紅雞蛋

今日係燒腩仔農暦生日，艾菲細個嘅時候，每逢屋企有人農暦生日，婆婆一定會晨早起身烚雞蛋畀大家食，宜家輪到艾菲做人媽媽，當然想將呢個傳統保留啦，但最近pat pat有D痕嘅艾菲就唔甘心於只係烚蛋咁簡單，而係想整紅雞蛋畀燒腩仔，點講都係佢第一次過生日嘛，梗係要花多D心思啦﹗

整紅雞蛋一般有兩個方法，一個係傳統用紅花粉染色，整嘅時候都有D技巧先染得靚，唔小心嘅話更加會染到成手紅晒，而且始終係化學嘢食落肚唔多好...第二個方法係想當日陪月姨姨教，就係用紅色玻璃紙將隻蛋包到好似糖咁，然後再縛條絲帶係上面，呢個方法最安全又簡單，但艾菲參考過網上圖片，覺得賣相始終麻麻...

正當艾菲十五十六，唔知揀邊個方法好嘅時候，忽然係google見到「天然染蛋法」呢幾隻字，click入去睇係教用唔同食材去染雞蛋，原來外國人好興係復活節時自己染雞蛋來做復活蛋，而染料就係唔同顏色嘅食物，例如紅洋葱皮，紅椰菜同藍莓等，而染紅色嘅只需要用紅菜頭就OK。



艾菲見呢個天然染蛋法好似幾好就決定照跟，材料只需幾隻蛋同一個紅菜頭，先將紅菜頭榨汁然後加水同幾湯匙醋一齊煲（有D食譜就教滾起先落醋攪勻），水滾後放烚好嘅蛋落去染就得（好懶嘅艾菲係直接將D蛋放落紅菜頭水一齊滾熟），不過染幾耐就無講，只係話浸得耐顏色越深，結果艾菲浸咗足足一日，期間不停翻滾再浸，啲蛋殼都只係染到少少桃紅色，仲要一沖水已經唔覺...



由於時間已經無多，艾菲唯有試另一個方法，就係剝咗殼直接浸落D紅菜頭水到然後放入雪櫃雪（剝咗殼嘅蛋難keep D，所以唔係無計可施都唔想用呢個方法），其實呢個方法係參考紅菜頭甜酸蛋嘅做法， 果然唔使兩個鐘，D蛋已經變到紅噹噹好靚仔啦﹗



等燒腩仔瞓醒晏覺抖足精神，艾菲就畀D紅雞蛋佢食，不過...呢隻仔明顯唔當呢D蛋係一隻蛋，只係當佢波咁不斷拋同碌﹗﹗﹗最後都有畀少少佢食來應吓節（佢已經試過全蛋），但佢個樣食到好似艾菲畀毒藥佢食咁﹗仔...你食完紅雞蛋就大個仔啦﹗要快高長大同聽教聽話呀﹗



雖然呢個剝殼染蛋法唔係艾菲原先想用嘅，但估唔到切開之後居然有驚喜喎﹗大家睇吓上面張相就明，隻蛋切開後竟然變咗一朵蛋花，靚到呢﹗而最重要係D蛋就算用紅菜頭水同醋浸咗成日幾，個味同普通烚蛋係無分別㗎（艾菲本身幾怕紅菜頭陣菜青味），即多咗嘅蛋可以用來整蛋沙律都無問題啦﹗