幼兒水上安全班~第二回

一轉眼又過咗一星期，燒腩仔又上完兩堂游水堂，自從佢開始一個星期上兩堂游水班之後，艾菲真係覺得時間過得更加快，單係湊佢去上堂再返屋企善後已經無咗半 日，每日都好似無乜做到D咩就過咗，忙到艾菲連blog都就來打唔切，更加係無時間去追睇其他媽媽嘅blog，就來做脫節人媽媽啦，唉...廢話都係少講，快快手打返D blog記低呢兩堂學咗D咩先﹗

第三堂：

難得天氣終於晴朗加勁熱（之前兩堂都係天陰落雨），今堂明顯多咗D新同學來上堂，但燒腩仔依然係全班最細，而真正嘅教練亦終於正式登場（無錯...之前兩堂都只係代課教練），well...年紀輕輕加黑黑實實，個樣有D似謝霆鋒，都真係幾型仔㗎﹗（米高一聽到即刻寸我「咁你咪有多D動力去上堂囉）但最吸引艾菲嘅唔係佢個樣，而係佢好識得搞氣氛，會講D小朋友話同D小朋友溝通，例如做熱身時叫小朋友抬起頭，佢會叫小朋友搵吓天上面有無雀仔。

教 練哥哥一出場，即刻好強調佢今次教嘅係BB班，所以要教我哋一D同BB熱身嘅動作，就係同BB按摩手腳等佢哋血液循環，另外亦教咗我哋按一D穴位去令BB 個身暖D，而落水時除咗要先放佢哋係池邊用腳感受水溫，亦要身貼身咁抱住BB，水只可以浸過腳，到BB OK先放低D等D水浸過心口，然後就要雙手托著BB的「加拿大」，伸手將佢前後左右咁慢慢郁，見佢狀態OK先開始畀佢踢水，否則就要抱返佢埋身等佢有多D 安全感。

呢堂無用發泡膠條，但教練就教咗我哋用浮板，畀小朋友每隻手各拎住一塊浮板，伸開手好似飛機咁踢水，燒腩仔當然無份用浮板只可以 繼續踢水啦，起初佢都游得頗enjoy，但上咗大半堂之後就開始發出一D不爽嘅聲音，教練哥哥試過幾次想過來同佢玩，佢都一手將教練哥哥推開加尖叫扮喊， 艾菲估佢大概係之前一覺瞓唔夠扭眼瞓掛（平時佢至少瞓一個鐘晏覺，但呢日艾菲一早捉佢去瞓佢死都唔肯瞓，然後瞓唔夠半個鐘又自己爬起身），但上堂中艾菲都 只可以盡量安撫，佢撐到落堂都無喊但就時不時發出D唔滿意嘅哀鳴聲囉，然後落堂帶佢返更衣室換衫佢已經呵欠頻頻，返屋企沖完涼已經即時瞓著。

第四堂：

一號風球下上堂，計埋燒腩仔只係得六個同學仔上堂，艾菲事前已經不停同燒腩仔講要同教練哥哥玩，結果佢今堂都係繼續推開教練哥哥，但其他姨姨同同學仔同佢玩佢又OK㗎喎﹗（激死﹗）到底佢點解咁唔鐘意教練哥哥呢？對於艾菲來講真係一個謎。

今 堂熱身之後頭半堂都係繼續踢水，有咗上次扭眼瞓嘅經驗之後艾菲今日再早D叫燒腩仔瞓，佢亦都瞓到成個鐘先起身，但上咗半堂之後佢又開始發出D唔滿意嘅哀鳴 聲，艾菲都唔知佢到底搞乜，莫非係嫌又踢腳無新意？真係游得多水就唔稀罕？後尾有其他小朋友用發泡膠條幫助踢腳，佢見到之後仲有D好似想喊咁嘅樣添，竟然 事隔成個星期你仲認得佢？但艾菲係玩具反斗城拎來同佢玩佢又無嘢唔驚㗎喎﹗奇怪﹗奇怪﹗

上咗半堂之後教練就教我哋撥水，真係唔講都唔知撥 水都咁有學問，因為水力有時都幾大好容易整傷小朋友，大人千祈唔好亂咁捉小朋友隻手去撥水，教練首先教小朋友好似打鼓咁拍D水等佢哋感受吓水濺起嘅威力， 之後就好似耍太極咁輕輕力來回推D水，等小朋友明白水嘅推動力，之後就好似結他他老伯跳舞咁兩邊打D水，等小朋友學識就住道力來撥水，燒腩仔當然唔識呢D 指令啦，但艾菲嘗試捉住佢隻手來玩撥水，佢總算稍為停止咗D唔滿意嘅反應。

之後教練就再教小朋友係水入面浮，動作好簡單就係畀小朋友瞓係 大人膊頭，大人拖住小朋友向後行，基本上好多小朋友都驚，因為一郁就會跳落水，而一緊張就一定會沉，燒腩仔就連瞓落艾菲膊頭呢一吓都唔肯，教練就教我哋唔 使急，可以平日同佢哋玩水時，慢慢用水淋落佢後尾枕（按住耳背），開始再越淋越接近頭頂，等佢哋習慣水浸過耳嘅感覺，呢一吓教練有偷偷地係後面測試燒腩 仔，發現佢基本上係唔驚畀水淋（因為艾菲有時沖涼都會照頭淋佢嘛），所以佢理應好快就適應到游水嘅感覺，嘻...但願佢真係如此啦﹗

幼兒水上安全班 ~ 第一回
幼兒水上安全班