十一個月

篤...篤...篤...篤...篤...篤...呢個牌到底係咩來？做咩插係個蛋糕仔上面阻住我食嘢㗎？

嘻...係我燒腩仔呀，媽媽話我今日十一個月大，佢整咗個蛋糕仔畀我應一應節喎﹗生日牌只係佢無意中係櫃桶底搵到，所以插落去等個蛋糕仔靚D咋﹗

呢個月我嘅飲食大致上都係一樣，一日五餐，三餐奶兩餐固體，份量都無乜點變，只係胃口差咗D，好多時下午茶餐奶都唔願飲，飲咗四安幾就會拎返個奶樽出來，就算固體食物都係睇心情，想食時我可以極速食完成個大人碗嘅飯，唔想食時食到碗飯凍晒都只係食到一半，不過自從媽媽買咗隻新杯畀我之後，我宜家用飲筒飲水叻咗好多，無漏到成身都係水啦，媽媽今日仲話畀隻BB匙羹我試吓自己「畢」嘢食添，但我就只係想拎實隻羹就算囉（拎實咗就唔畀人掂，一掂即超惡咁嘈到拆天，根本無可能教到佢畢嘢食﹗）﹗

今個月我都有試食新嘢㗎，有車厘子，冬菇，生菜，蛋白，牛肉同菠菜麵，因為去咗兩日澳門同病咗成個星期，加上媽媽呢排好忙所以只得咁少新嘢食啦，而媽媽見我前排食粥食得麻麻就試咗煮爛飯我食，我都幾鐘意覺得幾好味㗎，不過因為要咬就食得比較慢，始終都係得下面兩隻牙嘛，所以媽媽暫時都係煲粥多，爛飯只係爸爸朝早起身唔記得焗粥時先煮我食。

至於瞓覺方面媽媽就話我差咗好多，我係可以一覺瞓天光，亦keep住日頭瞓三次晏覺，但除非我無電好眼瞓，否則都要搞好耐先肯瞓，仲學識合埋眼扮瞓著添，只要媽媽一放低我落床，我就會碌大隻眼爬返起身望住佢笑，就算瞓著都好多時瞓半個鐘就醒，媽媽話來緊呢個月可能要同我調一調個schedule，或者減其中一覺晏覺睇吓我頂唔頂得順喎﹗

呢個月我除咗繼續四圍爬同扶住傢俬四圍行，跟住媽媽四圍搞搞震之外，亦開始可以鬆開手唔扶嘢行幾步碎步，但就依然唔鐘意用學步帶，媽媽一將條帶套落我身我就會即刻放軟對腳爬走，另外我仲學識咗自己坐上玩具車同自己落車添，每次返婆婆屋企一聽到獅子車個音樂停咗就會落車去車頭㩒返著佢。

媽媽話我呢個月嘅認知能力有好明顯嘅進步，佢終於明白我係唔逼得，D嘢我要識嘅忽然有一日就會識，我唔想做你點逼我都無用，例如佢忽然有日發現我玩推珠仔已經進展到玩中間D比較難嘅軌道，仲有佢教咗我幾個月嘅入圈圈，我一直都只係掟落條柱，但今晚就忽然開竅識得自己慢慢放入條柱到，而我呢幾日都終於識得見到人Say Hello時要揮揮手，Bye Bye就要開合手，至於媽媽講「好嘢」時我仲未識拍手，只係會好開心咁fing對手。

呢個月我講多咗好多嘢，成日係屋企依依哦哦，媽媽仲話屋企好似多咗個外國人係到住，成日講好多BB話係佢唔識聽，到宜家佢只聽得明我講爸爸，媽媽同mum mum，其他音就有疑似哎吔同婆婆，而我嘅表達能力都越來越強，例如我係街玩緊lego媽媽話要走，我會嘈到拆天話佢知我唔想走，行百佳來遠見到缸魚又會踢晒腳叫媽媽快D推我埋去睇，而我亦終於聽得明媽媽講嘅「NO」係唔准嘅意思，每次我想搞把風扇或者想跟佢爬入廁所，只要佢大大聲加惡樣講聲NO我就會停低同縮返隻手（但有時都會唔理繼續搞﹗）。

我宜家好鐘意黐住人㗎，係屋企好鐘意跟住媽媽四圍走，如果瞓醒晏覺唔見咗媽媽我會喊到癲，爸爸返來又會好開心咁即刻爬去要佢抱，有時自己玩緊時都會忽然走去扯住佢哋條褲攬實佢哋唔畀佢哋走咗去，見到佢哋換衫我更加會大叫提佢哋帶埋我走，出到街我就會好似放監咁四圍撩人玩，不過如果你同我講嘢，尤其話想抱我或者掂我手仔嘅話我會驚到喊，我除咗識得嘅人之外唔畀其他人抱同掂㗎﹗