幼兒水上安全班~第三回

話咁快又過咗一個星期，上星期兩堂游水堂都遇正大太陽，雖然艾菲已經同燒腩仔暱係陰頂位置游，出發前亦同燒腩仔搽咗防曬，但曬咗兩堂之後燒腩仔好明顯係曬 黑咗，最搞笑唔係泳衣印而係佢手跤D肥肉摺位明顯出現兩截色，至於艾菲自己就暫時力保不失，Shiseido之前畀大陸驗到唔知咩超標枝防曬果然 work﹗嘻...講完無謂嘢又係時候回顧吓呢兩堂學咗咩啦﹗

第五堂：

呢堂咁啱米高放假，艾菲於是叫米高一齊來係池邊陪燒腩仔上堂順便影吓相，點知呢個奉公守法嘅爸爸，好乖咁只係偷影咗一張就收工...不過有佢幫手抱燒腩仔坐車艾菲又的確係輕鬆D，而且燒腩仔都明顯玩得開心D無咁扭計，仲會游游吓望上去池邊望住爸爸笑（但就因為唔專心而成個身沉咗落水唔識浮囉﹗）。

一 開始上堂我哋都係照舊先做熱身同練踢水，到大家都warm up好之後教練哥哥就教小朋友吹波波學抖氣，佢教家長同小朋友面對面，係水面互吹個膠波，如果小朋友唔明就教佢要好似吹蠟燭咁吹郁個波，又或者用力吹D氣 係小朋友手背等佢感受吓，但對於燒腩仔呢D BB佢就叫艾菲畀個波佢玩吓算，所以燒腩仔又再一次好努力咁食波，期間佢都有少少扭但好彩有其他家長過來撩佢玩，為保形象佢即刻收聲對住人笑（扮嘢玩又出 動﹗）。

今堂教練仲教咗艾菲點樣用浮板等自己可以輕鬆D，因為燒腩仔唔識拎浮板，所以艾菲就要自已壓兩隻手落浮板（打橫放），再隔住塊浮 板捉住燒腩仔「加拿大」，盡量拖佢個身上塊浮板到游，果然咁樣真係輕鬆好多，不過燒腩仔用咗一陣就唔like，只可以間斷間斷咁用，但都好過無啦﹗

第六堂：

今 堂因為玩嘢王燒腩仔忽然唔肯乖乖飲奶所以遲咗出門口，去到竟然好多姨姨同哥哥姐姐都話「BB終於來啦」同「我好掛住BB呀」，嘩﹗原來燒腩仔咁受歡迎﹗而 呢個小朋友亦好似知道人哋講咩咁四圍望住人笑﹗艾菲真係唔知好嬲定好笑好﹗我哋頭半堂都係重覆踢水同吹波嘅動作，艾菲就同燒腩仔玩吓水輕鬆吓，而佢就依然 會游游吓係到叫，不過佢今堂就終於肯同教練哥哥笑，教練哥哥成功同佢玩咗一陣波，但其他姨姨想抱佢就完全唔OK﹗

到後來教練就教跳水，其 實係類似第一堂臨落堂時教嘅動作，小朋友坐池邊跳落水畀家長接住，不過今次家長就要將小朋友拖後等佢浮返上水，而且講得好清楚唔可以亂跳，一定要注意水深 同動作，淺水絕對不宜因為會屈到腳，小朋友背脊一定要向前傾，否則好容易傷到脊骨，落水後家長亦唔好急住將小朋友對手向上拉，因為道力好容易傷到小朋友， 寧願小朋友飲幾啖水再慢慢拖佢上水面。

燒腩仔第一堂好like呢個動作，幾乎唔使艾菲叫佢已經急住要跳落水，但今堂佢唔知點解有D呆滯，成日四圍望然後發呆唔理艾菲（返來同米高講佢問燒腩仔係唔係搵佢喎），所以初時係艾菲抱佢落水唔係跳水，後來唔知邊到漂咗塊浮板過來，而燒腩仔又勁like塊浮板，佢就追住塊浮板成個人傾前咁跳落水，於是艾菲將計就計攬住塊浮板來引佢跳水，玩到佢夠鐘落堂都唔願走呢﹗

幼兒水上安全班 ~ 第二回
幼兒水上安全班 ~ 第一回
幼兒水上安全班