玩轉急症室

就係去完藍田兒童遊戲室當晚，返到屋企見燒腩仔頸下面有D紅，艾菲同米高仲以為係揹帶焗到佢紅（因為佢平時一熱或者忟都會紅，但過一陣就會退），點知係飲瞓覺奶前幫佢打開件衫換片，就見到佢成個肚仔都係一點點紅點，無經驗嘅艾菲同米高以為佢出疹，但佢咳咗成個星期都無發過燒又鬼打都無咁精神，而且只係肚仔同頸有紅其他位置完全無事，所以即時影低再打電話畀婆婆問功課，婆婆一見到張相就話應該係敏感，懷疑係遊戲室污糟（吓？咁大獲？米高聽到仲即刻附和話「你都見佢清潔時段根本無人入去清潔啦」），教我哋試吓幫燒腩仔沖涼睇吓有無好D。

結果沖完涼，可能因為眼瞓，燒腩仔扭得好勁，D紅點無退反而多咗，因為當時已經係夜晚十點幾，樓下睇開個兒科醫生肯定閂咗門，艾菲又唔想去睇醫療集團24小時D hea醫生，米高就即刻話返仁安同佢睇急症，其實我哋都知燒腩仔應該無乜事，可能等佢飲完奶冷靜落來瞓一覺就會慢慢退，但米高話唔想夜長夢多（佢都講得啱嘅，如果朝早都未退咪又係要睇醫生，到時得艾菲一個同燒腩仔去睇醫生仲呢hea啦），所以堅持去睇醫生買個安心，順便去拎枝咳水畀燒腩仔飲吓都好喎。

等燒腩仔飲完枝瞓覺奶，我哋就拿拿聲執埋D證件同媽媽袋出發，去到仁安都係十一點左右，好彩當晚唔算多人，前面只係有七八個病人（絕大部分都係BB），登記完等一陣就去分流，然後唔使二十分鐘已經可以見醫生（登記時姑娘仲話可能要等一個鐘先有得見醫生），基本上燒腩仔飲完奶已經成個醒晒，入到急症室更加係爆high（唔通佢同艾菲一樣返到來仁安聞到陣味特別有親切感？），搶飛仔，扯口罩，擒梳化，撩女仔（咁啱有個同佢同一個月出世嘅BB女跌親來睇醫生，人哋已經無乜理佢但佢都係勁high咁尖叫同摸人手仔），分流時又好開心咁自己企係到磅重，真係完全唔覺得佢有病囉﹗

入到房見醫生，呢隻仔完全無喊，仲好開心咁係到搞搞震，先望住醫生同姑娘傻更更咁笑，跟住醫生同佢檢查耳仔佢又伸手去搞吓個儀器，同佢睇喉嚨佢試完條雪條棒咩味之後就想拎個電筒，好彩醫生都見慣世面無表現出唔鐘意，檢查完之後醫生都話燒腩仔應該係敏感，而且只係好輕微果種，但就唔知到底係乜嘢敏感（因為除咗去咗遊戲室玩，燒腩仔呢兩日亦咁啱試食咗全蛋，艾菲都擔心佢係食物敏感），醫生話燒腩仔咳咗成個星期，都有可能係過瀘性病毒引起都未定，所以都係叫我哋返去食藥睇吓情況會唔會有好轉就算﹗

找完數拎埋藥我哋就即刻返屋企，全個過程只係用咗一個鐘左右，燒腩仔係車到已經瞓到成隻豬咁，返到屋企我哋都無嘈醒佢食藥，第二朝先同佢食第一次藥，好彩燒腩仔完全唔抗拒飲藥水（呢個傻瓜仲要飲完係到嘈嫌唔夠喉添﹗），食完藥之後D紅點即刻淺色咗，食完兩日藥已經全部退晒（雖然無乜事，不過做媽媽嘅始終覺得肉赤，所以見佢好返真係安樂晒），至於D咳同痰都明顯少咗好多，到今日已經完全好返添啦﹗