服到呢個心理障礙啦。

試用：全新百靈IRT 6520耳溫槍

近排流感肆虐，一向身體算好嘅燒腩仔都中咗招，仲要來勢兇兇話來就來，早一日佢仲龍精虎猛搞搞震，第二日返學無耐就接到班主任電話話佢個樣好似好攰，到接佢放學時已經摸到佢有D熱，傍晚時間去睇醫生時已經發緊燒，之後成晚都keep住38度左右，好彩第二日我哋就收到MyBB抽中嘅全新百靈IRT 6520耳溫槍，可以即刻開來試用，自己mon住燒腩仔嘅體溫。



百靈ThermoScan耳溫槍，對有小朋友嘅家長來講一D都唔陌生啦，基本上絕大多數嘅醫院同診所都係用佢哋嘅耳溫槍，可以話係專業同信心之選。



拆盒之後就會見到左邊幅相嘅耳溫槍，耳套，同埋保護盒，耳套啱啱好可以放入保護盒到，將佢哋合併之後就會變成右邊幅相咁，細細個一D都唔阻地方，又唔怕整爛個耳溫槍同整唔見D耳套。

足球小將

燒腩仔一直都有入字腳嘅問題，但隨住佢越來越大，個情況都明顯改善咗好多，不過當佢攰或者心急時，隻腳掌仍然會不其然咁向咗入，好容易就會因為咁而跌低，艾菲上網睇咗D資料，知道睇醫生幫助都唔係太大（之前問過醫生意見都係話等佢自己慢慢摸索改善就OK），反而得閒可以喺屋企同佢拉吓筋，同盡量唔好再畀佢趴喺到瞓（燒腩仔個case估計係細個成日趴喺到瞓而影響），記得有人講過踢波會有幫助，艾菲就成日推米高同燒腩仔踢，但喺屋企地方始終有限，跑多幾步都已經撞牆，終於上星期六我哋兩母子就獲得御准跟埋米高去踢波啦﹗



燒腩仔：未夠鐘攞場住，就等我喺場邊熱吓身先﹗



燒腩仔：等我扭吓花畀你哋睇啦﹗hehe...

遲來的迪士尼之旅

話說呢個迪士尼之旅應該係上年艾菲生日之後去嘅...事源米高喺艾菲生日當日要返工陪唔到我哋兩母子去海洋公園，就問艾菲想點補祝生日想補償返，咁艾菲梗係打蛇隨棍上話帶燒腩仔去迪士尼啦，難得唔like迪士尼嘅米高肯應承，仲主動話買銀卡，咁我哋就約好咗生日後個星期三去，點知...舊年年尾個意外，呢個迪士尼之旅想唔取消都唔得啦，本來都以為燒腩仔同迪士尼無緣（之前幾次朋友有免費飛我哋都夾唔到時間去唔成），但上個月中銀卡加價前嘅一星期，艾菲就忽然抽起條筋，想兌現返份生日禮物同順便彌補返燒腩仔聖誕節無得四圍玩，所以就造就咗今次嘅迪士尼之旅啦﹗



雖然我哋有銀卡可以慢慢玩，但話晒今次都係燒腩仔第一次入迪士尼，個心始終想佢玩得盡慶D， 所以揀咗上星期四同佢逃學去玩（以為會少人D），我哋一早就起身出發，十一點左右已經到迪士尼。



可能真係第一次來，未知迪士尼有幾好玩，所以沿途一D都唔興奮（除咗坐米奇列車），來到正門同城堡嘅影相位，連叫佢落BB車或者望吓鏡頭都唔肯。 >.<

K1求學大作戰 ~ 總結

終於過咗15-16年度K1統一註冊日，學校call waiting大執位亦應該執得八八九九，艾菲都係時候幫燒腩仔呢次K1求學大作戰寫返個總結。

經歴過上年hea報N班，見3間只得一間肯收燒腩仔讀pm之後，今年K1艾菲係嚴陣以待，再加埋燒腩仔本身係十月細仔，同埋interview前有一段時間係唔肯同陌生人講嘢，甚至入陌生地方都會扭一大餐，所以艾菲好保險咁同佢報咗13間，心諗撞時間或者狀態差，都總有一兩間肯收佢掛...

結果呢...我哋好好彩，報13間13間都無撞到時間，燒腩仔亦算狀態大勇，無再扭計話唔入學校，除咗個別一兩間去到有D玩嘢專登搞事，其他都係一見老師就上身咁問乜答乜，最終我哋1間自動棄權，其餘有4個offer（2am＋2pm），5間waiting同3間reject，成功率叫做有1/4，都好唔錯啦﹗

雖然有offer嘅都唔係艾菲最最最心儀嘅學校，但艾菲明白今年龍B真係競爭好激烈，普通邨校都成千人爭幾十個位（事後都有諗返轉頭覺得我哋有D冒險，因為我哋報嘅就算只係區內學校，都算係一D比較熱門受歡迎嘅），所以燒腩仔有4個offer，我哋有得揀而且全部都係有口碑嘅，艾菲同米高都要收貨。