十個月

Hi!又係我燒腩仔一個月出場一次嘅時候啦，不過我宜家唔係好得閒，忙緊食蛋糕呀，媽媽專登整來慶祝我十個月大，好好味㗎﹗

     

呢個月嘅飲食方面都係同之前差唔多，三餐奶兩餐固體，早晚兩餐飲七安，下午茶就飲五安，至於固體就要一個大人碗，但食完之後我仲可以食好多嘢落肚㗎，尤其係見到爸爸媽媽食嘢我一定會lur住要食埋一份，有時都呃到一啖飯或者半個餐包食﹗呢個月我又食咗唔少新嘢啦，有馬蹄，瑤柱，紅腰豆，蘑菇，西芹，ABC粉，青椒，麵包，鬆糕，雞蛋餅，哈蜜瓜同水蜜桃，媽媽話來緊可以開始畀我試食牛肉同蛋白，嘩﹗唔知好唔好味㗎呢﹗好期待呀﹗因為我呢個月又出多隻牙仔啦，咬嘢亦都越來越叻，所以除咗多咗食印度餐之外，媽媽有時煲粥仔都唔將D食物打蓉，而改為切粒粒畀我咬，仲煲到D粥仔超杰先畀我食，佢話我再叻D就可以試食爛飯啦﹗YEAH！

宜家我每日都瞓到差唔多13個鐘㗎，每朝九點半起身，飲完奶玩到十一點就瞓一陣，十二點起身沖完涼食粥仔，跟住三點左右瞓第一次晏覺，四點起身等食下午茶餐奶，之後玩到六點就再瞓，瞓到七點起身就等爸爸餵我食粥仔，食飽就同爸爸媽媽玩到十點半先飲奶瞓覺。不過朝早三覺都要媽媽挾持住逼我先瞓（實在唔逼唔得，一唔夠瞓佢就會發痲好難搞），但夜晚一覺我落床碌一陣就會自己瞓，亦都無再半夜爆喊，等爸爸媽媽都可以同我一樣一覺瞓天光。

至於活動能力，當然係越來越叻啦﹗我爬得越來越快，每次媽媽一開房門拎嘢，我就會九秒九爬過去搞搞震，成日借D意襯爸爸媽媽去洗手間或者廚房開閘時攝入去，亦都越來越大膽會傢俬駁傢俬咁係屋企行來行去，但媽媽想畀條學步帶我試用我就即刻唔想行囉﹗唔扶住嘢企都企到半分鐘咁耐㗎，無力就用pat pat坐落地下抖吓。仲有一樣不得不提就係我已經練成咗擒上梳化拎嘢嘅絕技啦，仲識得用腳落返地添，係唔係好叻叻呢﹗

嘻...我同爸爸一樣好鐘意出街㗎，每次出親街都會踢晒腳好hyper，坐係BB車到成個看更咁四圍望，成日眼甘甘咁望實街上面D人同偷聽人哋講緊咩，尤其係見到同我年紀差唔多嘅BB，經過時我一定會望多幾眼，但我都唔係咁隨便畀反應人㗎，心情好我先會同你say hi同bye bye，至於kiss同拍手更加係no way（艾菲：實情係教極都未識），至於BB話就只會留返同爸爸媽媽講，尤其係扭媽媽畀嘢我食時我可以好清楚咁講到「Ma Ma, Mum Mum Mum...」。

我呢個月嘅最大轉變，就係情感表達嘅能力越來越高，識得執唔到D嘢食時會唔開心發脾氣，又識得唔想爺爺走咗去唔同我玩時扁咀喪喊，畀人搶咗我D玩具或者沒收我D嘢食時會發惡大叫，做完衰嘢怕畀媽媽鬧會扮嘢喊咗先，媽媽大大聲say no唔准我搞風扇時我會停低望住佢笑再試吓伸隻手埋去睇佢會唔會繼續stop我，畀媽媽話我會乖乖坐定定聽佢訓話唔敢再嘈，雖然媽媽都覺得我係大個仔咗先會咁，但佢話佢其實好頭痕唔知應該點樣教我控制情緒好喎﹗