Monkey呀﹗

隨住燒腩仔擒梳化嘅技術越來越好，由初初要擒幾次先有一次上到梳化，到中段上到但唔識落，成日用頭落地要我哋係playmat接住佢，再到後期隨時都可以係梳化到上上落落，可能佢已經覺得擒梳化呢個玩兒無乜難度，鐘意挑戰難度嘅佢，最近除咗鐘意擒上梳化頂搞D毛公仔之外，仲鐘意咗做空中飛人由梳化擒過放隔離嘅high chair...

話咗佢好多次唔可以，惡樣say no加打手仔都試過，但呢隻仔基本上係你越叫佢唔好，佢越要去做嘅朋友來，某一晚出完街返屋企，當艾菲同米高都忙住執嘢嘅時候，呢隻Monkey又唔知幾時擒咗上梳化，再完全唔知死咁擒緊張high chair，學肚B媽話事頭，係安全嘅情況吓，艾菲梗係要影低佢D衰嘢公諸於世啦﹗



左上：襯大人忙緊，又擒咗上梳化邊想搞high chair條安全帶（唔知點解燒腩仔好鐘意咬條安全帶...），艾菲見到梗係即時惡聲惡樣say no啦﹗

右上：呢隻仔聽到艾菲發惡，望一望艾菲傻笑咗幾吓（成日一鬧佢就用呢個傻笑攻勢搏你唔再鬧），然後完全當艾菲無到咁繼續好high咁搞條安全帶﹗

左下：睇吓佢幾危險，成個人攝住咗梳化同high chair中間，個樣仲要扮無嘢好震定咁，完全當係側邊怒啤佢嘅艾菲透明﹗

右下：完全唔識驚，然後懶醒咁拮起個pat pat將對腳踩返上梳化，真係唔知應該話佢叻定咩﹗

最後呢隻Monkey當然係由high chair到跌咗落來，好彩艾菲早有準備即刻接住佢先無事啦﹗而呢個燒腩仔明明跌落來時磨到手臂應該都痛，不過就可能知係自己衰先怕畀人鬧，所以叫咗幾聲就即刻收聲唔敢再喊﹗

事後艾菲當然好惡咁鬧咗佢一輪啦，而呢隻硬頸嘅燒腩仔就死都唔肯認輸，只係不停對住艾菲傻笑，到艾菲忍唔住打佢手仔來懲戒佢，佢都一直死忍唔喊（佢平時一打就喊﹗今次係打咗幾吓都仲死忍﹗），只係不停撲埋來攬實艾菲想逼艾菲收聲，到艾菲死都要推開佢罰佢坐定定時，佢就發難狂喊，好彩喊咗十分鐘之後佢都肯冷靜落來，望住艾菲聽艾菲講咗陣道理。

其實打佢手仔嘅時候，見到佢一直死忍，艾菲真係好心痛，亦終於明白想當年婆婆教艾菲係幾咁勞氣，事後都忍唔住攬實燒腩仔喊咗出來...原來性格真係有遺傳㗎 ﹗燒腩仔除咗似艾菲細個咁爛玩，你越叫佢唔做佢偏要做，畀人鬧會傻笑扮無嘢之外，D臭脾氣都似到艾菲十足，人仔細細嘅燒腩仔，已經識得D形狀入咗好耐都入唔到時會發脾氣掟嘢，得唔到嘅嘢會死lur喪扭直至你畀佢為止...

有過自己細個為咗呢D嘢而多次同婆婆講道理講通宵嘅經驗，艾菲當然同婆婆一樣唔會縱容燒腩仔嘅臭脾氣啦﹗雖然深信將來教燒腩仔嘅過程一定會好勞心勞力，但艾菲都一定會好似婆婆咁堅持到底，直至將燒腩仔教好為止﹗