一家三口遊澳門 ~ Day 1

早幾個星期，超級哈日嘅米高已經confirm咗我哋一家三口出年去北海道嘅機票，為咗令佢唔好keep住活係美好嘅幻想之中，艾菲堅持去北海道前要去個短trip等佢感受吓帶埋燒腩仔去旅行有咩唔同，於是我哋就揀咗去澳門兩日遊。

 以前拍拖時每年都會去一次澳門玩，不外乎四圍搵好嘢食同去賭場見識吓，一人一個普通袋加張身份證就行得，但宜家多咗個燒腩仔，除咗佢部BB車，仲有佢D日 用品同奶粉尿片等等等等，艾菲淨係執佢D行李都搞咗成晚，真係要拖埋個細喼出發先掂﹗好彩燒腩仔全程都算合作無乜扭計，仲要一上船就瞓無暈船浪，否則我哋 肯定仲「呢hea」﹗

我哋坐十點九船出發，去到澳門差唔多十二點，因為酒店要三點先有得check in，所以一落船第一時間去搵食，而米高就揀咗去無乜人去嘅利安餐廳，貪佢夠大又易搵位，帶埋行李同燒腩仔去慢慢食都唔怕阻住人做生意嘛﹗而我哋仲好好彩 獲安排坐海景位，可以望住旅遊塔食嘢添﹗都幾Good feel㗎﹗

利安餐廳最出名好似係食乳豬同羊鞍，不過我哋得兩個人加上艾菲唔食羊，所以都無可能食到，此行最主要係來食馬介休球，唔知點解宜家澳門好多地方都無馬介休 球食，呢到個馬介休球都唔錯，真係足料啖啖肉㗎，唔會好似有D搵笨嘅只得薯蓉，不過呢到做埋今個月就搬去氹仔啦，怕且下次來都未必就到時間去食。

食飽之後就去酒店check in，我哋今次住金沙城Sheraton，間房主要望泳池景，但其實都望到成個威尼斯人。為咗方便出入去玩，米高本來都幾堅持唔住氹仔呢邊，但為咗燒腩仔 同滿足艾菲嘅要求（艾菲要求酒店要乾淨同有泳池，至少要有BB床同奶樽機），佢都唯有屈服，最緊要係燒腩仔一入房就勁like（即無污糟嘢啦），放佢上床 到即刻好開心咁爬來爬去，笑到四萬咁口﹗

book房時已經request咗要BB床，不過入到房都唔見要call人拎來，仲要等咗OK耐先送齊D BB床，奶樽消毒機同浴盤過來，不過值得一讚係部ipad揚聲器，fit晒艾菲用來播兒歌氹燒腩仔瞓覺。

settle down之後我哋就急急腳換泳衣帶燒腩仔落去游水啦﹗酒店有好多個泳池，就算有好多人來游水都唔會覺得逼，但就無救生員要自己小心睇實BB，而燒腩仔亦非常high，一落水就自動波踢腳，仲不停撥水搞到自己成頭濕晒。

玩咗一個鐘左右我哋就上水，返上房沖涼換衫之後又係時候出發去搵食，呢個小朋友上車無耐已經無電瞓著咗，益艾菲可以慢慢欣賞吓澳門嘅夕陽，不過我哋貪方便 坐酒店發財車過澳門金沙再轉的士，結果就係澳門金沙等的士等咗成半個鐘先上到車，唯有當係畀燒腩仔叉多陣電啦，不過就難為咗抱住燒腩仔嘅米高囉﹗

呢餐嘅目的地係米芝蓮推介嘅澳門旅遊學院學習餐廳，三年前來食過一次之後就一試難忘，每次來親澳門都要去食返餐，menu無變食物質素都無變，serve我哋嘅係學生，上菜比較慢但服務質素絕對唔差，佢哋一見到燒腩仔就即刻拎咗張古色古香嘅BB凳出來，真係型到無朋友呀﹗佢哋聽到燒腩仔要換片，仲專登畀間VIP房艾菲入去換添﹗讚﹗（此行最深感受係帶BB去澳門，最唔方便就係無地方可以換片﹗）

食飽之後我哋好乖咁係附近超市買D嘢就返咗酒店啦（如果換轉以前一定係去賭場玩成晚），燒腩仔返到酒店又繼續四圍爬搞吓呢樣搞吓果樣，因為艾菲要執行李就 放咗佢落BB床到熟習吓個環境，難得呢個小朋友又無認床嘅問題，同佢飲完奶著返個睡袋就即刻瞓著，只係成晚係睡夢中碌來碌去好似想搵佢日日要攬住瞓嘅床圍 咁，真係抵錫呀﹗