一家三口遊澳門 ~ Day 2

話說艾菲同米高生燒腩仔之前每年都去澳門一次，每次都一早plan定book好酒店，但每次都一定會落大雨搞到成身濕晒，有見及此米高已經封艾菲做「雨 神」（因為就算艾菲同屋企人去都一樣係落大雨，而米高自己過去做嘢就一定大太陽好天到暈），所以今次米高都一早「預言」此行會落雨，不過就點都估唔到竟然 唔止落雨仲要打埋風咁邪﹗

出 發前我哋已經密切留意住風暴消息，由於屋企天文台長米高話個風應該未咁快打到來，再加上酒店錢係無得退，所以我哋都係如期出發，唯一係唔敢買太夜嘅船飛返 香港，而買咗旁晚六點嘅船飛，諗住萬一有咩事都可以提早撤退返屋企嘛﹗結果係澳門嘅第一晚，我哋收到朋友whatsapp話第二日下午兩點掛三號風球，到 夜晚八點先掛八號風球，仲諗住安心繼續行程，點知返到上房睇新聞又話香港會係天光前改發三號風球，都真係擔心到成晚瞓唔好，結果第二朝米高一早走落 lobby上網（因為酒店房無免費wifi）研究風暴路線圖，上返來就好似宣判咁同艾菲話只係提早少少去碼頭就OK，YEAH！！！

本來都想襯時間尚早同燒腩仔再游多次水，不過米高就話十點打後會開始落雨，所以要爭取時間帶燒腩仔出去玩，然後唔使十五分鐘我哋已經去咗石排灣郊野公園睇 熊貓啦﹗雖則呢到叫郊野公園，但其實同香港動植物公園差唔多，地方唔算好大好快就行完，因為未夠鐘入場睇熊貓，所以同燒腩仔睇住佢D同類monkey先啦 ﹗而佢哋除咗有monkey之外仲有D雀仔，湖入面又有大堆flamingo，同埋有D滑梯之類嘅設施畀小朋友放電（不過因為落雨無得玩啦﹗），都幾啱小 朋友去親親大自然㗎﹗

入熊貓館每節（一個鐘）盛惠十蚊一位（BB唔使錢但都要買飛），不過艾菲覺得抵過去海洋公園睇好多，至少呢兩隻熊貓活躍好多，艾菲兩次來佢哋都係坐正中間 食嘢任你影相，而且來探佢哋嘅人點計都少過海洋公園堆自由人，感覺舒服同開心好多，燒腩仔都有眼定定望住兩隻熊貓㗎，但就望到發晒呆無乜反應咁，艾菲同米 高就估佢可能只係覺得有兩隻識郁嘅公仔坐咗係堆草到咁囉。

媽媽，後面果隻咩來㗎？

 er...你唔好行埋來好喎

我真係同你唔係好熟㗎咋...

唔...都係走先好啦

離開熊貓館之後已經開始落雨，所以我哋拿拿聲行埋上去熊貓資訊中心玩一陣就走啦，不過呢個熊貓資訊中心真係不得不介紹吓，艾菲兩次去都係除咗工作人員之外人影都無隻，但入面有冷氣仲有小小地方係畀小朋友玩㗎，大家如果帶小朋友去真係唔好miss咗呢個位呀﹗

返酒店執埋行李就check out啦，因為落雨再加上艾菲同米高想去食水蟹粥，所以就決定留係酒店商場行一陣街，再去food court同燒腩仔食埋嘢先起行。以為酒店商場都不外乎名店同手信鋪，點知呢到個商場除咗有play room（$80一個小朋友加一個大人，但就好細無乜嘢玩），仲有一間叫做Kid's Cavern嘅鋪頭，呢間鋪同海港城反斗城差唔多大，但入面就有超多BB用品同玩具，D貨係齊到你帶漏任何一樣BB嘢都一定會係呢到買得到，又放咗好多玩 具出來畀你試玩（感覺free過反斗城好多），而最正係佢架購物車本身係架車仔來，艾菲一放燒腩仔入去坐就即刻狂扭個軚盤，興奮到佢一邊行一邊自己笑到咔 咔聲添﹗

因為一早起身又成朝無瞓過，食飽飽嘅燒腩仔好快就畀艾菲扑暈，而艾菲同米高就即刻襯呢個空檔出發去官也街誠昌食水蟹粥，其實艾菲想食水蟹粥好耐㗎啦，但次 次都得我哋兩個真係怕食唔落，但今次抽起條筋覺得再唔食可能有排都無機會食（帶住個小朋友真係好難去呢type餐廳安安樂樂咁食嘢），所以點都要去食一 次，好彩因為打風落大雨，去到唔使排隊即刻有位，我哋兩個人叫咗碗細水蟹粥，鯪魚球炸墨魚丸雙拼，同椒鹽魷魚，飽到艾菲要攬住個肚走呢﹗

食飽之後燒腩仔都醒咗（嘻...真係時間啱啱好，認真乖仔﹗）， 話晒帶燒腩仔來澳門，點都要帶佢去大三巴影返張到此一遊嘅相，艾菲仲一心以為落大雨應該無乜人會好D啦（因為幾年前真係影過一張落雨無人嘅大三巴相），點 知去到見到成班自由人無懼風雨咁係到狂影相就知自己太天真，所以只係同燒腩仔hea影一張就即時閃人去洪興食椰子雪糕算。

離開大三巴範位，我哋只係去新八佰伴行咗陣就返酒店拎返D行李去碼頭，本來唔落雨嘅話係打算放個喼係葡京賭場就唔使行回頭路，但因為落大雨唔想拎BB車就 焗住放晒所有行李係酒店，不過就益燒腩仔拎到個扭波波做手信（酒店大堂有個姐姐係到扭波送畀小朋友，第一日見個個小朋友都拎住個波艾菲已經想拎，但就搵極 都見唔到呢個姐姐），而米高上網見到個風開始增強就決定唔等酒店發財車自己坐的士去碼頭啦﹗

去到碼頭好彩都唔算多人，艾菲仲有時間買罐樂 宮曲奇先走人（都幾好味，但始終係Jenny Barkery香D囉），本來我哋係可以坐早一班船返香港，但艾菲見相差十五分鐘，早一班係三體船我哋坐呢班係至尊噴射，為免三號風球太大浪會辛苦都係坐 返至尊噴射感覺安全D（今次已經係艾菲人生中第二次三號風球下由澳門坐船返香港，所以艾菲有晒經驗知道會有幾拋），而最最最慶幸係燒腩仔唔知點解好好瞓， 由坐車去碼頭開始瞓到落船到香港先醒（唔知係唔係因為感冒唔舒服呢？），返到香港聽新聞先知來往澳門至香港嘅船已經開始有限度服務，唔怪得知班船遲咗成十 分鐘先開啦，真係好彩可以及時返到屋企呀﹗

一家三口遊澳門 ~ Day 1